Зебур 123 - Мукъаддес Китап

Алла – Озь халкъынынъ Имаеджиси

Давутнынъ зиярет йыры.

¹ Десин Исраиль: – Эгер РАББИ бизнен олмаса эди,

² эгер РАББИ бизнен олмаса эди, адамлар бизге къаршы чыкъкъанда,

³ бизге къаршы гъазаплангъанда, олар бизни тири-тири ютар эди,

⁴ сувлар бизни богъар эди, джанымыз устюнден селлер кечер эди,

⁵ джанымыз устюнден сув ташкъыны кечер эди.

⁶ РАББИге бинъ шукюрлер олсун, чюнки оларгъа бизни тишлернен йыртмагъа ёл бермеди.

⁷ Бизим джанымыз, бир къуш киби, авджыларнынъ тузагъындан къачып къуртулды. Тузакъ парланды, биз къачып къуртулдыкъ!

⁸ Ярдымымыз – РАББИнинъ Адында, ер ве кокнинъ Яратыджысында!