Левийлилер 13 - Мукъаддес Китап

Тери хасталыгъы олгъан адамлар акъкъында

¹ РАББИ Мусагъа ве Харунгъа бойле деди:

² – Биревнинъ терисинде шишик, къабукълы яра я да насылдыр парлакъ леке пейда олгъанда ве о, тери хасталыгъына ошагъанда, оны Харун руханийге я да руханий олгъан огъулларындан бирине алып кельмек керек.

³ Руханий терисиндеки хасталыкъкъа бакъсын. Эгер хаста ериндеки сачлар агъаргъан, эм де хаста ери терининъ ичине терен кирип кеткен олса, бу – кечиджи тери хасталыгъыдыр. Хастаны бакъкъан руханий оны арам илян этсин.

⁴ Эгер хастанынъ терисинде олгъан леке агъаргъан, лякин терининъ ичине терен кирип кетмеген олса, хаста ериндеки сачлар да агъармагъан олса, руханий хаста адамны еди куньге башкъа адамлардан айырсын.

⁵ Единджи куню руханий хастаны бакъсын. Эгер хаста ери олгъаны киби къалса ве териси бою даркъалмаса, руханий хастаны даа еди куньге башкъа адамлардан айырсын.

⁶ Единджи куню руханий кене хастаны бакъсын. Эгер хаста ери уфакълашса ве териси бою даркъалмаса, руханий адамны темиз илян этсин. Бу – адий бурьтюк тёкюлюви. Хаста озь урбаларыны ювсун ве темиз сайылсын.

⁷ Эгер хаста адам руханийге келип темизленген сонъ, бурьтюк тёкюлюви териси бою даркъалып башласа, о кене руханийге бармакъ керек.

⁸ Руханий бурьтюк тёкюлювининъ териси бою даркъалып башлагъаныны корьсе, хастаны арам илян этсин. Бу – кечиджи тери хасталыгъыдыр.

⁹ Тери хасталыгъы олгъан адамны руханийге кетирмек керек.

¹⁰ Руханий оны бакъсын. Эгер терисиндеки шишик беяз, устюндеки сачлары да агъаргъан олса, шишикте де ачыкъ яра корюльсе,

¹¹ бу – тенинде девамлы тери хасталыгъыдыр. Руханий хастаны арам илян этсин ве башкъа адамлардан айырсын, чюнки о, арамдыр.

¹² Эгер тери хасталыгъы даркъалса ве хастанынъ бутюн тенини баштан-аякъ къаплап алса, руханий оны бакъсын.

¹³ Тери хасталыгъы хастанынъ бутюн тенини баштан-аякъ къаплагъан олса, лякин онынъ бутюн тени беяз олса, руханий о адамны темиз деп илян этсин. О, темиздир.

¹⁴ Амма хастанынъ тенинде ачыкъ яра корюльсе, о, арамдыр.

¹⁵ Эгер руханий ачыкъ яраны корьсе, о, хастаны арам деп илян этсин. Ачыкъ яра арамдыр. Бу – кечиджи тери хасталыгъыдыр.

¹⁶ Амма ачыкъ яра денъишип, тюсю беязгъа чевирильсе, хаста адам руханийге кельсин.

¹⁷ Руханий хастаны бакъсын. Эгер хаста ери агъаргъан олса, руханий хаста адамны темиз деп илян этсин. Шу адам темиз сайылсын.

¹⁸ Эгер биревнинъ терисинде ишлев чыкъып, яхшы олгъан олса,

¹⁹ ве ишлевнинъ еринде беяз бир шишик я да беяз я къырмызылы тюстеки бир леке пейда олгъан олса, о руханийге кетсин.

²⁰ Руханий оны бакъсын. Эгер хаста ери терининъ ичине кирип кеткен олса, эм де устюндеки сачлар агъаргъан олса, руханий хастаны арам деп илян этсин. Бу – кечиджи тери хасталыгъы. О, ишлев еринде пейда олды.

²¹ Лякин руханий хастаны бакъкъанда, хаста ери устюндеки сачлар агъармагъан олса, эм де терининъ ичине кирип кетмеген олса ве козьге чарпмаса, руханий шу адамны еди куньге башкъа адамлардан айырсын.

²² Эгер хасталыкъ тери бою даркъалып башласа, руханий адамны арам деп илян этсин. Бу – кечиджи тери хасталыгъыдыр.

²³ Эгер парлакъ леке кечмейип, даркъалмагъан олса, бу – ишлевнинъ къабугъыдыр. Руханий адамны темиз деп илян этсин.

²⁴ Эгер биревнинъ тенинде атеш яныгъы олса ве яныкъ еринде къырмызылы я беяз леке пейда олса,

²⁵ руханий яраны бакъсын. Лекенинъ устюндеки сачлар агъаргъан олса, леке тери ичине кирип кеткен олса, бу – кечиджи тери хасталыгъыдыр. О, янгъан ерде пейда олды. Руханий шу адамны арам деп илян этсин. Бу – кечиджи тери хасталыгъыдыр.

²⁶ Лякин эгер руханий парлакъ лекедеки сачлар агъармагъаныны, хаста ери тери ичине кирип кетмегенини ве онынъ къараргъаныны корьсе, о, хастаны еди куньге башкъа адамлардан айырсын.

²⁷ Единджи куню руханий хастаны бакъсын. Эгер хаста ери териси бою даркъалгъаныны корьсе, руханий шу адамны арам деп илян этсин. Бу – кечиджи тери хасталыгъыдыр.

²⁸ Эгер леке кечмейип, териси бою даркъалмагъан олса, эм де бираз къараргъан олса, бу – яныкътан пейда олгъан бир шишиктир. Руханий адамны темиз деп илян этсин, чюнки бу – яныкъ ярасынынъ изидир.

²⁹ Акъайнынъ я да къадыннынъ башында я да сакъалында хаста ери пейда олгъанда,

³⁰ руханий хаста ерини бакъсын. Хаста ери тери ичине кирип кеткен олса, устюндеки сачы да индже ве сараргъан олса, руханий адамны арам деп илян этсин. Бу – къуйпадыр, башындаки я да сакъалындаки тери хасталыгъыдыр.

³¹ Руханий къуйпаны бакъсын. Эгер о, тери ичине кирип кетмеген олса, эм де устюндеки сачлары къара олмаса, руханий хастаны еди куньге башкъа адамлардан айырсын.

³² Единджи куню руханий хаста ерини бакъсын. Эгер къуйпа даркъалмагъан, устюндеки сачлар сарармагъан ве къуйпа тери ичине кирип кетмеген олса,

³³ хастаны тыраш этмек керек. Амма къуйпа ерини тыраш этмеге олмаз. Руханий хастаны даа еди куньге башкъа адамлардан айырсын.

³⁴ Единджи куню руханий къуйпа ерини бакъсын. Къуйпа териси бою даркъалмагъан олса ве тери ичине кирип кетмеген олса, руханий хастаны темиз деп илян этсин. Хаста адам урбаларыны ювсун ве темиз сайылсын.

³⁵ Хаста темизленген сонъ, къуйпа онынъ териси бою даркъалып башласа,

³⁶ руханий оны кене бакъсын. Къуйпа териси бою даркъалгъан олса, руханий сараргъан сачны къыдырмасын. Шу адам арамдыр.

³⁷ Эгер къуйпа олгъаны киби къалса ве устюнде къара сач осип чыкъса, демек, къуйпа кечкендир. Адам темиздир. Руханий оны темиз деп илян этсин.

³⁸ Акъай я да къадыннынъ тенинде беяз лекелер пейда олгъанда,

³⁹ руханий оларгъа бакъсын. Эгер теридеки лекелер акъчиль беязлы олсалар, бу тери устюнде чыкъкъан адий бурьтюк тёкюлювидир. Адам темиздир.

⁴⁰ Эгер биревнинъ сачы тёкюлип битсе, бу адам таздыр. О темиз.

⁴¹ Эгер башынынъ огдеки сачлары тёкюлип битсе, бу тазлашкъан манълайлы адамдыр. О темиз.

⁴² Эгер тазда я да тазлашкъан манълайда беязлы-къырмызылы леке олса, анда тери хасталыгъы чыкъкъандыр.

⁴³ Руханий адамны бакъсын. Тазындаки я да тазлашкъан манълайындаки шишик беязлы-къырмызылы олып, тери хасталыгъына ошагъаныны корьсе,

⁴⁴ адам тери хасталыгъына огърагъандыр. О, арамдыр. Башындаки хасталыгъы ичюн руханий оны арам деп илян этсин.

⁴⁵ Тери хасталыгъы олгъан адам озь урбасыны йыртсын, сачларыны дагъытсын. Адам агъзына къадар къапалы олсун ве: «Арам! Арам!» – деп къычырсын.

⁴⁶ Бутюн хаста олгъан вакътында о, арам сайылсын. О, башкъа адамлардан айры, ордудан тыш ерде яшасын.

Куф акъкъында къанун

⁴⁷ Урбада куф корюльгенде: юнь я да кетен бир урбада,

⁴⁸ юнь я да кетен, я да тери я териден япылгъан шейде пейда олгъанда,

⁴⁹ ве урбада, териде, орьме я да токъума безде, териден япылгъан насылдыр шейде ешильтим я да къырмызылы леке корюльгенде, бу – кечиджи куфтир. Шу шейни руханийге косьтермек керек.

⁵⁰ Руханий шу шейни бакъсын ве еди куньге оны айры къалдырсын.

⁵¹ Единджи куню руханий шу шейни бакъсын. Эгер урбадаки, юнь я да кетен, теридеки я да териден япылгъан башкъа бир шейнинъ устюнде куф даркъалгъан олса, бу – кечиджи куфтир. О, арам.

⁵² Руханий устюнде куфу олгъан урбаны, я да юнь я кетен, я да териден япылгъан бирде-бир шейни якъсын, чюнки бу – кечиджи куфтир. Оны якъмакъ керек.

⁵³ Эгер руханий урбадаки, орьме я да токъума безде, я да териден япылгъан бирде-бир шейнинъ устюндеки куф даркъалмагъаныны корьсе,

⁵⁴ руханий куф олгъан шейни ювмагъа буюрсын. Сонъ шу шейни даа еди куньге айры къалдырсын.

⁵⁵ Куф тийген шей ювулгъан сонъ, руханий оны бакъсын. Эгер куф денъишмеген олса, о, даркъалмагъан олса да, о, эп бир арамдыр. Куф шейнинъ онъ я да терс тарафыны ургъаны фаркъы ёкъ, оны эп бир якъмакъ керек.

⁵⁶ Эгер ювулгъан сонъ куф козьге чарпмаса, руханий о куфлю ерни урбадан, териден я да орьме я да токъума безден йыртсын.

⁵⁷ Эгер куф шу урбада, орьме я да токъума безде я да териден япылгъан бирде-бир шейнинъ устюнде кене чыкъса, бу – кечиджи куфтир. Куфлю шейни якъмакъ керек.

⁵⁸ Эгер ювулгъан урбадан, орьме я да токъума безден я да териден япылгъан бирде-бир шейнинъ устюнден куф кетсе, оларны бир даа ювмакъ керек. Сонъ олар темиз оладжакъ.

⁵⁹ Мына юнь я да кетен урбасында, орьме я да токъума безден я да териден япылгъан бирде-бир шейде пейда олгъан куф акъкъында ве шу шейлерни арам я да темиз илян эткени акъкъында къанундыр.