Энъ яхшы йыр 4 - Мукъаддес Китап

Огълан:

¹ – Ах, не гузельсинъ, ярем, ах, не гузель! Зулюфлеринъ тюбюндеки козьлеринъ гогерджин козьлери киби назик. Сачларынъ Гилад дагъындан тюшип кельген эчкилер киби къара.

² Тишлеринъ – къыркъылып ювунгъан беяз къойлар кибидир; эр бирининъ чифти бар, араларында да къысыр сою ёкъ.

³ Дудакъларынъ ачыкъ къырмызыдыр, агъзынъ да не къадар гузель! Зулюфлеринънинъ тюбюндеки янакъларынъ – санки нар парчасыдыр!

⁴ Бойнунъ – юксек ве усталыкънен къурулгъан Давутнынъ къуллеси кибидир, боюндаки ильванларынъ – джесюр аскерлернинъ къулледе асылгъан бинъ къалкъаны кибидир.

⁵ Кокюслеринъ – сыгъыннынъ эки уфакъ баласы киби назиктир, занбакълар арасында отлагъан яш гъазельнинъ эгизидир.

⁶ Танъ атмаздан, къаранлыкъ гъайып олмаздан эвель, мюр дагъына, темиз къокъулы мискъ байырына бараджагъым.

⁷ Баштан-аякъ гузельсинъ, ярем! Ич къусурынъ ёкъ.

⁸ Кель манъа Ливандан, джаным, кель манъа Ливандан! Амана тёпелигинден, Сенир ве Хермон дагъ тёпесинден, арсланларнынъ къобаларындан, леопардларнынъ дагъларындан тюш.

⁹ Къызкъардашым, келиним! Сен козьлеринънинъ бир бакъышынен, бойнунъдаки герданлыгъынынъ бир алкъасынен юрегимни хырсызладынъ!

¹⁰ Къызкъардашым, келиним! Севгинъ не гузель, севгинъ шараптан да яхшы! Не де аджайип къокъуй мискълеринъ, олар эр бир къокъудан гузель!

¹¹ Эй, келиним! Дудакъларынъдан бал тамлай, тилинъден бал ве сют тёкюле. Урбаларынъдан кельген къокъу – Ливаннынъ хош къокъусы кибидир!

¹² Меним къызкъардашым, келиним – килитленген багъча, къорчалангъан бир къую, къапалы бир чокъракъ.

¹³ Сен – нар багъчасысынъ! Анда энъ яхшы мейвалар, къына ве нард ягълары,

¹⁴ нард ве шафран, тюрлю къокъулы шейлернен шекер къамышы ве тарчын, эр бир хош къокъуларнен мюр ве алоэ.

¹⁵ Багъча чокърагъы – тазе сув къуюсыдыр, Ливандан акъкъан сувлардыр.

Къыз:

¹⁶ – Уян, эй, шималь ели, сен де кель, эй, дженюп ели! Багъчама эс де, онынъ гузель къокъуларыны сач. Севгилим багъчасына кельсин, татлы мейваларыны ашасын!