Сайылар 8 - Мукъаддес Китап

Лампатларнынъ ерлешюви

¹ РАББИ Мусагъа бойле деди:

² – Харунгъа айт ки, о, лампатларны якъкъанда, къандильнинъ огюнде еди лампат янмагъа борджлу.

³ Харун ойле де япты. РАББИ Мусагъа буюргъаны киби, о, къандильнинъ огюнде еди лампатны якъты.

⁴ Къандиль бойле япылгъан эди: темелинден башлап чечеклерине къадар о, алтындан дёгюльген эди. РАББИ Мусагъа насыл косьтерген олса, о, къандильни маденден ойле де дёгди.

Левийлилернинъ элялланувы ве багъышланувы

⁵ РАББИ Мусагъа бойле деди:

⁶ – Исраиль огъулларынынъ арасындан левийлилерни айырып, оларны элялла.

⁷ Оларны элялламакъ ичюн, шуны яп: оларгъа темизлейджек сувны септир, олар беденлериндеки бутюн сачларны тыраш этсин ве урбаларыны ювсунлар. Бойле этип, олар элял оладжакъ.

⁸ Сонъ олар бир бузавны ве онен берабер ашлыкъ бахшышыны – зейтюн ягъынен къарыштырылгъан энъ яхшы богъдай унуны – алсынлар. Гуналар ичюн къурбан оларакъ башкъа бир бузавны ал.

⁹ Левийлилерни Корюшюв Чадыры огюне кетир ве бутюн Исраиль огъулларынынъ джемаатыны топла.

¹⁰ Левийлилерни РАББИнинъ огюне къой, ве Исраиль огъуллары къолларыны устьлерине къойсунлар.

¹¹ Харун исраиллилернинъ адындан левийлилерни РАББИге салландырыладжакъ бахшыш оларакъ багъышласын, ве о вакъыт левийлилер РАББИге хызмет этмеге азыр оладжакълар.

¹² Левийлилер озь къолларыны бузавларнынъ башларына къойсунлар, ве сен левийлилер ичюн одеме этмеге, бир бузавны гуналар ичюн къурбан оларакъ чал, экинджисини исе РАББИге бутюнлей якъыладжакъ къурбан оларакъ чал.

¹³ Левийлилерни Харуннынъ ве онынъ огъулларынынъ огюнде къой ве оларны РАББИге салландырыладжакъ бахшыш оларакъ багъышла.

¹⁴ Бойле этип, левийлилерни Исраиль огъулларындан айыр, ве левийлилер Менимки оладжакълар.

¹⁵ Сен оларны эляллагъан ве салландырыладжакъ бахшыш оларакъ багъышлагъан сонъ, левийлилер Корюшюв Чадырында хызмет этмеге башласынлар.

¹⁶ Исраиллилернинъ арасындан олар бутюнлей Манъа багъышлангъанлар. Биринджи догъгъанларынынъ, Исраиль къадынлары догъгъан биринджи огълан балаларынынъ ерине Мен оларны Озюме алдым.

¹⁷ Исраиль огъулларында биринджи догъгъан бала я да айван Менимдир. Мысыр топрагъында биринджи догъгъанларны ёкъ эткен куню Мен оларны Озюме айырып азиз эттим

¹⁸ ве Исраиль огъулларында биринджи догъгъан огълан балаларынынъ ерине левийлилерни алдым.

¹⁹ Сонъ Исраиль огъулларынынъ арасындан Мен левийлилерни Харунгъа ве онынъ огъулларына бутюнлей бердим, олар Исраиль огъуллары ерине Корюшюв Чадырында хызмет этсинлер ве Исраиль огъуллары ичюн одеме этсинлер. О вакъыт, Исраиль огъуллары Мукъаддес Ерге якъынлашкъанда, оларнынъ башларына беля тюшмейджек.

²⁰ Муса, Харун ве Исраиль огъулларынынъ бутюн джемааты левийлилер акъкъында айтылгъанны яптылар. РАББИ Мусагъа левийлилер акъкъында буюргъаны киби, Исраиль огъуллары ойле де яптылар.

²¹ Левийлилер озьлерини гуналарындан темизледилер ве урбаларыны ювдылар. Сонъ Харун оларны салландырыладжакъ бахшыш оларакъ РАББИге багъышлады ве, оларны элялламакъ ичюн, Харун олар ичюн одеме этти.

²² Бундан сонъ левийлилер Харуннынъ ве огъулларынынъ башлыгъында озь хызметлерини япмагъа Корюшюв Чадырына кирдилер. РАББИ Мусагъа левийлилер акъкъында буюргъаны киби, олар ойле де яптылар.

²³ РАББИ Мусагъа бойле деди:

²⁴ – Левийлилер акъкъында къанун будыр: Йигирми беш яшындаки ве ондан зияде олгъанлар Корюшюв Чадырында озь ишлерини япып, хызмет этсинлер.

²⁵ Лякин элли яшыны толдургъан сонъ, озь ишлерини ве хызметини битирсинлер ве бир даа чалышмасынлар.

²⁶ О заман олар Корюшюв Чадыры ичюн джевапкяр олгъан агъа-къардашларына ярдым этсинлер, лякин озьлери хызмет этмесинлер. Ишлерине бакъкъанда, левийлилернен бойле яп.