Сайылар 13 - Мукъаддес Китап

Джасуслар

¹ Бундан сонъ халкъ Хацероттан ёлгъа чыкъты ве Паран сахрасында токътады.

² РАББИ Мусагъа бойле деди:

³ – Ханаан топрагъыны бакъмагъа бир къач адамны ёлла. Мен бу топракъны Исраиль огъулларына берем. Баба-деделеринъизнинъ къабилелеринден бирер адам ёлла. Олар озь къабилелеринде башлыкъ олмалылар.

⁴ РАББИ буюргъаны киби, Муса оларны Паран сахрасындан ёллады. Оларнынъ эписи Исраиль огъулларында башлыкълар эдилер.

⁵ Оларнынъ адлары будыр: Рубен къабилесинден – Закъкъурнынъ огълу Шаммуа,

⁶ Шимеон къабилесинден – Хорийнинъ огълу Шафат,

⁷ Ехуда къабилесинден – Ефунненинъ огълу Къалев,

⁸ Йиссакъар къабилесинден – Юсуфнынъ огълу Игъал,

⁹ Эфраим къабилесинден – Нуннынъ огълу Хошеа,

¹⁰ Биньямин къабилесинден – Рафунынъ огълу Палтий,

¹¹ Зевулун къабилесинден – Содийнинъ огълу Гъаддиэл,

¹² Юсуф къабилесинден, Менашшеден – Сусийнинъ огълу Гъаддий,

¹³ Дан къабилесинден – Гемаллийнинъ огълу Аммиэл,

¹⁴ Ашер къабилесинден – Микъаэлнинъ огълу Сетур,

¹⁵ Нафталий къабилесинден – Вофсийнинъ огълу Нахбий,

¹⁶ Гъад къабилесинден – Макийнинъ огълу Геуэл.

¹⁷ Топракъны бакъмакъ ичюн Мусанынъ ёллагъан адамлары булар эди. Муса Нуннынъ огълу Хошеагъа Ехошуа адыны берди.

¹⁸ Муса оларны Ханаан топрагъыны бакъып чыкъмагъа ёллагъанынен, оларгъа бойле деди: – Негевге барып, дагълы топракъкъа чыкъынъыз.

¹⁹ Бу топракъны бакъынъыз. Топракъ насыл? Анда яшагъан халкъ насыл? Олар кучьлюми, зайыфмы, аз сайылымы, чокъ сайылымы?

²⁰ Халкъ яшагъан топракълары яхшымы, яманмы, яшагъан шеэрлери насыл? Чадырларда яшайлармы я да пекитильген ерлердеми?

²¹ Шу топракъ насыл? Берекетлими, ёкъмы? Анда тереклер осеми, ёкъмы? Джесюр олунъыз, о топракънынъ берекетинден алынъыз. (О вакъыт юзюм пишип башлагъан вакъты эди.)

²² Адамлар ёлгъа чыкъты ве, Цин сахрасындан башлап, Хамат янындаки Реховгъадже топракъны огренип чыкътылар.

²³ Негевге бардылар ве Хеврон шеэрине барып чыкътылар. Анда Анакъ эвлятлары Ахиман, Шешай ве Талмай яшай эдилер. Хеврон шеэри Мысырдаки Цоан шеэринден еди йыл огюне къурулгъан эди.

²⁴ Сонъ олар Эшкъол вадийине келип чыкътылар. Анда бир салкъым юзюми олгъан юзюм пытагъыны кесип алдылар да, адамлардан экиси шу пытакъны бир таякъта ташыдылар. Олар даа нар ве инджир алып кеттилер.

²⁵ Шу ерге Исраиль огъуллары «Эшкъол вадийи» адыны бердилер, чюнки анда бир салкъым юзюмни кесип алдылар.

²⁶ Къыркъ куньден сонъ, топракъны бакъып чыкъкъан сонъ, артларына къайттылар.

²⁷ Паран сахрасындаки Къадеш шеэрине, Мусанен Харунгъа ве Исраиль джемаатынынъ янына кельдилер. Оларгъа ве бутюн джемааткъа топракъ акъкъында хабер кетирдилер ве о топракънынъ мейваларыны косьтердилер.

²⁸ Мусагъа бойле дедилер: – Сен бизни ёллагъан топракъкъа бардыкъ. Анда керчектен де сютнен бал акъа, мына о топракънынъ мейвалары.

²⁹ Лякин о ерде яшагъан халкъ кучьлю, шеэрлери янына барылмаз ве пек буюктир. Анда биз Анакънынъ эвлятларыны корьдик.

³⁰ Амалеклилер Негев топрагъында яшайлар. Хитлилер, евуслылар ве аморлылар – дагълыкъ ерде, ханаанлылар денъизнинъ янында ве Иорданнынъ ялысында яшайлар.

³¹ Къалев Мусанынъ огюнде халкъны сустурып: – Келинъиз, бу топракъны басып алайыкъ! Биз буны шубесиз япып олурмыз, – деди.

³² Онен берабер баргъан акъайлар исе: – Биз бу халкъкъа къаршы чыкъып оламаймыз. Олар бизден кучьлю, – дедилер,

³³ Исраиль огъуллары арасында бакъып чыкъкъан топракълары акъкъында яман эмиш-демишлер джайраттылар: – Биз бакъып чыкъкъан топракъ – устюнде яшагъанларыны ашап битирген бир топракътыр. Биз анда корьген бутюн халкъ – пек узун бойлу адамлардыр.

³⁴ Анда биз нефиллерни, нефиллернинъ союндан олгъан Анакъ огъулларыны корьдик. Оларнынъ янында озьлеримизни чегертки киби дуя эдик, ве оларгъа ойле олып корюндик.