Ёэль 2 - Мукъаддес Китап

Ордуларнынъ келюви

¹ Сионда бору чалынъыз, азиз дагъымда телюке сигналыны беринъиз. Топракъта яшагъан эр кес къоркъудан титресин, РАББИнинъ куню келеята, энди о якъындыр.

² Къою къаранлыкъ куню, булут ве тютюн кунюдир о. Чокъ сайылы ве кучьлю халкъ, танъ ярыгъы киби, дагълар бою даркъала. Бойле сою ич бир вакъыт олмады, эм келеджекте яшайджакъ адамларнынъ заманында да олмайджакъ.

³ Оларнынъ огюнде атеш якъа, артында алев яндыра. Огдеки топракълар – Эдем багъчасы кибидир, артларындан исе бош чёллерге чевирилир. Ич бир шей олардан къуртулып оламаз.

⁴ Оларнынъ корюниши атларгъа ошай, озьлери дженк атлылары киби сычрайлар.

⁵ Дженк арабаларынынъ тасырдысынен киби, дагъларнынъ тёпелеринден сычрайлар. Оларнынъ шаматасы тобанны якъаяткъан атешнинъ чытырдысына ошай. Олар – дженкке азырлангъан кучьлю бир халкъ кибидир.

⁶ Оларнынъ огюнде халкълар къоркъудан дёрт буклене, эр кеснинъ бети агъара.

⁷ Батырлар киби, чапалар, джесюр аскерлер киби, диваргъа тырмашалар. Эр бири ёлуны шашырмайып, озь ёлундан урулмай.

⁸ Бири-бирини басмадан, эр бири озь ёлуны тута. Мызракъларнен къорчалангъанларгъа атылалар ве сагъ-селямет къалалар.

⁹ Шеэр бою чапкъалайлар, диварларгъа тырмашалар, эвлернинъ устюне чыкъалар, хырсызлар киби, пенджерелерден кирелер.

¹⁰ Оларнынъ огюнде ер юзю къыбырдай, коклер титрей, кунеш ве ай сёне, йылдызлар ярыгъыны джоя.

¹¹ РАББИ кучьлю сесинен Озь ордусына буюра. Онынъ аскерлери пек чокъ сайылыдыр, Онынъ буюргъанларыны беджергенлер къудретлидир. Не де къоркъунчлыдыр РАББИнинъ буюк куню! Онъа ким даянып олур?

Тёвбеге чагъырув

¹² Амма шимди де РАББИ айта ки: – Ашамайып-ичмейип, агълап ве зар чекип, джан-юректен Манъа къайтынъыз.

¹³ Урбаларынъызны йыртмагъа керекмей, юреклеринъиз исе сызласынлар. Алланъыз РАББИге къайтынъыз, О, мераметли ве шефкъатлыдыр, чокъ сабырлы ве ишанчлыдыр. О, джезасыны ёлламай.

¹⁴ Ким бильсин, бельки О, фикирини денъиштирир ве сизни аджыр, сизге берекет берер, Алланъыз РАББИге ашлыкъ ве ичерлик бахшышларыны кетирмеге ёл ачар.

¹⁵ Сионда бору чалынъыз, ашаманъыз-ичменъиз, эр бирини топлашувгъа чагъырынъыз.

¹⁶ Халкъны топланъыз, топлашув япынъыз, акъсакъалларны чагъырынъыз, яшларны ве къундакъ балаларыны топланъыз. Киев озь ханесинден ве келин озь одасындан келип чыкъсын.

¹⁷ Руханийлер, РАББИнинъ хызметчилери, Эйваннен къурбан ерининъ арасында агъласынлар ве бойле деп ялварсынлар: «Я РАББИ, халкъынъны аджы. Сенинъ мирасынъны масхара этмесинлер, халкълар оны мыскъылламасынлар. Миллетлер арасында: “Аллалары къайда?” – демесинлер».

Къуртулыш

¹⁸ О заман РАББИ Озь топрагъыны къорчалайджакъ, Озь халкъыны аджыйджакъ.

¹⁹ РАББИ халкъына джевап береджек: – Мына, Мен сизге ашлыкъ, янъы шарап, зейтюн ягъыны береджегим, ве сиз оларгъа тояджакъсынъыз. Бир даа сизни ашаламагъа халкъларгъа ёл бермейджегим.

²⁰ Шимальден кельген душманларны сизден узакълаштыраджагъым, сувсуз ве бош бир топракъкъа къувалайджагъым. Огден кеткенлерни Олю денъизге котерип атаджагъым, арттан кельгенлерни Акъ денъизге ташлайджагъым. Олар яман къокъу даркъатаджакъ, сасыкъ къокъулары котериледжек, чюнки олар чокъ яманлыкъ эттилер.

²¹ Къоркъма, топракъ! Къуван ве шенълен! РАББИ буюк ишлер япты!

²² Эй, кийик айванлар, къоркъманъыз! Чёль отлакълары отны осьтюрир, тереклер мейва берер, инджир ве юзюм де озь берекетини кетирир.

²³ Эй, Сион халкъы, Алланъыз РАББИде къуван ве шенъленинъиз! О, ягъмурны сизге тамам кереги къадар береджек, ве, эвельки киби, кузьде ве баарьде ягъмурны ягъдыраджакъ.

²⁴ Арманлар ашлыкъкъа толаджакъ, юзюм ве зейтюн басылгъан ерлерден янъы шарап ве зейтюн ягъы тёкюлип ташаджакъ.

²⁵ Берекетинъизни тыртыр, сарынчкъа, чегертки ве къонъузлар ашагъан йыллары ичюн, сизге къаршы ёллагъан буюк ордум ичюн акъкъынъызны къайтарырым.

²⁶ О заман сиз тойгъандже ашарсынъыз, сизлер ичюн аджайип шейлер япкъан Алланъыз РАББИнинъ Адыны шуретлейджексинъиз. Сонъ халкъым эбедиен масхара олмайджакъ.

²⁷ О вакъыт Мен Исраильнинъ арасында олгъанымны биледжексинъиз, Мен – РАББИм, сизинъ Алланъыз, башкъа бири ёкъ. Халкъым омюрлик бир даа масхара олмайджакъ.

Раббиге иман эткенлер ичюн къуртулыш

²⁸ – Ондан сонъ Мен эр бир джангъа Рухумны береджегим, ве огъулларынъызнен къызларынъыз пейгъамберлик этеджек, сизинъ къартларынъыз тюшлер кореджек, ве йигитлеринъиз руялар кореджек.

²⁹ О куньлерде къул ве къулкъаларынъызгъа да Рухумны береджегим.

³⁰ Коклерде ве ер юзюнде бельгилеримни косьтереджегим: къан, атешни ве думан диреклерини ёллайджагъым.

³¹ Кунешни къаранлыкъ къаплайджакъ, ай къангъа бояланаджакъ. Ве ондан сонъ РАББИнинъ буюк ве къоркъунчлы куню келеджек.

³² О заман РАББИнинъ Адыны айтып чагъыргъан эр кес къуртуладжакъ. Сион дагъында Ерусалимде къуртулгъанлар топланаджакъ. РАББИ айткъаны киби, сагъ къаладжакъ адамлар РАББИ чагъыргъан халкъ оладжакъ.