Ехезкель 21 - Мукъаддес Китап

Вавилон – Раббининъ укюм къылычы

¹ РАББИ манъа шойле деди:

² – Инсан огълу! Ерусалимге айланып бакъ да, азизликлерге къаршы айт, Исраиль топрагъы акъкъында пейгъамберлик эт.

³ Исраиль топрагъына бойле айт: РАББИ шойле дей: Бакъ, Мен санъа къаршы чыкъаджагъым, къындан къылычымны чыкъараджагъым ве сенинъ догъру адамларынъны да, яман адамларынъны да ёкъ этеджегим.

⁴ Догъру адамны да, яман адамны да ёкъ этмек ичюн, къындан чыкъарылгъан къылычым дженюптен шимальгедже эр кесни ураджакъ.

⁵ Эр бир джан биледжек ки, Мен, РАББИ, къылычымны чыкъардым. Къылычым энди къынына къайтмайджакъ.

⁶ Сен исе, инсан огълу, агъла! Баджакъларынъны шамарла да, къасевет ичинде оларнынъ огюнде агъла.

⁷ Олар сенден: «Сен нечюн агълайсынъ?» – деп сорагъанда, оларгъа бойле джевап бер: «Къоркъунчлы бир шей якъынлаша. Эр бир юрек ирийджек, эр бир эль кучьсюз къаладжакъ, эр бир адам рухтан тюшеджек, эр бир тиз сийдиктен сылакъ оладжакъ». Бу шей якъынлаша, ве бу шейлер мытлакъа оладжакътыр, – дей РАББИ-ТААЛЯ.

⁸ РАББИ манъа шойле деди:

⁹ – Инсан огълу! Пейгъамберлик эт де айт: Рабби шойле дей: Къылыч, къайралгъан къылыч парылдай.

¹⁰ Соймакъ ичюн къайралгъан, яшын киби ялтырасын деп, парылдай! Къуванайыкъмы? Огълумнынъ таягъы эр бир теректен кучьлю олур.

¹¹ Къылыч темизленмек ичюн, эльге алмакъ ичюн берильди. Эм къайралгъан, эм темиз къылыч ольдюргеннинъ элине берильди.

¹² Инсан огълу! Къычырып агъла, чюнки къылыч халкъыма къаршы, Исраильнинъ эписи башлыкъларына къаршы чыкъа. Олар халкъымнен берабер къылычкъа ашкъа бериледжек. Шунынъ ичюн къасеветтен озюнънинъ баджакъларынъны шамарла!

¹³ Сынав кельди. Падишалыкъ таягъы ёкъ этильсе ве гъайып олса, не оладжакъ? – дей РАББИ-ТААЛЯ.

¹⁴ Сен исе, инсан огълу, пейгъамберлик эт, элинъни элинъе ур. Къылыч эки кере, учь кере урсун. Бу къылыч – кесмек ве ольдюрмек ичюн къылычтыр. Бу къылыч – буюк кесюв ичюндир, терен далгъан къылычтыр о.

¹⁵ Юреклери ирисин, йыкъылып ольгенлер чокълашсын деп. Бутюн къапуларында къылычнынъ агъзыны къойдым. Беля! Къылыч яшын киби парылдай, ольдюрмек ичюн къайралгъандыр.

¹⁶ Сагъгъа ур! Солдан ольдюр! Агъзынъ къайда бакъса, анда ольдюр.

¹⁷ Мен де элимни элиме ураджагъым, гъазабымны бутюнлей тёкеджегим. Мен, РАББИ, буны айттым.

¹⁸ РАББИ манъа шойле деди:

¹⁹ – Сен исе, инсан огълу, Вавилон падишасынынъ къылычы кельсин деп, эки ёлны бельгиле. Экиси де бир мемлекетте башласын. Ёл шеэрге бурулгъан ерде бир косьтергич къой.

²⁰ Къылыч аммонлыларнынъ Рабба шеэрине кетеджек ёлны бельгиле. Эм де экинджи ёлны – Ехудагъа, къавийлештирильген Ерусалимге кетеджек ёлны бельгиле.

²¹ Вавилон падишасы эки ёлнынъ айырылгъан еринде, ёлларнынъ чаталлашкъан еринде фал бакъмакъ ичюн токътайджакъ. О, окъларыны саллайджакъ, кичик путларындан сорайджакъ, айван джигеринден бакъаджакъ.

²² Онынъ сагъ къолунда «Ерусалимге кетмек» деген фал оладжакъ: анда диварларны йыкътыргъан алетлерни къоймакъ, уджюм этмеге буюрмакъ, дженк сигналы янъгъырамакъ, къапуларгъа къаршы диварларны йыкътыргъан алетлерни къоймакъ, диварларнынъ янында топракъ обаларыны япмакъ ве уджюм къуллелерни къурмакътыр.

²³ Башкъаларнынъ козю огюнде бу фал ялан корюнеджек. Олар ант эткен эди, амма сонъра хаинлик эттилер. Шуны акъылда туткъанда, о, оларны запт этмеге къарар этеджек.

²⁴ Шунынъ ичюн РАББИ-ТААЛЯ шойле дей: Япкъан ишлеринъизде акъсызлыкъларынъыз ачыкъ олгъанлары, гуналарынъыз корюнгени ичюн, сизлерни эсир аладжакълар.

²⁵ Сен исе, Исраильнинъ яман башлыгъы, ольдюриледжексинъ. Сенинъ вакътынъ кельди, джеза аладжакъ вакъыт якъынлашты.

²⁶ РАББИ-ТААЛЯ шойле дей: Сарыгъынъны чез, таджынъны ташла. Ич бириси энди керек олмайджакъ. Ашалангъанны юксельт, юксек олгъанны ашала.

²⁷ Мен оны харап, харап, харап этерим! Къолунда суд олгъаны кельмегендже, о олмайджакъ! О заман Мен шеэрни къолуна береджегим.

²⁸ Сен исе, инсан огълу, пейгъамберлик эт де, айт: РАББИ-ТААЛЯ аммонлылар акъкъында ве оларнынъ акъаретлери акъкъында шойле дей: Къылыч, къылыч соймакъ ичюн къынындан чыкъарылгъан, ёкъ этмек ичюн темизленип, яшын киби парылдай!

²⁹ Сенинъ акъкъынъда руялар бош, санъа ачкъан фаллар – ялан олгъанда, олюмге укюм этильген яман адамларнынъ боюнларына къылыч тюшеджек. Сенинъ вакътынъ кельди, джеза аладжакъ вакъыт якъынлашты.

³⁰ Къылыч къынына къоюлсын! Яратылгъан еринъде, догъгъан топрагъынъда сени суд этеджегим.

³¹ Ачувымны санъа тёкеджегим, гъазабымнынъ атешини санъа эседжегим. Сени мераметсиз адамларнынъ къолуна, ольдюрмеге усталаргъа береджегим.

³² Сен атешке аш оладжакъсынъ, къанынъ ерге тёкюледжек, сени бир кимсе анъмайджакъ. Мен, РАББИ, буны айттым.