Зебур 114 - Мукъаддес Китап

Къуртулыш йыры

¹ РАББИни севем! О, меним ялварувымны, меним сесимни эшитти.

² О, манъа къулакъ аскъаны ичюн, омюрбилля Оны чагъырырым!

³ Олюм багълавлары мени сарды, джеэннем азаплары башыма тюшти, сыкъынты ве беля мени басып алды.

⁴ О вакъыт РАББИнинъ Адыны чагъырдым, «Я РАББИ, джанымны къуртар», – дедим.

⁵ РАББИ рахман ве адалетлидир, Алламыз мераметлидир.

⁶ РАББИ адий инсанларны сакълай. Мен белягъа огърагъанымда, О, мени къуртарды.

⁷ Эй, джаным, раатлыкъ ерине бир даа къайт, чюнки РАББИ санъа эйилик япты!

⁸ Джанымны олюмден, козьлеримни яштан, аякъларымны таймакътан Сен къуртардынъ, я РАББИм!

⁹ Тирилер дюньясында РАББИнинъ алдында юрерим!