Сайылар 10 - Мукъаддес Китап

Кумюш боразанлар

¹ РАББИ Мусагъа бойле деди:

² – Озюнъе дёгюльген кумюштен эки боразанны яп. Джемаатны чагъыргъанда ве оларны ёлгъа чыкъаргъанда, боразанларны чал.

³ Олар экиси чалынгъанда, бутюн джемаат санъа, Корюшюв Чадырынынъ киришине топлансын.

⁴ Тек бири чалынгъанда, янынъа башлыкълар – Исраильнинъ бинъбашылары – топлансынлар.

⁵ Телюке сигналы чалынгъанда, шаркъ тарафында ерлешкен ордулар ёлгъа чыкъсынлар.

⁶ Экинджи кере телюке сигналы чалынгъанда, дженюп тарафында ерлешкен ордулар ёлгъа чыкъсынлар. Олар ёлгъа чыкъаяткъан вакъытта боразанда телюке сигналыны чалсынлар.

⁷ Джемаатны топламакъ керек вакътында боразанны чалынъыз, амма телюке сигналыны чалманъыз.

⁸ Боразанларны Харуннынъ огъуллары, руханийлер чалсынлар. Шу, сизлер ве эвлятларынъыз ичюн эбедий низамнаме олсун.

⁹ Сизге уджюм эткен душмангъа къаршы топрагъынъызда дженк этмек ичюн чыкъкъанда, боразанларда телюке сигналыны чалынъыз. О заман Алланъыз олгъан РАББИ сизни акъылгъа кетирир ве сизни душманларынъыздан къуртарыр.

¹⁰ Къуванчлы куньлеринъизде, бельгиленген байрамларынъызда, янъы ай догъгъан куньлеринде, бутюнлей якъыладжакъ къурбанларны ве аманлыкъ къурбанларыны чалып кетиргенинъизде, боразанлар чалынъыз, ве Алланъыз сизни акъылында тутаджакъ. Мен – Алланъыз олгъан РАББИдирим.

Исраиллилер юрюшининъ тертиби

¹¹ Экинджи йылнынъ экинджи айында, 20-нджи куню Шаатлыкъ Мескенининъ устюндеки булут котерильди.

¹² Исраиль огъуллары Синай сахрасындан озь ордуларынен ёлгъа чыкътылар. Булут Паран сахрасында токътады.

¹³ РАББИ Мусанен буюргъанына коре олар биринджи кере ёлгъа чыкътылар.

¹⁴ Биринджи Ехуда огъулларынынъ ордусы озь байрагъы тюбюнде болюклерине коре ёлгъа чыкъты. Амминадавнынъ огълу Нахшон оларнынъ орду башлыгъы эди.

¹⁵ Цуарнынъ огълу Нетанэл – Йиссакъар къабилесининъ орду башы,

¹⁶ Хелоннынъ огълу Элиав – Зевулун къабилесининъ орду башы.

¹⁷ Мескен къысымларгъа айырылды, ве Гершон огъуллары Мерарий огъулларынен берабер Мескенни ташып, ёлгъа чыкътылар.

¹⁸ Сонъ Рубен ордусы озь байрагъы тюбюнде болюклерине коре ёлгъа чыкъты. Шедеурнынъ огълу Элицур оларнынъ орду башлыгъы эди.

¹⁹ Цуришаддайнынъ огълу Шелумиэл – Шимеон къабилесининъ орду башы,

²⁰ Деуэлнинъ огълу Эльясаф – Гъад къабилесининъ орду башы.

²¹ Сонъ Кехат огъуллары Мукъаддес Ерни алып, ёлгъа чыкътылар. Олар кельмезден эвель, Мескен къоюлмакъ керек эди.

²² Сонъ Эфраим огъулларынынъ ордусы озь байрагъы тюбюнде болюклерине коре ёлгъа чыкъты. Аммихуднынъ огълу Элишама оларнынъ орду башлыгъы эди.

²³ Педацурнынъ огълу Гъамалиэл – Менашше къабилесининъ орду башы,

²⁴ Гидонийнинъ огълу Авидан – Биньямин къабилесининъ орду башы.

²⁵ Эписи ордулардан сонъ Дан огъулларынынъ ордусы озь байрагъы тюбюнде болюклерине коре ёлгъа чыкъты. Аммишаддайнынъ огълу Ахиэзер оларнынъ орду башлыгъы эди.

²⁶ Окъраннынъ огълу Пагиэл – Ашер къабилесининъ орду башы,

²⁷ Энаннынъ огълу Ахира – Нафталий къабилесининъ орду башы.

²⁸ Будыр Исраиль огъулларынынъ ордуларына коре юрюшининъ тертиби. Бойле этип, олар ёлгъа чыкътылар.

²⁹ Муса мидьянлы Реуэлнинъ огълу Ховавгъа (Реуэл Мусанынъ къайнатасы эди) бойле деди: – РАББИ бизге бермеге сёз берген ерге ёлгъа чыкъамыз. Бизнен юр, санъа бизнен яхшы олур. РАББИ Исраильге яхшылыкъ япаджагъына сёз берди.

³⁰ Ховав исе бойле джевап къайтарды: – Ёкъ, бармайджагъым. Мен озь топрагъыма ве озь сой-сопларыма къайтаджагъым.

³¹ – Ялварам, бизни ташлама, – деди Муса. – Сахрада ордунен ерлешеджек ерлеримизни билесинъ. Бизге ёлны косьтереджексинъ.

³² Эгер сен бизнен барсанъ, РАББИнинъ бизге япаджакъ яхшылыгъыны биз санъа япармыз.

Исраиль халкъынынъ ёлгъа чыкъувы

³³ Сонъ, ерлешеджек ерни сайламакъ ичюн, олар РАББИнинъ дагъындан учь куньлюк ёлгъа чыкътылар. РАББИнинъ Васиет Сандыгъы учь кунь девамында оглеринде кете эди.

³⁴ Олар ордудан ёлгъа чыкъкъанда, куньдюз оларнынъ устьлеринде РАББИнинъ булуты тура эди.

³⁵ Ёлгъа чыкъып, Сандыкъны котергенлерде, Муса бойле дей эди: «Я РАББИ, тур! Душманларынъ дагъылсын, Сени кореджек козю олмагъанлар огюнъден къачсын!»

³⁶ Токътап, Сандыкъны ерлештиргенлерде, Муса бойле дей эди: «Я РАББИ, Исраильнинъ бинълерине ве он бинълерине къайт!»