Къадылар 12 - Мукъаддес Китап

Йифтах ве эфраимлилер

¹ Эфраим акъайлары топлашып, Цафонгъа кельдилер ве Йифтахкъа бойле дедилер: – Сен аммонлыларнен дженкке кеткенде, не ичюн бизни чагъырмадынъ? Бойле япкъанынъ ичюн биз сени эвинънен берабер якъаджакъмыз!

² Йифтах оларгъа джевап берди: – Мен ве халкъым аммонлыларнен къатты давалаштыкъ. Мен сизлерни чагъыргъан эдим, амма сиз манъа ярдымгъа кельмединъиз.

³ Сизлерден ярдым кельмейджегини анълагъан сонъ, мен озюм, джанымны аямайып, аммонлыларгъа къаршы чыкътым. РАББИ оларны меним къолума берди. Сизлер энди не ичюн манъа къаршы дженклешмеге чыкъасынъыз?

⁴ Йифтах бутюн Гилад сакинлерини топлап, эфраимлилерге къаршы дженк башлады. Эфраимлилер: «Эй, гиладлылар, сиз Эфраим ве Менашше топрагъында яшагъан эфраимли къачакъларсынъыз!» – деп, гиладлыларны акъаретлегенлери ичюн, гиладлылар эфраимлилернинъ ордусына уджюм этип, оларны енъдилер.

⁵ Гиладлылар Иордан озенининъ сай ерлерини запт этип, эфраимлилернинъ ёлларыны къапаттылар. Къачакъ эфраимлилернинъ бирде-бири: «Манъа о бир ялыгъа кечмек керек», – десе, гиладлылар ондан: «Сен Эфраим къабилесинден дегильсинъми?» – деп сорай эдилер. О: «Ёкъ», – деп джевап бере эди.

⁶ Лякин гиладлылар: «Айса “шибболет” сёзюни айт», – дей эдилер. О исе сёзни догъру айтып оламай, «сибболет» деп теляффуз эте эди. Оны тутып, Иорданнынъ сай ерлеринде ольдюре эдилер. О вакъытта 42 000 Эфраим аскери ольдюрильген эди.

⁷ Йифтах алты йыл девамында Исраильнинъ къадысы олды. Сонъ гиладлы Йифтах ольди ве Гиладнынъ бир шеэринде дефн этильди.

Ивцан, Элон ве Авдон

⁸ Ондан сонъ Исраильнинъ къадысы вифлеемли Ивцан олды.

⁹ Онынъ отуз огълу бар эди. Отуз къызыны о союндан тышкъа акъайгъа берди, огъулларына да союндан тыш отуз къыз алды. О, еди йыл девамында Исраильнинъ къадысы олды.

¹⁰ Сонъ Ивцан ольди ве Вифлеемде дефн этильди.

¹¹ Бундан сонъра Исраильнинъ къадысы Зевулун къабилесинден олгъан Элон олды. О, он йыл девамында Исраильнинъ къадысы олды.

¹² Сонъ Зевулун къабилесинден олгъан Элон ольди ве Зевулун топракъларындаки Аялонда дефн этильди.

¹³ Ондан сонъ Исраильнинъ къадысы пиратонлы Хиллел огълу Авдон олды.

¹⁴ Онынъ къыркъ огълу ве отуз торуны бар эди. Олар етмиш дане эшекке минип юре эдилер. О, секиз йыл девамында Исраильнинъ къадысы олды.

¹⁵ Сонъ пиратонлы Хиллел огълу Авдон ольди ве Пиратон шеэринде, Эфраим топракъларында, Амалек дагъларында дефн этильди.