Чыкъыш 36 - Мукъаддес Китап

¹ РАББИ Бецалелнен Охолиавгъа ве башкъа адамларгъа Мукъаддес Ерни ве алетлерини къурмакъ ичюн бильги ве усталыкъны берди. Олар эписи бутюн ишни, РАББИ насыл айткъан олса, тамам ойле де япсынлар.

² Муса Бецалелни, Охолиавны, эписи РАББИден усталыкъ алгъанларны ве кимни юреги тартса, эписини ишни башлап чалышмагъа чагъыртты.

³ Олар Мусадан, ишни беджермек ичюн, Мукъаддес Ернинъ эписи кереклерине исраиллилер кетирген бахшышларны алдылар. Исраиллилер озь истегинен даа чокъ бахшышлар Мусагъа эр саба эп кетире эдилер.

⁴ Сонъ Мукъаддес Ернинъ тюрлю ишлерини беджерген эписи усталар, ким насыл иш этсе, ишини ташлап, Мусагъа кельдилер

⁵ ве онъа: – РАББИ япмагъа эмир эткен ишлер ичюн халкъ керегинден зияде кетире, – дедилер.

⁶ Муса эмир этти, ве ордуда бойле илян этильди: «Мукъаддес Ер ичюн не апайлар, не де акъайлар бахшышлар кетирмесинлер!» Сонъ халкъкъа бахшышларыны башкъа кетирмеге бермедилер.

⁷ Эписи шейлерни япмакъ ичюн керегини арткъачынен кетирген эдилер.

Мескеннинъ япылувы

⁸ Ишнен огърашкъан эписи усталар он дане индже ишленген кетенден ве мор, мавылы къырмызы ве ачыкъ къырмызы юньден япылгъан безлерден Мескенни ясадылар. Оларнынъ устьлерине усталыкънен Керувларны нагъышладылар.

⁹ Эр безнинъ узунлыгъы 14 метр эди, кенълиги – эки метр. Эписи безлер бир ольчюде олдылар.

¹⁰ Беш безни бири-бирине тиктилер, къалгъан беш безни де бири-бирине тиктилер.

¹¹ Бири-бирине тикильген биринджи безлернинъ бир четинден мор безден ильмеклер ясадылар, экинджи бири-бирине тикильген безлернинъ бир четинден де ойле яптылар.

¹² Биринджи тикильген безлерге 50 ильмек ясадылар, экинджи бири-бирине тикильген безлернинъ четине де 50 ильмек ясадылар. Ильмеклер бири-бирине къаршы кельдилер.

¹³ 50 дёгмени алтындан япып, дёгмелернен безлерни бири-бирине дёгмеледилер де, Мескен бир бутюн олды.

¹⁴ Мескеннинъ устюни къапатмакъ ичюн, эчки юнюнден безлер яптылар. Безлер он бир дане эдилер.

¹⁵ Бир безнинъ узунлыгъы 15 метр эди, кенълиги эки метр – бу бир без. Эписи он бир безнинъ ольчюси бир эди.

¹⁶ Беш безни бири-биринен айры тиктирди, къалгъан алты безни де бири-бирине айры тиктирди.

¹⁷ Безлерден япылгъан эки парчаны багъламакъ ичюн, биринджи без парчасынынъ четинде 50 ильмек япты, экинджи онен багъланаджакъ парчанынъ четине де 50 ильмек япты.

¹⁸ Орьтюни багъламакъ ичюн, 50 дане тунч дёгме япты, ве бир бутюнлик олды.

¹⁹ Тёпесинден дибагъ этильген ве къырмызы ренкке боялангъан териден орьтю япты, онынъ тёпесинден индже ишленген терилерден даа бир орьтюни япты.

²⁰ Мескен ичюн акация терегинден дос-догъру тургъан черчиве ясады.

²¹ Оларнынъ узунлыгъы беш метр, кенълиги – 0,75 метр эди.

²² Эр бир черчивенинъ ашагъы къысмында эки багъламалар япты. Мескеннинъ эписи черчивелеринде ойле япты.

²³ Мескеннинъ дженюбий тарафы ичюн 20 черчиве,

²⁴ бу 20 черчиве тюбюне кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.

²⁵ Мескеннинъ шималь тарафы ичюн де 20 черчиве ясады.

²⁶ Оларнынъ тюбюне кумюштен япылгъан 40 темель ясады: бир черчиве тюбюне эки темель, черчивенинъ эки багъламасы тюбюне бирер дане эди.

²⁷ Мескеннинъ арттаки дивары ичюн гъарп тарафтан алты черчиве ясады.

²⁸ Арттаки тарафынынъ кошелери ичюн даа эки черчиве ясады.

²⁹ Оларнынъ тюплери бири-бирине багълангъан эдилер, тёпелери бир алкъагъа багъланды, экиси ичюн де ойле эди. Олар эки кошеде турдылар.

³⁰ Бойлеликнен, секиз черчиве олды, оларнынъ тюплерине кумюштен япылгъан 16 темель ясады: бир черчиве тюбюне эки темель эди.

³¹ Акация терегинден сырыкълар ясады. Мескеннинъ бир тарафындаки черчивелери ичюн – беш сырыкъ,

³² экинджи тарафындаки черчивелери ичюн – беш сырыкъ ве гъарпкъа бакъкъан арттаки тарафы ичюн де – беш сырыкъ ясады.

³³ Черчивелерининъ орталарындан башындан сонъунадже кечеджек ичеридеки сырыкъны ясады.

³⁴ Черчивелерини алтыннен къаплады. Сырыкъларны кечирмек ичюн алкъаларны алтындан япты. Сырыкъларны алтыннен къаплады.

³⁵ Мор, мавылы къырмызы, ачыкъ къырмызы юньден ве индже ишленген кетенден перде япып, онынъ устюне усталыкънен Керувларны нагъышлады.

³⁶ Акация терегинден перде ичюн алтын ченгеллери олгъан дёрт дирек япып, оларны алтыннен къаплады. Диреклер тюбюне дёрт кумюш темель япты.

³⁷ Мескеннинъ къапусы ичюн мор, мавылы къырмызы, ачыкъ къырмызы юньден ве индже ишленген кетенден нагъышлангъан перде япты.

³⁸ Перде ичюн ченгеллери олгъан беш дирек япып, оларнынъ тёпелерини ве багъламаларыны алтыннен къаплады. Диреклер ичюн беш тунч темель япты.