Ешая 28 - Мукъаддес Китап

Эфраимнинъ такъдири

¹ Эфраимнинъ сархош огъуллары макътангъан таджгъа беля! Солаяткъан чечекке, Эфраимнинъ дюльберлигине ве шуретине беля! Чечек берекетли вадийининъ башында, анда яшагъанлар исе шарапнен харапландылар!

² Мына Раббининъ сагълам ве кучьлю бириси бар. Бурчакълы ягъмур, йыкъыджы боран, кучьлю сув ташкъыны киби келеджек. Рабби Озь къолунен буны ерге ёллайджакъ.

³ Сархош эфраимлилер макътангъан тадж аякъ асты этиледжек.

⁴ Солаяткъан чечек, Эфраимнинъ дюльберлиги ве шурети, берекетли вадийининъ башындаки чечек – вакътындан эрте пишкен инджир киби олур: корюнир-корюнмез, аман къопарылып ютуладжакъ.

⁵ О куню сагъ къалгъан халкъына Ордуларнынъ РАББИси аджайип тадж, дюльберлик ве шурет оладжакъ.

⁶ Суд эткенлерге О, адалет рухуны береджек, шеэр къапуларында душманларнен дженклешкенлерге О, юрек оладжакъ.

⁷ Булар да шараптан тентир-ментир юрелер, ичкиджиликтен ёлларыны шашыралар, руханийлернен пейгъамберлер сюрюнелер. Шарапкъа берилип, ичкиджиликтен акъылларыны ашадылар, руяларында янъылалар, тарифлеринде абыналар.

⁸ Софралары джиренч къускъакъкъа ве бокъкъа толу, темиз ер къалмады.

⁹ Кимге акъыл огретип оладжакъ? Кимге Раббининъ хаберини анълатаджакъ? Ана сютюни якъында эмгенлерге, янчыкъ кокюстен айырылгъан балаларгъамы?

¹⁰ Бутюн огреткенлери – сонъсуз къаиделер, къаиделер, огютлер, огютлер. Азачыкъ андан, азачыкъ мындан алынгъан огютлер ве къаиделер.

¹¹ Рабби бу халкъкъа ябанджы тильде, анълашылмагъан сёзлернен айтаджакъ.

¹² Оларгъа: «Мына – раатлыкъ, ёргъунгъа раатлыкъ беринъиз. Тескин будыр», – деди, амма олар динълемеге истемедилер.

¹³ РАББИнинъ сёзлери олар ичюн: «Сонъсуз къаиделер, къаиделер, огютлер, огютлер. Азачыкъ андан, азачыкъ мындан алынгъан огютлер ве къаиделер». Онынъ ичюн олар кетеджек, авдарылып йыкъыладжакълар, яраланаджакълар, къапкъангъа тюшип, тутуладжакълар.

Сионнынъ темель ташы

¹⁴ Эй, мыскъылджылар, Ерусалимдеки халкъкъа падишалыкъ эткенлер! РАББИнинъ сёзюни динъленъиз!

¹⁵ Сизлер: «Олюмнен анълаштыкъ, олюлернинъ дюньясынен бирлештик, – дейсинъиз. – Орталыкъны ёкъ эткен сув ташкъыны кельгенде, бизге зарар кетирмейджек. Бизни ялан къорчалай, алдав тюбюнде сакъланамыз».

¹⁶ Бунынъ ичюн РАББИ-ТААЛЯ бойле дей: – Бакъынъыз! Мен Сионда бир ташны – сыналгъан, къыйметли, коше башында темельташны къояйым. Онъа ишангъан адам къоркъмайджакъ.

¹⁷ Ольчю йипинен ольчеген дайын, адалетнен суд этеджегим, акъикъатны догърулыкънен ольчейджегим. Ялан булунгъан ерни бурчакъ урып ёкъ этеджек, сакълангъан ерлерни сув басаджакъ.

¹⁸ Олюмнен тизген анълашманъыз дагъыладжакъ, олюлернинъ дюньясынен бирлигинъиз де гъайып оладжакъ. Орталыкъны ёкъ эткен сув ташкъыны кельгенде, о, сизни таптайджакъ.

¹⁹ Бу беля кельген сайын, сизлернинъ башынъызгъа тюшеджек, эр саба, эр куньдюз, эр гедже сизге келеджек. Хаберни анълап, къоркъудан къалтырайджакъсынъыз.

²⁰ Аякъларынъызны узатмакъ ичюн, тёшегинъиз къыскъа оладжакъ, сарылып ятмакъ ичюн, ёргъанынъыз тар оладжакъ.

²¹ РАББИ Перацим дагъында олгъаны дайын тураджакъ, Гивон вадийинде олгъаны киби ачувланаджакъ, Озюнинъ меракълы, аджайип ишини япаджакъ, о вакъыттан эвель корюльмеген арекетини этеджек.

²² Энди мыскъылджы олманъыз, ёкъса зынджырларынъыз даа зияде агъыр оладжакъ. Ордуларнынъ РАББИ-ТААЛЯсындан эшиттим ки, бутюн ер юзю къырыладжакъ ве гъайып оладжакъ.

Раббининъ икмети

²³ Къулакъ асып, айткъанларымны динъленъиз, дикъкъат этип, лафымны динъленъиз.

²⁴ Сачмакъ вакъты кельгенде, сабанджы токътамаздан топрагъыны сюрерми? Баразна этип, токътамаздан тырнакълармы?

²⁵ Ёкъ! Топракънынъ тёпесини тегизлеген сонъ, къара зира сачар, кимьён сепер, я да сыра-сыра богъдай, айры ерде арпа, янына да къызыл богъдай сачар.

²⁶ Бойле тертип-низамны онъа Алла тенбиелеп огрете.

²⁷ Къара зира кескин алетнен бастырылмаз, кимьённынъ устюнден баскъан копчекни юварлатмазлар. Зираны да, кимьённы да таякънен дёгерлер.

²⁸ Богъдай отьмеги басылыр, амма эзильмез, онынъ устюнден баскъан копчеклерни атларынен берабер кечирселер де, эписи бир эзмезлер.

²⁹ Буларнынъ эписи – Ордулар РАББИсининъ эмиридир. О, энъ аджайип акъыл огретиджидир, акъылы буюктир!