Зебур 117 - Мукъаддес Китап

Гъалебе ичюн шукюр дувасы

¹ РАББИге шукюр этинъиз! О, хайырлыдыр, ве эбедийдир Онынъ севгиси!

² Исраиль халкъы бойле айтсын: «Акъикъатен эбедийдир Онынъ севгиси!»

³ Харуннынъ сою айтсын: «Акъикъатен эбедийдир Онынъ севгиси!»

⁴ РАББИден къоркъкъанлар айтсын: «Акъикъатен эбедийдир Онынъ севгиси!»

⁵ Хавфлы бир алда РАББИни чагъырдым; О, мени эшитти де, хавфсыз бир ерге чыкъарып къойды.

⁶ РАББИ меним тарафымда, ич бир шейден къоркъмам! Инсан манъа не япа билир?

⁷ РАББИ меним тарафымда, О, меним ярдымджымдыр. Душманларыма къоркъмайып бакъам.

⁸ Инсангъа ишанмакътан РАББИге умют багъламакъ яхшы.

⁹ Мырзаларгъа ишанмакътан РАББИге умют багъламакъ яхшы.

¹⁰ Халкъларнынъ эписи мени сарып алды, лякин РАББИнинъ Адынен оларны къырып ташладым.

¹¹ Этрафымны сардылар, мени алкъагъа алдылар, лякин РАББИнинъ Адынен оларны къырып ташладым.

¹² Балкъуртлар киби мени сарып алдылар ве тикенде сёнген атеш киби сёндилер, лякин мен оларны РАББИнинъ Адынен къырып ташладым.

¹³ Йыкъылсын деп, мени пек тюрттилер, амма РАББИ манъа ярдым этти.

¹⁴ РАББИ – меним къуветим ве йырым, О – меним къуртарувым олды!

¹⁵ Къуванч ве къуртулыш сеслери инсафлыларнынъ чадырларында янъгъырай, РАББИнинъ онъ къолу кучьлю ишлер япа!

¹⁶ РАББИнинъ онъ къолу юксек котериле, РАББИнинъ онъ къолу кучьлю ишлер япа!

¹⁷ Мен ольмем, яшай берерим, РАББИнинъ ишлерини хабер этерим.

¹⁸ РАББИ мени къатты джезалады, амма олюмге джанымны бермеди.

¹⁹ Акъикъат къапуларыны манъа ачып беринъиз, олардан кирип, РАББИни шуретлерим!

²⁰ Бу – РАББИнинъ къапусыдыр, инсафлылар ондан кирерлер.

²¹ Сени шуретлерим, я РАББИ! Сен мени эшиттинъ ве меним Къуртарыджым олдынъ.

²² Къуруджылар келишиксиз деп четке ташлагъан таш бинанынъ темельташы олды.

²³ Козюмиз огюнде япылгъан аджайип шей – Алланынъ ишидир!

²⁴ Бу кунни РАББИ яратты, онда севинип шенъленейик!

²⁵ Я РАББИ, бизни къуртар, я РАББИ, бизге мувафакъиет бер!

²⁶ РАББИнинъ Ады иле Келеяткъанны шуретленъиз! РАББИнинъ Эвинден сизни алгъышладыкъ!

²⁷ РАББИ – Алладыр, бизге ярыкъ берди. Байрам къурбаныны йиплернен багъланъыз, бойнузлы къурбан ерине оны алып барынъыз.

²⁸ Аллам Сенсинъ, Сени шуретлерим, Аллам Сенсинъ, Сени юксельтирим.

²⁹ РАББИни шуретленъиз! О, хайырлыдыр, акъикъатен эбедийдир Онынъ севгиси!