Къадылар 3 - Мукъаддес Китап

Къувулмагъан халкълар

¹ Ханаан дженклери акъкъында бильмеген бутюн исраиллилерни сынамакъ ичюн, РАББИ къалдыргъан халкъларнынъ адлары будыр

² (РАББИ буны, дженк не олгъаныны бильмеген Исраиль огъулларынынъ келеджек несиллери дженк не олгъаныны бильсин ве дженклешмеге огренсинлер деп, япты):

³ беш дане Фелестин падишасы, ханаанлыларнынъ эписи, сидонлылар ве Баал-Хермон дагъындан Лево-Хаматкъа къадар Ливан дагъларында яшагъан хивлилердир.

⁴ Бу халкълар сагъ къалдырылгъан. Олардан файдаланып, РАББИ Исраильни сынамагъа ве, исраиллилер бабаларына Мусадан берильген эмирлерге бойсунаджакълармы, ёкъмы, бильмеге истеди.

⁵ Исраиль огъуллары ханаанлылар, хитлилер, аморлылар, перизлилер, хивлилер ве евуслылар арасында яшай эдилер,

⁶ оларнынъ къызларыны озьлерине апай оларакъ алып, озь къызларыны оларнынъ огъулларына бере эдилер ве оларнынъ аллаларына хызмет эте эдилер.

Отниэл

⁷ Исраиль огъуллары РАББИнинъ огюнде пек ярамай шейлер яптылар, Алласы олгъан РАББИни унуттылар, Баал ве Ашторет путларына хызмет эттилер.

⁸ РАББИнинъ гъазабы пек къозгъады. О, исраиллилерни Арам-Нахараим падишасы Хушан-Ришатаим къолуна берди. Исраиль огъуллары Хушан-Ришатаимге секиз йыл хызмет эттилер.

⁹ Сонъ Исраиль огъуллары къычырып, РАББИден ярдым истеди. РАББИ Исраиль огъулларына къуртарыджы берди. Бу, Къалев къардашы Кеназнынъ огълу Отниэл эди.

¹⁰ Отниэлде РАББИнинъ Руху бар эди. Ве о, Исраильнинъ къадысы эди. О дженкке чыкъты, ве РАББИ Арам падишасы Хушан-Ришатаимни онынъ къолуна берди, ве о Хушан-Ришатаимни енъди.

¹¹ Къыркъ йыл девамында шу ерлерде тынчлыкъ эди. Сонъ Кеназ огълу Отниэл ольди.

Эхуд

¹² Исраиль огъуллары кене РАББИнинъ огюнде ярамайлыкъ япып башладылар. РАББИ, шу ярамай ишлери ичюн, Моав падишасы Эглонны исраиллилерден къуветли япты.

¹³ Эглон аммонлылар ве амалеклилерни топлап, дженкке чыкъты ве исраиллилерни енъди, Пальмалар Шеэрини запт этти.

¹⁴ Исраиль огъуллары Моав падишасы Эглонгъа 18 йыл девамында хызмет эттилер.

¹⁵ Сонъ Исраиль огъуллары къычырып, РАББИден ярдым истедилер, ве РАББИ оларгъа къуртарыджы Эхудны берди. Солакъай Эхуд биньяминли Геранынъ огълу эди. Исраиллилер Эхуддан Моав падишасы Эглонгъа бахшышлар йибердилер.

¹⁶ Эхуд озюне ярым метр узунлыкъта эки тарафы кескин къылыч ясады. Къылычны урбасынынъ тюбюнден, сагъ янбашы тарафындан белине такъты.

¹⁷ Сонъ Моав падишасы Эглонгъа бахшышларны алып барды. Эглон пек семиз бир киши эди.

¹⁸ Эхуд, эписи бахшышларны такъдим этип, оларны кетирген кишилерни озгъаргъан сонъ,

¹⁹ озю Гилгалдаки эйкель путларындан къайтып келип, падишагъа: – Падиша, меним санъа лафым бар, – деди. Падиша: – Сус, – деди. Янындакилер чыкъып кеттилер.

²⁰ Эхуд онынъ янына якъынлашты. Падиша айры серинчик бир юкъары одада отура эди. Эхуд: – Меним санъа Алладан сёзюм бар, – деди. Эглон тахтындан турды.

²¹ Эхуд сол къолуны узатып, сагъ янбашындан къылычыны чыкъарды да, онынъ къурсагъына саплады.

²² Ойле саплады ки, къурсагъына тап къылычнынъ сапы кирип кетти. Падишанынъ ич ягъы къылычны къапатты. Эхуд къылычыны чыкъармайып, арттаки къапудан кечти.

²³ Сонъ аяткъа чыкъып, оданынъ къапусыны къапатып килитледи.

²⁴ Эхуд чыкъкъан сонъ, Эглоннынъ къуллары келип, не корьсюнлер, оданынъ къапусы къапалы. – О, мытлакъа юкъары одададыр, бир аджети чыкъкъандыр, – дедилер олар.

²⁵ Баягъы вакъыт бекледилер, тап утандылар, сонъ къапуны кимсе ачмагъаныны корип, анахтарны алдылар да, къапуны ачтылар. Мында исе эфендилери ерде олю ята эди.

²⁶ Хызметчилер не олгъаныны анъламайып отургъан вакъытта Эхуд чыкъып кетти, эйкель путларынынъ янындан кечти ве Сеира шеэрине къачып къуртулды.

²⁷ Эхуд келип, Эфраим дагъында бору чалды, ве Исраиль огъуллары онен берабер дагъдан тюштилер. Эхуд оглеринде кетмекте эди.

²⁸ О, оларгъа: – Меним артымдан юрюнъиз. РАББИ моавлы душмаларынъызны къолунъызгъа берди, – деди. Исраиллилер онынъ артындан кетип, Иордан озениндеки Моавгъа кечит ёлуны къолуна алдылар, ве кимсеге кечмеге ёл бермедилер,

²⁹ он бинъге якъын моавлыларны ольдюрдилер. Моавлыларнынъ эписи кучьлю ве сагълам акъайлар эди, лякин кимсе къачып къуртулмады.

³⁰ Бойле этип, моавлылар Исраильге бойсундылар, ве шу ерлерде 80 йыл девамында тынчлыкъ девам этти.

Шамгъар

³¹ Эхуддан сонъ Анат огълу Шамгъар кельди. О, 600 фелестинлини сюйрю таякънен ольдюрди. О да Исраильни къуртара эди.