Зебур 129 - Мукъаддес Китап

Алланынъ шефкъатыны чагъырув

Зиярет йыры.

¹ Я РАББИ, теренликтен мен Сени чагъырдым.

² Раббим, сесимни эшит, къулакъларынъ ялварувларыма дикъкъат этсин!

³ Раббим, Сен гуналарны эсапкъа алсанъ, ким аякъ устюнде турар?

⁴ Амма Сен афу этесинъ, шу себептен Сенден къоркъарлар.

⁵ РАББИге мен умют багъладым, джаным да Онъа умют багълады; Онынъ сёзюне ишандым.

⁶ Къаравул сабаны беклегенинден зияде, э, къаравул сабаны беклегенинден зияде джаным Раббини беклей.

⁷ Исраиль РАББИге умют багъласын, чюнки РАББИнинъ севгиси буюк, Онда буюк одеме бар.

⁸ О, Исраильнинъ бутюн акъсызлыкъларыны одер.