Левийлилер 22 - Мукъаддес Китап

Къурбанларнынъ азизлиги

¹ РАББИ Мусагъа бойле деди:

² – Харунгъа ве онынъ огъулларына буны айт: Олар Исраиль огъулларынынъ азиз къурбанларына мукъайт олсунлар. Исраиллилер буларны Манъа багъышлайлар, шунынъ ичюн Меним азиз Адыма урьметнен янашсынлар. Мен – РАББИм. Оларгъа бойле айт:

³ Бутюн келеджек несиллеринъизде эр бир эвлядынъыз Исраиль огъулларынынъ РАББИге багъышлагъан азиз къурбанларына якъынлашса, озю исе арам олса, Мен оны корьмейим деп, оны ёкъ этмек керек. Мен – РАББИм.

⁴ Харуннынъ эвлятларындан бир адамнынъ тери хасталыгъы, я да акъувы олса, о, эляллангъандже азиз къурбанлардан ашамасын. Олюге тийген ве арам олгъан шейге токъунгъан адам, урлугъы акъкъан адам,

⁵ адамны арамлайджакъ насылдыр махлюкъкъа токъунгъан адам, эр бир арамлыгъы олгъан кишиге токъунгъан адам

⁶ акъшамгъадже арам оладжакъ. О, азиз къурбанларны ашамасын, беденини сувнен ювсун.

⁷ Кунь баткъан сонъ ве о, эляллангъан сонъ, о, азизликлерни ашамагъа мумкюн. Шу – онынъ ашыдыр.

⁸ Олюнинъ я да айванларнен парчалангъан айванларнынъ этини ашамасын. Ёкъса о, арам оладжакъ. Мен – РАББИм.

⁹ Руханийлер къарарларымны беджерсинлер. Эгер олар сёзлеримни бозсалар, озь башларына гуна къазанаджакълар ве оледжеклер. Мен – РАББИм. Мен оларны азиз эттим.

¹⁰ Ич бир чет адам азиз къурбанларны ашамасын. Не руханийнинъ эвинде вакътынджа яшагъан адам, не руханийнинъ ыргъаты азиз къурбанлардан ашамасын.

¹¹ Эгер руханий адамны кумюшке сатын алгъан олса, о адамгъа шуны ашамагъа мумкюн. Руханийнинъ эвинде догъулгъанларгъа да бу ашны ашамагъа мумкюн.

¹² Руханийнинъ къызы руханий олмагъан огълангъа акъайгъа чыкъса, о, азиз бахшышлардан ашамасын.

¹³ Руханийнинъ къызы тул апай олгъанда я да акъайындан айырылгъанда ве онынъ балалары олмагъанда, о, озь яшлыгъы эвине, бабасынынъ эвине къайтса, о заман бабасынынъ отьмегини ашамагъа мумкюн. Ич бир тыш адам оны ашамасын.

¹⁴ Бир адам бильмейип, азиз къурбандан бир шей ашагъанда, руханийге башкъа азиз къурбанны къайтарсын ве янына беш пайда бир пайыны къошсун.

¹⁵ Руханийлер исраиллилернинъ РАББИге кетирген азиз къурбанларыны урьмет этсинлер.

¹⁶ Ёкъса, азиз къурбанларны ашагъанда, олар къабаатлы оладжакълар. Мен – РАББИм, Мен къурбанларны азиз эттим.

¹⁷ РАББИ Мусагъа бойле деди:

¹⁸ – Харунгъа, онынъ огъулларына ве бутюн Исраиль огъулларына бойле айт: Исраиллилерден я да араларында яшамакъ ичюн ерлешкен кельмешеклерден бир кимсе насылдыр адагъы я да истегине коре РАББИге бутюнлей якъыладжакъ къурбанны кетиргенде,

¹⁹ къурбаны къабул этильмек ичюн, бутюнлей къусурсыз тувардан, къойлардан я да эчкилерден олмакъ керек.

²⁰ Къусуры олгъан айванны кетирменъиз, чюнки о, сиз ичюн къабул этильмез.

²¹ Адагъы я да истегине коре РАББИге аманлыкъ къурбаныны кетиргенде, эр бир адам айванны тувардан я да къой-эчкилерден кетирсин. Къабул олунмакъ ичюн, айван къусурсыз олсун. Айваннынъ бир тюрлю беден эксиклиги олмасын.

²² Кёр, аягъы сындырылгъан, сакъат, хаста, ярасы иринли олгъан я да мараз бурьтюк тёкюлюви олгъан айванны РАББИге кетирменъиз, оларны РАББИге къурбан еринде якъыладжакъ къурбанлар оларакъ берменъиз.

²³ Бузав я да къозунынъ мучелери зияде узун я да зияде къыскъа олса, бойле айванны озь истегинен кетирильген къурбан оларакъ кетирмек мумкюн. Лякин адакъ къурбаны оларакъ о, къабул олунмаз.

²⁴ Йымырталары эзильген, зарарлангъан, узюльген я да кесильген айванны РАББИге къурбан оларакъ кетирменъиз. Топрагъынъызда буны япманъыз.

²⁵ Ябанджыларгъа да бойле айванларны Алланъызгъа къурбанлыкъ ашы оларакъ кетирмеге ёл берменъиз. Оларнынъ эксиклиги бар, ве, къусурлы олгъанлары ичюн, олар сизден къабул олунмаз.

²⁶ РАББИ Мусагъа бойле деди:

²⁷ – Бузав, къозу я да улакъ догъгъан сонъ, еди кунь девамында анасы янында олсун. Секизинджи кунюнден сонъ РАББИге атеште якъыладжакъ къурбан оларакъ кетирильмеге ярайджакъ ве къабул олунаджакъ.

²⁸ Лякин не бузавны, не де къозуны анасынен берабер бир куньде сойманъыз.

²⁹ РАББИге шукюр къурбанынъызны кетиргенде, оны ойле чалынъыз ки, къабул олунсын.

³⁰ Этини шу куню ашап битиринъиз, сабагъа къалдырманъыз. Мен – РАББИм.

³¹ Эмирлеримни тутунъыз, оларны беджеринъиз. Мен – РАББИм.

³² Меним азиз Адыма урьметсизлик этменъиз. Сонъ Меним азизлигим Исраиль огъулларынынъ арасында булуныр. Мен – РАББИм, сизни азиз этем.

³³ Сизинъ Алланъыз олмакъ ичюн, Мен сизни Мысыр топрагъындан алып чыкъардым. Мен – РАББИм.