Энъ яхшы йыр 2 - Мукъаддес Китап

Къыз:

¹ – Мен Шарон тегизлигинде тек бир чечегим, вадийлернинъ занбагъым.

Огълан:

² – Ярем къызларнынъ арасында – тикенлик арасында бир занбакъ кибидир.

Къыз:

³ – Севгилим яш йигитлернинъ арасында – орман тереклерининъ арасында бир алма тереги кибидир. Онынъ кольгесинде отурмагъа севем, мейваларынынъ дамы агъзым ичюн татлыдыр.

⁴ О, мени зевкъ-сефа эвине кирсетти, мени севгисинен къаплады.

⁵ Къуветлендиринъ мени юзюм къурусынен, джанландырынъ алмаларнен, чюнки севгиден кучюмни джоям.

⁶ Сол къолу – башымнынъ тюбюнде, сагъ къолу мени къучакълай.

⁷ Эй, Ерусалим къызлары! Гъазеллер ве кийик сыгъынларнен емин этинъиз: севгимизни раатсызламанъыз, вакъты кельмегендже, онъа кедер этменъиз.

Севгилернинъ гузеллиги

⁸ Мен севгилимнинъ сесини эшитем! Мына о, дагъларнынъ устюнден секирип, байырларнынъ устюнден сычрап келе!

⁹ Севгилим гъазельге, яш сыгъынгъа ошай. Мына, о, диварымызнынъ артында тура, пенджерелерден ве пармакълыкътан бакъа.

¹⁰ Севгилим манъа бойле деди: «Тур, ярем, гузелим! Чыкъ манъа!

¹¹ Мына, къыш кечти, ягъмурлар битип кетти.

¹² Топракъта чечеклер ачты, йырлар вакъты кельди, еримизде гогерджинлер йырламагъа башлады.

¹³ Инджир тереклери бурьленди, юзюм пытакълары ешерип, хош къокъулар сача. Тур, ярем, гузелим! Чыкъ манъа!»

Огълан:

¹⁴ – Меним гогерджиним якъынлашылмаз ерде, юксек къаялар араларындадыр! Юзюнъни косьтер манъа, сесинъни эшиттир! Сесинъ не татлы, юзюнъ не гузельдир!

¹⁵ Бизлер ичюн тилькилерни, юзюмликлерни бозгъан кучюк тилькилерни тутунъыз; бизим юзюмликлеримиз чечек ачтылар.

Къыз:

¹⁶ – Севгилим – менимдир, мен де – онынъ! Занбакълар арасында о, кейфлене.

¹⁷ Танъ атмаздан, къаранлыкъ гъайып олмаздан эвель, къайт, севгилим! Дагъларнынъ чатлакъларында бир гъазель киби, яш сыгъын киби, тез ол.