Еудийлерге 7 - Мукъаддес Китап

Мелкиседек руханий

¹ Мелкиседек Салим шеэрининъ падишасы ве Юдже Алланынъ руханийи эди. Ибраим падишаларны енъип къайтаяткъанда, Мелкиседек оны къаршыламагъа чыкъты ве хайыр дувасыны окъуды.

² Ибраим онъа эр бир шейден онда бир пайыны берди. Мелкиседек адынынъ биринджи манасы – «догърулыкъ падишасы», сонъра о, Салим шеэрининъ падишасы, яни тынчлыкъ-аманлыкъ падишасыдыр.

³ О, анасыз, бабасыз, сойларнынъ джедвелисиз. Омрюнинъ не башланувы, не сонъу бар. О, Алланынъ Огълу киби, эбедий руханийликте булуна.

⁴ Онынъ не къадар буюк олгъанына бакъынъыз! Буюк деде Ибраим Мелкиседекке эльге кечирген малынынъ онда бир пайыны берди.

⁵ Къанун буюргъаны киби, руханийлик хызметини эткен Левийнинъ эвлятлары халкътан, яни Ибраимнинъ союндан озь агъа-къардашларындан, онда бир пайыны алмакъ кереклер.

⁶ Мелкиседек Левий союндан олмайып, Ибраимден онда бир пайыны алды, ве, Алла Ибраимге яхшылыкъ япмагъа энди сёз берген олса да, Мелкиседек Ибраимге яхшылыкъ тиледи.

⁷ Ич бир шубесиз, хайыр дувасыны окъугъан адам яхшылыкъ тилевини къабул эткен адамдан буюктир.

⁸ Бундан гъайры, он пайда бир пайыны халкътан оледжек адамлар алалар. Мында исе, язылгъанына коре, онда бир пайыны эбедий яшагъан инсан алды.

⁹ Айтмагъа мумкюн ки, онда бир пайыны алгъан Левий озю Ибраим аркъалы онда бир пайыны берген;

¹⁰ Мелкиседек Ибраимни къаршылап алгъанда, Левий даа догъмагъан, о бабасынынъ беденинде эди.

Мелкиседекке ошагъан руханий

¹¹ Алланынъ Къануны халкъкъа левийлилернинъ руханийлик хызмети боюнджа берильди. Лякин Алла берген сёзлер левийлилернинъ руханийлик хызмети ярдымынен беджерильмеген эди, шунынъ ичюн Харунгъа дегиль, Мелкиседекке ошагъан башкъа руханий котерильмек керек эди.

¹² Алла руханийликни денъиштирсе, Къанунны да денъиштирмек керек.

¹³ Биз айткъан Иса башкъа бир къабиледен чыкъкъан, ве бу къабиледен ич кимсе къурбан еринде хызмет этмеген эди.

¹⁴ Белли ки, бизим Раббимиз Иса Ехуда къабилесинден келип чыкъты. Муса исе бу къабиле акъкъында айткъанда, руханийлик хызмети акъкъында ич бир шей айтмагъан эди.

¹⁵ Энди Мелкиседекке ошагъан башкъа бир руханий пейда олса, шу даа ачыкътан-ачыкъ ола.

¹⁶ О, руханий олды, амма Левий къабилесинден олгъаны ичюн дегиль, сонъсуз омюрнинъ къудретинен руханий олды.

¹⁷ Язылгъан да: «Сен, Мелкиседек киби, эбедий руханий оладжакъсынъ».

¹⁸ Бойлеликнен, эвельки берильген эмир кучьсюз ве файдасыз олгъаны ичюн, энди четке ташлангъан.

¹⁹ Къанун ич бир шейни ерине кетирип оламагъан. Шунынъ ичюн энди яхшыджа бир умют мейдангъа кельди, ве биз бу умютнен Аллагъа якъынлаша билемиз.

²⁰ Алла буны антнен тасдыкълады. Башкъалары руханий олгъанда, Алла ант этмей эди,

²¹ амма Иса руханий олгъанда, Алла ант этти. Бойле язылгъан да: «РАББИ ант эткен ве сёзюнден къайтмаз: “Сен эбедий руханий оладжакъсынъ”».

²² Бойледже, Иса сакълагъан васиет даа яхшыдыр!

²³ Анавы руханийлернинъ сайысы чокъ эди, чюнки оларнынъ хызметини олюм токътата эди.

²⁴ Амма Иса эбедиен къалгъаны ичюн, руханийлик хызметини эбедиен япа.

²⁵ Шунынъ ичюн адамлар Исанынъ ярдымынен Аллагъа якъынлашкъанда, Иса оларны къуртара биле, чюнки О, эр вакъыт яшай ве Алланынъ огюнде оларнынъ тарафыны тутып, оларны къорчалай.

²⁶ Бизлерге анавы бойле бир баш руханий керек. О, мукъаддес, къабаатсыз ве лекесиз, гуналы адамларнынъ арасындан олмагъан ве коклерден юксек котерильгендир.

²⁷ Башкъа баш руханийлер эр кунь башта озь гуналары ичюн, сонъ халкънынъ гуналары ичюн къурбан кетире эди. Исагъа исе буны япмагъа керекмей, чюнки О, адамларнынъ гуналары ичюн къурбан оларакъ Озюни кетирди.

²⁸ Къанунгъа коре, къуветсизликлери олгъан адамлар руханий ола эдилер. Амма Къанундан сонъ антнен берильген ваде къусурсыз Огълуны эбедиен баш руханий япты.