Энъ яхшы йыр 3 - Мукъаддес Китап

¹ Гедже бою тёшегимде севгилимни къыдырдым, къыдырдым, амма тапалмадым.

² «Турайым да, шеэр бою доланып, сокъакъларда ве мейданларда севгилимни къыдырайым», – деп тюшюндим. Мен оны къыдырдым, амма тапалмадым.

³ Шеэрни бойлап юрген къаравуллар манъа расткельди. «Севгилимни корьмединъизми?» – деп сорадым.

⁴ Олардан кетер-кетмез, севгилимни таптым. Туттым оны, йибермедим. Оны анамнынъ эвине, ич одасына кирсеттим.

⁵ Эй, Ерусалим къызлары! Гъазеллер ве кийик сыгъынларнен емин этинъиз: севгимизни раатсызламанъыз, вакъты кельмегендже, онъа кедер этменъиз.

Джаным, кель манъа! Къызлар:

⁶ – Бу ким экен чёльден чыкъаята? Тютюн диреклери киби, котериле, мюр ве темиз къокъулы мискънинъ, алыш-веришчилернинъ тюрлю къокъулы шейлерининъ къокъусыны даркъата.

⁷ Мына, Сулейманнынъ тахты! Онынъ чевресинде – алтмыш аскер, исраилли джесюр батырлар.

⁸ Эр бир аскернинъ къолунда – къылыч, олар дженк этмеге усталар. Гедже телюкелер олса, оларнынъ къылычлары азыр.

⁹ Сулейман падиша тахтыны Ливан тереклеринден япты.

¹⁰ Диреклери – кумюштен, темели – алтындан япылды. Отургъан ери – мавылы къырмызы, Ерусалим къызлары чадырнынъ ичини севгинен яраштырды.

¹¹ Келинъиз, эй, Сион къызлары, Сулейман падишагъа бакъынъыз! Онынъ башында – гузель тадж! Юреги ичюн къуванчлы кунюнде, Сулейман эвленген кунюнде онынъ анасы онъа бу таджны кийдирди!