Рут акъкъында китап 3 - Мукъаддес Китап

Рут озюне бир коше тапа

¹ Бир кунь Рутнынъ къайнанасы Ноомий онъа: – Къызым, алынъ яхшы олсун деп, сени раат этеджек бир коше къыдырмакъ кереким.

² Мына Боаз сойларымыздандыр. Сен онынъ хызметчи къызларынен берабер эдинъ. О, бу акъшам арманда арпа савураджакъ.

³ Ювун, ягънен ягълан, энъ гузель урбаларынъны кийип, армангъа кет. Лякин Боаз ашамагъа-ичмеге битирмегендже, козюне корюнме.

⁴ О юкъламагъа яткъанда исе, яткъан ерини биль де, сонъ анда кир, аякъларыны къапаткъан орьтюни ачып, анда ят. О санъа не япмакъ кереклигини айтар, – деди.

⁵ – Бутюн айткъанларынъны япарым, – деди Рут.

⁶ Сонъ армангъа барып, къайнанасынынъ бутюн айткъанларыны япты.

⁷ Боаз ашап-ичти, кейфи ерине кельди. Сонъ ашлыкъ обасы янына барып ятты. Рут явашчыкътан келип, аякълары тарафындан орьтюни ачып ятты.

⁸ Яры геджеде акъай абдырады, айланып бакъса, аякъларынынъ янында къадын ята.

⁹ Ондан: – Сен кимсинъ? – деп сорады. – Мен къулунъ, Рутым, – деди. – Меним къорчалайыджым олып, мени сенинъ эвинъе ал, чюнки сен меним ичюн джевапкяр догъмушсынъ.

¹⁰ Боаз: – РАББИ сенден разы олсун, къызым, – деди. – Бу сенинъ сонъки эйи ишинъ эвелькисинден даа да яхшы. Чюнки не фукъаре, не зенгин яш огъланларны къыдырмагъа кетмединъ.

¹¹ Шимди къоркъма, къызым, эр айткъанынъны беджеририм. Бутюн шеэрнинъ буюк халкъы сен пек яхшы бир къадын олгъанынъны биле.

¹² Акъикъатен де, мен джевапкяр догъмушынъ олгъаным догърудыр, лякин менден де якъын догъмушынъ бар.

¹³ Геджени мында кечир. Ярын исе, о санъа аркъа олмагъа истесе, аркъа олсун, эгер санъа аркъа олмагъа истемесе, РАББИнен ант этем, мен санъа аркъа олурым! Сен сабагъа къадар ят.

¹⁴ Рут сабагъадже онынъ аякъларынынъ янында ятты. Амма саба даа ачылмайып, адамларнынъ бетлерини бири-биринден айырмагъа даа мумкюн олмагъанда, турды. Боаз: – Армангъа къадын кельгенини кимсе бильмесин, – деди.

¹⁵ Боаз Руткъа: – Япынджанъны чыкъар ве ачып тут, – деди. Рут япынджасыны тутты, Боаз ичине алты ольчю арпа къойды ве онынъ сыртына юкледи. Сонъ шеэрге кетти.

¹⁶ Рут къайнанасына къайтты. Къайнанасы ондан: – Сонъ, къызым, насыл кечти? – деп сорады. Рут Боазнынъ онъа япкъан эр шейини айтып берди

¹⁷ ве: – О, манъа бу алты ольчю арпаны берди ве: «Къайнананъа бош къолнен къайтма», – деди, – деп къошты.

¹⁸ Ноомий: – Ишнинъ сонъу не оладжагъыны бильмегендже, беклеп тур, къызым, – деди. – Бу адам, ишни сонъуна бугунь чыкъармагъандже, раат олмаз.