Зебур 121 - Мукъаддес Китап

Ерусалим ичюн аманлыкъ дувасы

Давутнынъ зиярет йыры.

¹ Олар манъа: «Айды, РАББИнинъ Эвине барайыкъ!» – дегенде, мен къувандым.

² Энди сенинъ къапуларынъда аякъларымыз турды, Ерусалим!

³ Ерусалим, сен шеэр оларакъ къурулдынъ, къысымларнынъ бирлиги олдынъ!

⁴ Шу шеэрге къабилелер келир, РАББИнинъ къабилелери Онынъ Адына тешеккюр этип, Исраильге берильген шаатлыкъны беджерир.

⁵ О ерде укюм этмек ичюн тахтлар къоюлды, Давут падиша союнынъ тахтлары.

⁶ Ерусалим ичюн селямет соранъыз! Сени севгенлер аманлыкъ корьсюн!

⁷ Къалелеринъде селямет олсун, керменлеринъде – аманлыкъ!

⁸ Агъа-къардашларым ве якъынларым ичюн айтарым: «Сенде селямет олсун!»

⁹ Алламыз олгъан РАББИнинъ Эви ичюн, санъа эйилик тилерим!