Левийлилер 21 - Мукъаддес Китап

Руханийлерге берильген эмирлер

¹ РАББИ Мусагъа бойле деди: – Харуннынъ огъулларына, руханийлерге бойле айт: Халкъындан олгъан ич бири ольген адамгъа токъунмасын ве озьлерини арамламасын.

² Ялынъыз якъын союна, ана-бабасына, огълу я да къызына, агъа-къардашына

³ я да янында яшагъан, акъайгъа чыкъмагъан къызкъардашына токъунмагъа ве бойле этип, озюни арамламагъа мумкюн.

⁴ Олар халкънынъ ёлбашчылары олып, озьлерини арамлап, азизликлерини джоймагъа акълары ёкъ.

⁵ Руханийлер башларыны тыраш этмесинлер, сакъалларынынъ уджларыны кесмесинлер, беденлерини аселет яраламасынлар.

⁶ Олар озь Алласы огюнде азиз олмакъ керек, Алланынъ Адына адий адгъа киби янашмасынлар. Олар РАББИнинъ атеште якъыладжакъ къурбанларыны, Алласынынъ ашыны кетиргенлери ичюн, азиз олмакъ кереклер.

⁷ Руханий ороспулыкънен арамлангъан апайгъа, я да акъайындан айырылышкъан апайгъа эвленмесин. Руханий Алласынынъ огюнде азиз олмакъ керек.

⁸ Оны азиз корюнъиз, чюнки о, сизинъ Алланъызнынъ ашыны кетире. Руханий сиз ичюн азиз олсун, чюнки Мен, сизни азиз эткен РАББИ, азизим.

⁹ Руханийнинъ къызы ороспулыкъ этип, арамлангъанда, озь бабасыны да арамлар. Оны якъмакъ керек.

¹⁰ Баш руханий агъа-къардашларынынъ бири олсун, сачларыны дагъытмасын ве урбаларыны йыртмасын. О, башына ягълав ягъыны сюртюльген ве мукъаддес урбаларны киймеге багъышлангъан адам олсун.

¹¹ О, ич бир олюнинъ янына якъынлашмасын. Ольген ана-бабасына биле токъунмасын ве озюни арамламасын.

¹² О, Азиз Ерден чыкъмасын ве Алланынъ Азиз Ерининъ азизлигини бозмасын, чюнки о, Алланынъ ягълав ягъы ярдымынен азиз этильген эди. Мен – РАББИм.

¹³ Баш руханий акъай корьмеген къызгъа эвленмек керек.

¹⁴ Тул апайгъа, акъайындан айырылышкъан апайгъа, намусына токъунгъан апайгъа я да ороспу апайгъа эвленмесин. Ялынъыз озь халкъындан олгъан, акъай корьмеген къызгъа эвленсин.

¹⁵ Халкъы арасында о, озь эвлятларынынъ азизлигини бозмасын. Мен – РАББИм, Мен Оны азиз эттим.

¹⁶ РАББИ Мусагъа бойле деди:

¹⁷ – Харунгъа бойле анълат: Сенинъ келеджек эвлятларынъдан къусуры олгъан ич бир адам Аллагъа къурбанлыкъ ашыны кетирмеге якъынлашмасын.

¹⁸ Къусуры олгъан адам къурбан кетирмесин: не кёр, не топал, не бешаретли, не де сакъат,

¹⁹ не аягъы я да къолу къырылгъан,

²⁰ не къамбыр, не карлик, не козюнде акъы олгъан, не иринлеген ярасы олгъан, не мараз бурьтюк тёкюлюви олгъан, не де йымырталары зарарлангъан адам.

²¹ Руханий Харуннынъ эвлятларындан олгъан къусурлы ич бириси бутюнлей якъыладжакъ къурбанларны РАББИге кетирмеге якъынлашмасын. Беден эксиклиги олгъаны ичюн, о, къурбанлыкъ ашыны Аллагъа кетирмеге якъынлашмасын.

²² Азизликлерден ве энъ буюк азизликлерден олгъан Алланынъ къурбанлыкъ ашыны о, ашамакъ мумкюн.

²³ Лякин, беден эксиклиги олгъаны ичюн, пердеге кельмесин ве къурбан ерине якъынлашмасын, Азиз Ернинъ азизлигини бозмасын. Мен – РАББИм, Мен оларны азиз эттим.

²⁴ Муса буны Харунгъа, онынъ огъулларына ве эписи исраиллилерге айтты.