Цефанья 1 - Мукъаддес Китап

Раббининъ къоркъунчлы куню акъкъында пейгъамберлик

¹ Амоннынъ огълу Ёшия Ехуданынъ падишасы олгъанда, РАББИ Хушийнинъ огълу Цефаньягъа (Хуший – Гедальянынъ огълу, Гедалья – Амарьянынъ огълу, Амарья – Хизкиянынъ огълу) бойле хабер берди:

² – Бу, РАББИнинъ сёзлери: Мен мытлакъа ер юзюнден эр шейни ёкъ этеджегим.

³ Адамларны ве айванларны, коклерде учкъан къушларны ве денъизде ялдагъан балыкъларны ёкъ этеджегим. Яман адамларны ве ёлдан ургъан эр бир шейни де ёкъ этеджегим. Мен инсаниетни ер юзюнден ёкъ этеджегим, – дей РАББИ.

⁴ – Мен Ехудагъа ве Ерусалимде яшагъанларгъа къаршы чыкъаджагъым ве шу ерде Баалгъа ибадет ерининъ изини биле къалдырмайджагъым, путларгъа табынгъан руханийлернинъ адларыны да силеджегим.

⁵ Эм эвлернинъ тёпелеринде коклернинъ ордусына ибадет эткенлерни, эм РАББИге садыкълыгъына ант этип, шу аньде Милкъомгъа садыкъ къалгъанларны,

⁶ эм РАББИден юзь чевиргенлерни, эм РАББИнинъ истегини къыдырмагъанларны, эм де Онынъ ярдымыны сорамагъанларны ёкъ этеджегим.

⁷ РАББИ-ТААЛЯнынъ огюнде тынч ол! РАББИнинъ куню якъынлаша. РАББИ энди къурбан азырлады, чагъырыладжакъ адамларны азиз этти.

⁸ РАББИнинъ къурбан кунюнде Мен башлыкъларны ве падишаларнынъ огъулларыны, ябанджыларнынъ урбасына кийинген эписини джезалайджагъым.

⁹ Мен о куню путларгъа ибадет эткенлерни ве эфендисининъ эвини зорбалыкъкъа ве яланларгъа толдургъан адамларны джезалайджагъым.

¹⁰ О куню, – дей РАББИ, – Балыкъ Къапусы янында къычырып ярдымгъа чагъыраджакълар, янындаки Мишне мааллесинде де багъыраджакълар, Ерусалим байырларында шиддетли шатыр-гудюрдилер эшитиледжек.

¹¹ Шеэрнинъ Махтеш мааллесинде яшагъанлар, агъланъыз! Алыш-веришчилернинъ эписи ольдюриледжеклер, кумюшке саткъан эр бири ёкъ этиледжек.

¹² Шу вакъыт Мен лампатларнен бутюн Ерусалимни гъайретнен бакъып чыкъаджагъым ве шарапнынъ къою тортасына ошагъан къопай адамларны, «РАББИ не яхшылыкъ, не яманлыкъ япар», – юреклеринде айткъанларны джезалайджагъым.

¹³ Оларнынъ зенгинлиги тартып алынаджакъ, оларнынъ эвлери бакъымсыз къаладжакъ. Олар эвлер къураджакъ да, эвлеринде яшамайджакълар. Юзюм багъчаларыны сачаджакъ да, шарабыны ичмейджеклер.

¹⁴ РАББИнинъ буюк куню якъын. О, якъын ве ашыкъып келе. РАББИнинъ куню гъамлы кунь оладжакъ. О вакъыт джесюр аскерлер биле гъамнен къычыраджакъ!

¹⁵ Бу кунь – гъазап куню, гъам ве сыкъынты куню, ёкъ этилюв ве бозулув куню, къою къаранлыкъ куню, булут ве тютюн куню.

¹⁶ О куню бору чалынаджакъ, къавийлештирильген шеэрлерге ве юксек къуллелерге къаршы къычырувларнен дженк этеджеклер.

¹⁷ РАББИге къаршы гуна япкъанлары ичюн, Мен адамларгъа буюк беля ёллайджагъым, ве олар кёр киби юреджеклер. Оларнынъ къанлары, топракъ киби, тёкюледжек, ичеклери, кубре киби, сепиледжек.

¹⁸ РАББИнинъ гъазабы кунюнде оларны не кумюшлери, не алтынлары къуртараджакъ. РАББИнинъ ачув атеши бутюн ерни ютаджакъ. РАББИ ер юзюнде яшагъанларнынъ эписини ёкъ этеджек, оларнынъ сонъу апансыздан келеджек.