Сайылар 6 - Мукъаддес Китап

Назарейлер ичюн къаиделер

¹ РАББИ Мусагъа бойле деди:

² – Исраиль огъулларына бойле айт: Эгер бир акъай я да апай назарей олмагъа гузель адакъ берсе ве озюни РАББИге багъышласа,

³ о, шарапны ве башкъа насылдыр ичкини ичмесин, не шараптан, не де башкъа ичкиден япылгъан сиркени ичмесин, юзюмден япылгъан ич бир ичимликни ичмесин, не тазе, не де къуру юзюм ашамасын.

⁴ Назарейлигининъ бутюн вакътында о адам юзюмнинъ не чегирдегинден, не терисинден япылгъан ич бир шейни ашамасын.

⁵ Назарейлигининъ бутюн вакътында о адам башыны устранен тыраш этмесин. Озюни РАББИге багъышлагъан куньлер биткендже, о, азиз олсун, башындаки сачларыны осьтюрсин.

⁶ РАББИ ичюн назарей олмакънынъ бутюн вакътында о, олю беденге якъынлашмасын.

⁷ Бабасы, анасы, агъасы я да къызкъардашы ольгенде, оларгъа токъунмасын ве арамланмасын, чюнки о озю ве башынынъ сачлары Аллагъа багъышлангъандыр.

⁸ Назарейлигининъ бутюн вакътында о, РАББИнинъ азизи олсун.

⁹ Эгер онынъ янында бирев апансыздан ольсе, ве назарей озь назарейлигини ве башынынъ сачларыны арамласа, о, эляллангъан кунюнде озь башыны тыраш этсин, единджи куню сачларыны къыркътырсын.

¹⁰ Секизинджи куню о, руханийге, Корюшюв Чадырынынъ кириши янына эки гогерджинни я да эки гогерджин баласыны кетирсин.

¹¹ Руханий бирисини гуна ичюн къурбан оларакъ кетирсин, экинджисини исе бутюнлей якъыладжакъ къурбан оларакъ кетирсин ве бойле этип, олю беденге токъунма гунасындан оны элялласын, о куню башыны да азиз этсин.

¹² Сонъ назарей озюни ве назарейлиги куньлерини янъыдан РАББИге багъышласын ве бир йыллыкъ къочкъарны къабаат ичюн къурбан оларакъ кетирсин. Эвельки куньлер сайылмайджакъ, чюнки онынъ назарейлиги арамлангъан эди.

¹³ Назарейликнинъ куньлери биткенинен, назарейлер акъкъында бойле къанунны беджеринъиз: назарейни Корюшюв Чадырынынъ кириши янына алып барынъыз.

¹⁴ Анда о, РАББИге бойле къурбанларны ве бахшышларны кетирсин: бутюнлей якъыладжакъ къурбан оларакъ – бир йыллыкъ къусурсыз къочкъарны, гуналар ичюн къурбан оларакъ – бир йыллыкъ къусурсыз къойны, аманлыкъ къурбаны оларакъ – даа бир къусурсыз къочкъарны,

¹⁵ бир сепет энъ яхшы богъдай унундан маясыз пишкен пите: зейтюн ягъынен басылгъан пителерни, пишкен сонъ устьлерине зейтюн ягъы сюртюльген маясыз пителерни, ашлыкъ ве тёкюледжек бахшышларны.

¹⁶ Руханий буларны РАББИнинъ огюнде кетирсин ве гуналар ичюн къурбан ве бутюнлей якъыладжакъ къурбан оларакъ чалсын.

¹⁷ Руханий РАББИге аманлыкъ къурбаны оларакъ къочкъарны чалсын ве маясыз пите сепетини бахшыш оларакъ берсин. Руханий даа ашлыкъ ве тёкюледжек бахшышларны кетирсин.

¹⁸ Сонъ назарей назарейликте осьтюрген сачларыны Корюшюв Чадырынынъ кириши янында къыркътырсын, назарейликте осьтюрген сачларыны алып, аманлыкъ къурбаны тюбюндеки атешке ташласын.

¹⁹ Назарей озь назарейлигинде осьтюрген сачларыны къыркътыргъан сонъ, руханий къочкъарнынъ сувда пишкен курегини, ягънен басылгъан маясыз питени ве устюне ягъ сюртюльген маясыз питени сепеттен алсын ве назарейнинъ къолуна къойсун.

²⁰ Сонъ руханий буларны салландырыладжакъ бахшыш оларакъ РАББИнинъ огюнде саллайджакъ. Бу, руханий ичюн айырылгъан азизликтир. Къочкъарнынъ салландыраджакъ кокреги ве котериледжек аягъы онынъкидир. Бундан сонъ назарей шарапны ичмек мумкюн.

²¹ Назарей озь адагъына коре назарейлиги ичюн РАББИге берген бахшышлар акъкъындаки къанун будыр. Бундан зияде бермеге элинден кельсе, башкъа бахшышлар кетирмек мумкюн. Назарейлик къануны боюнджа берген адагъыны беджерсинлер.

Руханийлернинъ багъышлавы

²² РАББИ Мусагъа бойле деди:

²³ – Харунгъа ве онынъ огъулларына бойле айт: Исраиль огъулларына яхшылыкъ тиленъиз, оларгъа бойле айтынъыз:

²⁴ «РАББИ санъа эйилик япсын ве сени къорчаласын!

²⁵ РАББИнинъ ачыкъ юзю сизни корьсюн ве санъа мераметли олсун!

²⁶ РАББИ юзюни санъа чевирсин ве тынчлыкъ-аманлыкъ берсин!»

²⁷ Бойле этип, олар Исраиль огъулларына Меним Адымны чагъырсынлар, ве Мен оларгъа яхшылыкъ япаджагъым.