Башланув 9 - Мукъаддес Китап

Алла Нухкъа ве онынъ эвлятларына Озь васиетини бере

¹ Алла Нухны ве огъулларыны бойле деп багъышлады: – Догъып чокълашынъыз ве ер юзюни толдурынъыз.

² Ер юзюндеки бутюн айванлар, кок къушлары, ердеки махлюкълар ве денъиздеки эписи балыкълар сизден къоркъсун ве сизинъ огюнъизде титресинлер: олар эписи сизинъ къолунъыздадырлар.

³ Эвель сизге ер юзюнде оськен эр бир шейни бергеним дайын, бутюн айванларны ашамагъа разылыкъ берем.

⁴ Лякин ичинде джаны, демек къаны олгъан этни ашаманъыз.

⁵ Сизинъ къанынъызны, демек джанынъызны алгъанлары ичюн, къан тёккенлерни джезаларым. Эм айванны, эм озь къардашынынъ джаныны алгъан адамны джезаларым.

⁶ Адам Алланынъ къыяфетине коре яратылгъаны ичюн, эгер бирев адамнынъ къаныны тёксе, онынъ къаныны да адам тёксюн.

⁷ Сизлер догъып артынъыз ве ер юзюнде ерлешип чокълашынъыз.

⁸ Сонъ Алла Нухкъа ве онынъ огъулларына:

^9-10 – Сизге ве сизинъ несилинъизге, эписи сандыкътан чыкъкъан ичинде джаны олгъан махлюкъларгъа: къушлар, айванлар ве кийик айванларгъа – бутюн дюньядаки махлюкъларгъа Меним васиетим бар.

¹¹ Васиетим будыр: энди ташкъын сувларындан дюньядаки эписи тири джан къырылмайджакъ, ер юзюни бошаткъан сув ташкъыны бир даа олмайджакъ, – деди.

^12-13 – Ер сакинлерине берген васиетимнинъ бельгиси оларакъ Мен Озь яйымны – кок къушагъыны – булутларда астым. Бу сизге ве бутюн яшагъан махлюкъларгъа эбедиен васиетимнинъ бельгисидир.

¹⁴ Кокте булутларны топлагъанымда, булутлар арасында кок къушагъы пейда олур.

¹⁵ О заман Меним акъылыма сизге ве бутюн махлюкъларгъа берген васиетим келир, ве эр бир джанны ёкъ эткен сув ташкъыны бир даа текрарланмаз.

¹⁶ Булутларда кок къушагъы пейда олур, ве Мен оны корип, ер сакинлерине эбедий берген васиетимни хатырларым, – деди Алла.

¹⁷ Даа Алла Нухкъа: – Бу Меним ер юзюнде яшагъанларнынъ эписине берген васиетимнинъ бельгисидир, – деди.

Нух ве онынъ огъуллары

¹⁸ Сандыкътан чыкъкъан Нухнынъ огъуллары Шем, Хам ве Яфет эдилер. (Хам Ханааннынъ бабасы олды.)

¹⁹ Бу учеви Нухнынъ огъуллары эдилер, ве олардан бутюн ер юзю толдурылды.

²⁰ Нух топракъны ишлемеге башлады ве юзюм багъыны сачты.

²¹ Шарап ичип сархошланды ве озь чадырында чыр-чыплакъ ята эди.

²² Ханааннынъ бабасы олгъан Хам бабасынынъ чыплакълыгъыны корьди ве чыкъып эки агъа-къардашларына икяе этти.

²³ Шем ве Яфет урба алып ве омузларына къойып, арт-артына кеттилер ве бабаларынынъ чыплакълыгъыны къапаттылар. Башкъа тарафкъа бакъып, олар бабаларынынъ чыплакълыгъыны корьмедилер.

²⁴ Нух шараптан айынып, онынъ кичик огълу Хам онен нелер япкъаныны билип,

²⁵ бойле деди: – Ханаан лянет олсун! Озь агъаларында о, къулларнынъ къулу олсун.

²⁶ Сонъ даа бойле деди: – Шемнинъ Алласына, РАББИге шукюрлер олсун! Ханаан онынъ къулу олсун!

²⁷ Алла Яфетнинъ ерлерини кенълештирсин. Яфет Шемнинъ чадырларында яшасын. Ханаан исе онынъ къулу олсун.

²⁸ Сув ташкъынындан сонъ Нух 350 йыл яшады.

²⁹ Нух эписи олып 950 йыл яшады, сонъ о кечинди.