Хавакъкъукъ 3 - Мукъаддес Китап

Хавакъкъукънынъ дувасы

¹ Хавакъкъукъ пейгъамбернинъ дувасы. Шиггайон.

² Я РАББИ! Сенинъ ишлеринъ акъкъында эшиттим ве къоркътым! Я РАББИ! Бизим куньлеримизде Сенинъ ишлеринъни яп, олар бизим куньлеримизде корюнсинлер! Амма гъазабынъда мераметни акъылда тут.

³ Алла Темандан келеята, Мукъаддес Алла Паран дагъларындан келе. Сэла Онынъ улулыгъы коклерни къаплай, Онынъ шан-шурети дюньяны толдура. Сэла

⁴ Онынъ улулыгъы кунеш киби парылдай. Эллеринден нурлар сачыла, анда Онынъ къудрети сакълана!

⁵ Онынъ эмиринен йыкъыджы хасталыкъ келе, Онынъ буюргъанынен ольдюриджи атеш якъа.

⁶ О турды, ве дюнья салланды, О бакъты, ве халкълар титреди. Къарт дагълар йыкъылды, эски байырлар тер-тегиз олды. Онынъ ёллары эбедий.

⁷ Хушан чадырлары гъамлы алда олгъаныны корьдим, Мидьян топрагъындаки чадыр перделери къоркъудан титреди.

⁸ Я РАББИ, гъазабынъ озенлерге эдими? Озенлерге ачувландынъмы ёкъса? Ачувынъ денъизге къозгъадымы? Не ичюн Сен атларынъа миндинъ, душманларны енъеджек арабаларынъда бардынъ?

⁹ Сен къабилелерге берген антынъны беджерип, яйынъны кердинъ. Сэла Озенлернен ерни ярдынъ.

¹⁰ Сени корьгенде, дагълар къалтырады, коклерден ягъмурлар ягъды. Буюк теренлик окюрди, тюпсюзлик къолларыны котерди.

¹¹ Учкъан окъларынънынъ нурундан, йылтырагъан мызракъларынънынъ ярыгъындан кунешнен ай озь еринде токътады.

¹² Гъазап ичинде ер юзюнден кечесинъ, ачувынъда халкъларны таптап ташлайсынъ.

¹³ Сен халкъынъны къуртармакъ ичюн чыкътынъ, сайлагъан падишанъны къорчаламакъ ичюн кеттинъ. Яман эвнинъ башлыгъыны ёкъ эттинъ, темелине къадар кестинъ, масхаралыгъыны ачтынъ. Сэла

¹⁴ Манъа къаршы дженкке чыкъкъан аскерлернинъ башлыгъыны Сен онынъ таягъынен тештинъ. Олар, фуртуна киби, бизге атылдылар, санки сакълангъан еринде факъырны ёкъ этмек ичюн, бизни енъмеге къуванчнен ниетлендилер.

¹⁵ Сен исе атларынънен денъизни кечтинъ, буюк сувларнынъ далгъаларыны копюрттинъ.

¹⁶ Сени эшитип, юрегим титреди, дудагъым къалтырап, кемиклерим агъырды. Аягъым тюбюнде ер саллангъандай олды. Амма меним халкъыма уджюм эткен душманнынъ башына тюшеджек беля кунюни сабырнен беклейджегим.

¹⁷ Инджир тереги ачмаса да, юзюм пытагъы емиш бермесе де, зейтюн берекет бермесе де, тарлада отьмек етишмесе де, къошта къойлар къалмаса да, аранда тувар къалмаса биле –

¹⁸ эписи бир РАББИме къуванырым, мени къуртаргъан Аллама севинирим!

¹⁹ РАББИ-Таалям – меним къуветим! О, аякъларымны сыгъын аякълары киби тез япаджакъ ве мени юксек ерлерге алып бараджакъ! Баш чалгъыджы ичюн. Телли чалгъы алетлеринде.