Микъа 5 - Мукъаддес Китап

¹ Шимди исе, ордуларнынъ шеэри, ордуларынъны котер! Бизни алкъагъа алдылар; Исраиль ёлбашчысынынъ янагъына падиша таягъынен ураджакълар.

Месихнинъ келеджеги акъкъында ваде

² Сен де, Вифлеем-Эфрата, Ехуданынъ баш шеэрлери арасында кичик олсанъ да, сенден Мен ичюн Исраильнинъ Башлыгъы чыкъаджакъ. Онынъ тамырлары заманларнынъ башындан, эбедийликтен келип чыкъа.

³ Агъыраякълы къадын огъул тапмагъандже, РАББИ Исраильни къалдыраджакъ. О вакъыт исраиллилернинъ къалгъан къардашлары оларгъа къайтып келеджек.

⁴ О, келип, РАББИнинъ кучюнен, Алласынынъ, РАББИнинъ шуретли Адынен халкъына чобанлыкъ япаджакъ, олар тынчлыкъ ичинде яшайджакълар, Онынъ буюклиги дюньянынъ четлерине етеджек.

Якъуп эвлятларындан къалгъанлар

⁵ О, оларгъа аманлыкъ чокърагъы оладжакъ. Ашшур мемлекетимизге басып кельгенде ве сарайларымызгъа киргенде, биз оларгъа къаршы еди башлыкъны, секиз ёлбашчыны биле чыкъараджакъмыз.

⁶ Олар Ашшур топрагъыны, Нимроднынъ ачыкъ ерлерини къылычнен чобанлыкъ япаджакъ. Ашшурнынъ аскерлери бизим топрагъымызгъа басып кельгенде, сынъырларымызны бозгъанда, О, бизни Ашшурдан къуртараджакъ.

⁷ Якъупнынъ сагъ къалгъан огъуллары бир чокъ халкъларнынъ арасында РАББИ ёллагъан чыкъ киби, отларгъа ягъгъан ягъмур киби оладжакъ. Олар ич бир адамгъа таянмаз, ич кимсени беклемез.

⁸ Якъупнынъ къалгъан огъуллары халкъларнынъ арасында, чокъ миллетлернинъ арасында кийик айванларнынъ арасында арслан киби оладжакъ, къой сюрюсинде яш арслан киби оладжакъ. О, атыладжакъ, таптайджакъ ве парчалайджакъ, къуртулмагъа имкян къалдырмайджакъ.

⁹ Сенинъ къолунъ душмаларынъа къаршы котериледжек, ве бутюн душманларынъ ёкъ этиледжек.

¹⁰ РАББИ бойле дей: – Шу куню атларынъны ёкъ этеджегим, дженк арабаларынъны бозаджагъым.

¹¹ Мемлекетинъдеки шеэрлеринъни бербат этеджегим, эписи пекитильген ерлеринъни йыкъаджагъым.

¹² Сенинъ ырымджылыкъ кучюнъни тартып аладжагъым, булутлардан фал бакъкъанлар къалмайджакъ.

¹³ Мен сенинъ путларынъны, сен табынгъан таш путларынъны къырып ташлайджагъым. Бир даа къолларынънен япылгъан путларгъа табынмайджакъсынъ.

¹⁴ Ашера путуна табынма диреклеринъни ёкъ этеджегим, шеэрлеринъни бозаджагъым.

¹⁵ Мени динълемеген миллетлерни ачувланып гъазапнен джезалайджагъым.