Джемаат башы 11 - Мукъаддес Китап

Икметли адамнынъ арекетлери акъкъында

¹ Отьмегинъни сувгъа акъыз, вакъыт кечкен сонъ, о, огюнъе чыкъар.

² Сенде олгъанындан еди, атта секиз адамгъа пай айырып бер, чюнки ер юзюнде насыл беля оладжагъындан хаберинъ ёкъ.

³ Булутлар сувгъа толса, ерге ягъмур ягъдырыр. Терек истер дженюп, истер шимальге йыкъылыр, йыкъылгъан еринде де къалыр.

⁴ Ельге бакъкъан сачмаз, булуткъа бакъкъан ормаз.

⁵ Ельнинъ ёлларыны ве агъыраякълынынъ къурсагъында кемик къайдан пейда олгъаныны бильмегенинъ дайын, эр шейни яраткъан Алланынъ ишини де анълап оламазсынъ.

⁶ Сабадан урлугъынъны сач, акъшам да къол къавуштырып отурма, чюнки насыл ишинъ берекетли оладжагъындан, я экиси де яхшы берекет береджегинден хаберинъ ёкъ.

⁷ Ярыкъ – гузель, кунеш тюбюнде яшамакъ да яхшы.

⁸ Эгер адам чокъ яшаса, бутюн омюр девамында шенъленсин, амма къара куньлерни унутмасын, – олар да чокъ олур. Бутюн оладжакъ шей – боштыр.

Яш адамларгъа насиат

⁹ Эй, огълан, яшлыгъынъда шенълен, юрегинъ сени яшлыкъ куньлеринъде къувандырсын, юрегинъ истеген, козюнъ корьген ёлларнен юр, лякин ахыр-сонъу Алланынъ огюнде эр шей ичюн джевап береджегинъни биль.

¹⁰ Юрегинъни къасеветтен узакъ тут, беденинъден яманлыкъны узакълаштыр. Балалыкъ ве яшлыкъ – боштыр.