Левийлилер 25 - Мукъаддес Китап

Раатлыкъ йылы акъкъында

¹ РАББИ Мусагъа Синай дагъында бойле деди:

² – Исраиль огъулларына бойле айт: Мен сизге береджек топракъкъа киргенинъизде, топракъкъа РАББИ ичюн раатлыкъ вакътыны беринъиз.

³ Алты йыл тарлаларынъызда урлукъ сачынъыз, юзюм багъларынъызны пытанъыз ве берекетини джыйынъыз.

⁴ Лякин единджи йылы топракънынъ раатлыкъ вакъты, РАББИ ичюн раатлыкъ вакъты олсун. Тарланъызда урлукъ сачманъыз, юзюм багъынъызны пытаманъыз.

⁵ Тарланъызда озю-озюнден осип чыкъкъанны джыйманъыз, пыталмагъан пытакълардан салкъымларны узип алманъыз. О йыл топракъ ичюн раатлыкъ йылы олсун.

⁶ Топракънынъ раатлыкъ вакътында оськен шейлер сиз ичюн аш олсун: эм сизге, эм къулларынъызгъа, эм ыргъатларынъызгъа, эм сизде вакътынджа яшагъан адамларгъа.

⁷ Топракънынъ бутюн берекети эм сизинъ эв айванларынъызгъа, эм кийик айванларгъа аш олсун.

Юбилей йылы акъкъында

⁸ Еди раатлыкъ йыл сайынъыз. Еди кере еди йыл бекленъиз, эписи олып 49 йылдыр.

⁹ Сонъра, единджи айнынъ онунджы куню бору чалынъыз. Одеме Куню бутюн мемлекетинъизде борулар чалынъыз.

¹⁰ 50-нджи йылыны азиз этинъиз ве топрагъынъызда эписи яшагъанларгъа азатлыкъны беринъиз. О йыл сиз ичюн юбилей йылы олсун. Эр биринъиз озь топракъ пайына ве озь союна къайтынъыз.

¹¹ 50-нджи йыл сизде юбилей йылы олсун. Ич бир шей сачманъыз ве озю-озюнден оськен берекетни джыйманъыз, пыталмагъан юзюмнинъ салкъымларыны джыйманъыз.

¹² Бу – юбилейдир. Сиз ичюн о, азиз олсун. Тарлада озю-озюнден оськен берекетни ашанъыз.

¹³ Бу юбилей йылында эпинъиз озь топракъ пайларынъызгъа къайтынъыз.

¹⁴ Башкъа адамгъа бир шей саткъанда я да сатын алгъанда, бири-биринъизнинъ джаныны агъыртманъыз.

¹⁵ Юбилей йылындан сонъ кечкен йылларнынъ сайысына коре сатын ал, агъа-къардашынъ санъа келир йылларынынъ сайысына коре сатсын.

¹⁶ Йылларнынъ сайысы чокъ олса, фиятыны арттыр, аз олса, фиятыны эксильт. О санъа белли олгъан йыллыкъ берекетини сата.

¹⁷ Бири-биринъизнинъ джанларынъызны агъыртманъыз. Алланъыздан къоркъунъыз. Мен – РАББИм, сизинъ Алланъыз.

¹⁸ Низамнамелеримни беджеринъиз, къарарларымны тутунъыз ве беджеринъиз. Бойле этсенъиз, топрагъынъызда раат яшайджакъсынъыз.

¹⁹ Топракъ берекет береджек, сиз ашап тояджакъсынъыз ве бу топракъта раат яшайджакъсынъыз.

²⁰ «Эгер биз единджи йылы богъдай сачмасакъ, берекетини джыймасакъ, нени ашайджакъмыз?» – деп сорамакъ мумкюнсиз.

²¹ Алтынджы йылы Мен сизге ойле берекет берерим ки, топракъ учь йыллыкъ махсулыны догъар.

²² Секизинджи йылы урлукъларны сачаджакъсынъыз, амма къалгъан берекетни докъузынджы йылгъа къадар ашайджакъсыз. Докъузынджы йылнынъ берекети догъмагъандже, къалгъан берекетинъизни ашайджакъсыз.

Мульк акъларынынъ гъайрыдан тикленмеси

²³ Топракъны даимий оларакъ сатманъыз. Топракъ Менимкидир, сиз исе Менде яшагъан кельмешексинъиз.

²⁴ Бутюн топракъ пайларынъызда топракъны къайтарып сатын алмагъа разылыкъ беринъиз.

²⁵ Агъа-къардашларынъыздан бири фукъаре олып, топрагъынынъ бир пайыны сатса, якъын сою келип, онынъ саткъаныны къайтарып сатын алсын.

²⁶ Топрагъыны сатын аладжакъ якъын сою олмаса, амма сонъундан аякъкъа турып, етерли акъча тапса,

²⁷ саткъанындан сонъ кечкен йылларны сайсын ве къалгъан акъчаны саткъан адамгъа берип, топрагъыны озюне къайтарсын.

²⁸ Амма топрагъыны къайтармакъ ичюн акъчаны тапамаса, топракъ юбилей йылына къадар оны сатын алгъан адамда къалсын. Юбилей йылында исе топракъ онъа къайтсын, ве саткъан адам озь топрагъына саип олсун.

²⁹ Диварнен къоралангъан шеэрде бир адам озь эвини сатса, эвини саткъан сонъ бир йыл кечмезден эвель, эвини къайтарып сатын алмагъа мумкюн. Бир йылнынъ ичинде оны къайтарып сатын алмагъа мумкюн.

³⁰ Эгер бир йылнынъ сонъуна къадар диварнен къоралангъан шеэрдеки эвни къайтармагъа чаре тапамаса, эв эр вакъыткъа, онынъ несиллери боюнджа сатын алгъан адамгъа кечсин. Юбилей йылында шу эв янъы саибининъ къолундан алынмасын.

³¹ Амма къораланмагъан койлердеки эвлер тарлаларгъа тенъ бакъылсын. Оларны къайтарып сатын алмагъа мумкюн. Юбилей йылында эвни саткъан адам оны къайтарып алсын.

³² Левийлилернинъ шеэрлеринде озьлерининъ шеэрлериндеки эвлерини левийлилер эр заман къайтарып сатын алмагъа мумкюн.

³³ Эгер бир левийли озь эвини къайтарып сатын аламаса, юбилей йылында левийлилернинъ шеэрлеринде сатылгъан эв озь саибине къайтсын. Левийлилернинъ шеэрлеринде олгъан эвлер – Исраиль огъулларынынъ арасында оларнынъ пайларыдыр.

³⁴ Оларнынъ шеэрлерининъ чевресинде олгъан тарларар сатылмаз, олар – левийлилернинъ эбедий пайларыдыр.

Фукъарелешкен адамлар ве къуллар акъкъында

³⁵ Агъа-къардашларынъ фукъарелешсе ве сенинъ янынъда олып, озюнинъ тамагъыны бакъып оламаса, онъа ярдым эт, ве о, кельмешек я да аранъызда яшамакъ ичюн ерлешкен адам олса олсун, яшамакъ ичюн сенде къалсын.

³⁶ Ондан фаиз ве кяр алма. Алланъдан къоркъ, агъа-къардашынъ янынъда яшасын.

³⁷ Онъа кумюш бергенде, фаиз алма, отьмегинъни саткъанда, кяр къыдырма.

³⁸ Мен – РАББИм, сизинъ Алланъыз. Мен сизни Мысыр топрагъындан алып чыкъардым, Ханаан топрагъыны сизге бермеге ве Алланъыз олмагъа истедим.

³⁹ Аранъызда яшагъан бир агъа-къардашынъ фукъарелешсе ве озюни санъа къуллукъкъа сатса, оны къул киби чалыштырма.

⁴⁰ О, сенинъ янынъда ыргъат я да вакътынджа яшагъан адам киби олсун. Юбилей йылына къадар о, янынъда чалышсын.

⁴¹ О вакъыт исе балаларынен берабер янынъдан кетсин ве озь союна, деделерининъ топрагъы пайына къайтсын.

⁴² Олар – Меним къулларым. Мен оларны Мысыр топрагъындан алып чыкъардым, шунынъ ичюн оларны къул киби сатмагъа олмаз.

⁴³ Оларгъа шефкъатсызлыкънен эфендилик этме, Алланъдан къоркъ.

⁴⁴ Озюнъе къул ве къулкъа къалдыраджакъ олсанъ, къулларны чевренъизде яшагъан халкълардан сатын алынъыз.

⁴⁵ Ондан гъайры аранъызда яшамакъ ичюн ерлешкен адамларнынъ балаларыны я да сизде ерлешкен сойларнынъ топрагъынъызда догъургъан балаларыны сатын алып, оларгъа саип олмакъ мумкюнсинъиз.

⁴⁶ Оларны огъулларынъызгъа мульк оларакъ мирас этип къалдырмакъ мумкюнсинъиз. Къул киби тутып, оларгъа эбедий саип олмакъ мумкюнсинъиз. Лякин агъа-къардашларынъызгъа, Исраиль огъулларына, бири-биринъизге шефкъатсызлыкънен эфендилик этменъиз.

⁴⁷ Эгер кельмешек я да аранъызда вакътынджа яшагъан адам бай олып, къардашынъ исе фукъарелешип, сенде ерлешкен кельмешекке я да онынъ союндан олгъан биревге озюни сатса,

⁴⁸ сатылгъанындан сонъ оны къайтарып сатын алмагъа мумкюн. Онынъ агъа-къардашларындан бири оны къайтарып сатын алмагъа мумкюн.

⁴⁹ Эм онынъ эмджеси, эм эмджесининъ огълу, эм онынъ союндан бир догъмуш оны къайтарып сатын алмагъа мумкюн. Я да о озю бай олса, озюни къайтарып сатын алсын.

⁵⁰ О, оны сатын алгъан адамнен эсаплашмакъ керек. Озюни саткъан йылдан башлап, юбилей йылына къадар кечкен йылларына коре эсаплашсын. О, озю ичюн алгъан кумюшни йылларнынъ сайысына коре къайтарсын, онынъ ыргъаты киби сайылсын.

⁵¹ Эгер йылларнынъ сайысы даа чокъ къалса, озюни къайтарып сатын алмакъ ичюн, шу сайысына коре озь кумюш фиятыны къайтарсын.

⁵² Эгер юбилей йылына аз йыл къалса, оларны сайсын ве озюни къайтарып сатын алмакъ ичюн фиятыны шу сайысына коре тёлесин.

⁵³ Эписи йыллар девамында о, эфендисининъ ыргъаты киби олсун. Эфендисине онъа шефкъатсызлыкънен эфендилик этмеге ёл берменъиз.

⁵⁴ Эгер бу адам бойле этип, озюни къайтарып сатын алмаса, юбилей йылында балаларынен берабер азат оладжакъ.

⁵⁵ Исраиль огъуллары – Меним къулларым. Мен оларны Мысыр топрагъындан чыкъардым. Мен – РАББИм, сизинъ Алланъыз.