Рут акъкъында китап 2 - Мукъаддес Китап

Рут Боазнынъ тарласында

¹ Ноомийнинъ акъайы тарафындан, Элимелекнинъ союндан буюк бир догъмушы бар эди. Онынъ ады Боаз эди.

² Моавлы Рут Ноомийге: – Тарлагъа барайым ве кимнинъ козюнде мерамет тапсам, онынъ артындан башакъларны джыяйым, – деди. – Бар, къызым, – деди онъа Ноомий.

³ Рут барды ве тарлаларда оракъчыларнынъ артындан башакъ джыймагъа башлады. Бойле олды ки, о тарланынъ къысмы Элимелекнинъ союндан олгъан Боазнынъки эди.

⁴ Бу арада Вифлеемден кельген Боаз оракъчыларгъа: – РАББИ къолай кетирсин! – деди. Олар да онъа: – РАББИ сенден разы олсун, – деп джевап къайтардылар.

⁵ Сонъ Боаз оракъчыларнынъ башында олгъан яш хызметчисинден: – Бу яш къадын кимнинъкидир? – деп сорады. Оракъчыларнынъ башында олгъан яш хызметчи джевап берип:

⁶ – Бу яш къадын – моавлыдыр. О, Ноомийнен берабер Моав чёллеринден кельди.

⁷ «Мумкюн олса, оракъчыларнынъ артындан кетип, деметлернинъ арасындан къалгъаныны джыйып топлайым», – деди. Сабадан берли шимдиге къадар тарлада чалыша, тек эвинде бираз раатланды, – деди.

⁸ Боаз Руткъа: – Динъле, къызым. Башакъ джыймагъа башкъа тарлагъа барма, мындан кетме. Мында, меним хызметчи къызларымнен берабер къал.

⁹ Козюнъ оракъчылар оргъан тарлада олсун, артларындан кет. Хызметчилериме санъа илишмемеге буюрдым. Сувсагъанынъда, хызметчилерим алгъан савутлардан сен де барып, ал да ич, – деди.

¹⁰ Рут эгилип, бетинен ерге тийди ве ондан: – Не япып козюнъде мерамет таптым да, сен, мен ябанджы олсам да, манъа яхшы бакъасынъ? – деп сорады.

¹¹ Боаз джевап берип: – Акъайынъ ольген сонъ къайнананъ ичюн бутюн япкъанларынъ акъкъында хаберим бар. Ананъны, бабанъны, ветанынъны ташлап, не тюневин, не де обирскунь бильмеген халкънынъ арасына кельдинъ.

¹² Бу япкъанларынъ ичюн санъа РАББИден къайтсын, ве Исраильнинъ Алласы РАББИден санъа бол мукяфат олсун, чюнки сен Онынъ къанатлары тюбюнде сакъланмакъ ичюн кельгенсинъ! – деди.

¹³ – Козюнъде мерамет къазанайым, эфендим! Хызметчи къызларынъа тенъ кельмесем де, сен меним гонълюмни алдынъ ве къулунънынъ юрегине яткъан гузель шейлерни айттынъ, – деди Рут.

¹⁴ – Уйлелик вакъты кельди, – деди онъа Боаз. – Мында кель, отьмек ал, экши шарапкъа батырып аша. Рут оракъчыларнынъ янына отурды. Боаз онъа къавурылгъан богъдай данелерини узатты, о, ашап тойды, ве даа аш къалды.

¹⁵ Сонъ Рут башакълар джыймакъ ичюн турды, Боаз яш хызметчилерине: – Деметлер арасында да башакъ джыйсын, джаныны агъыртманъыз.

¹⁶ Деметлерден башакъларны да айырып, ерге ташланъ да, джыйсын. Сакъын, оны сёгменъиз, – деп буюрды.

¹⁷ Бойледже, Рут акъшамгъадже тарлада башакъ джыйды. Джыйылгъанны чеккен сонъ, ярым чувал арпа чыкъты.

¹⁸ Буны алып, шеэрге кетти, къайнанасы онынъ не къадар джыйгъаныны корьди. Рут къойнундан аштан къалгъаныны чыкъарып къайнанасына берди.

¹⁹ Къайнанасы ондан: – Сен бугунь къаерде башакъ джыйдынъ, къаерде чалыштынъ? – деп сорады. – Санъа о къадар ярдым эткен адамдан Алла разы олсун! Рут къайнанасына кимде чалышкъаныны айтып берди ве: – Мен бугунь чалышкъан адамнынъ ады Боаз, – деп къошты.

²⁰ – РАББИ ондан разы олсун, чюнки о сагъларгъа да, олюлерге де мерамет косьтерди, – деди Ноомий келинине. Сонъ Ноомий даа къошты: – Бу адам бизим якъынымыз, бизим ичюн джевапкяр догъмушлардан биридир.

²¹ Моавлы Рут даа буны айтты: – О манъа атта бойле деди: «Оракъ вакъты битмегендже, меним хызметчи къызларымнен къал».

²² – Къызым, сен онынъ хызметчи къызларынен юрсенъ ве башкъа тарлада кимсе санъа илишмесе, яхшы олур, – деди Ноомий озь келинине Руткъа.

²³ Бойледже, Рут Боазнынъ хызметчи къызларынен къалды ве арпа ве богъдайнынъ оракъ вакъты битмегендже, башакъ джыйып юрди. О вакъыт къайнанасында яшай эди.