Башланув 5 - Мукъаддес Китап

Адемнинъ эвлятлары

¹ Мына, Адемнинъ эвлятлары акъкъында ривает. Алла адамны яраткъанда, оны Аллагъа ошатып ясады.

² О, оларны эр киши ве къадын киши оларакъ яратты ве оларны багъышлады. Оларны яраткъан куню О, оларгъа «адам» деген ад къойды.

³ Адем 130 яшында олгъанда, онынъ озюне ве къыяфетине ошагъан огълу олды. О, огълуна Шет деген ад къойды.

⁴ Шет догъгъан сонъ, Адем даа 800 йыл яшады, ве онынъ даа огъуллары ве къызлары бар эди.

⁵ Адем эписи олып 930 йыл яшады, сонъ о кечинди.

⁶ Шет 105 яшында олгъанда, онынъ Энош деген огълу олды.

⁷ Энош догъгъан сонъ, Шет 807 йыл яшады, ве онынъ даа огъуллары ве къызлары бар эди.

⁸ Шет эписи олып 912 йыл яшады, сонъ о кечинди.

⁹ Энош 90 яшында олгъанда, онынъ Кенан деген огълу олды.

¹⁰ Кенан догъгъан сонъ, Энош 815 йыл яшады, ве онынъ даа огъуллары ве къызлары бар эди.

¹¹ Энош эписи олып 905 йыл яшады, сонъ о кечинди.

¹² Кенан 70 яшында олгъанда, онынъ Махалалэл деген огълу олды.

¹³ Махалалэл догъгъан сонъ, Кенан 840 йыл яшады, ве онынъ даа огъуллары ве къызлары бар эди.

¹⁴ Кенан эписи олып 910 йыл яшады, сонъ о кечинди.

¹⁵ Махалалэл 65 яшында олгъанда, онынъ Еред деген огълу олды.

¹⁶ Еред догъгъан сонъ, Махалалэл 830 йыл яшады, ве онынъ даа огъуллары ве къызлары бар эди.

¹⁷ Махалалэл эписи олып 895 йыл яшады, сонъ о кечинди.

¹⁸ Еред 162 яшында олгъанда, онынъ Ханокъ деген огълу олды.

¹⁹ Ханокъ догъгъан сонъ, Еред 800 йыл яшады, ве онынъ даа огъуллары ве къызлары бар эди.

²⁰ Еред эписи олып 962 йыл яшады, сонъ о кечинди.

²¹ Ханокъ 65 яшында олгъанда, онынъ Метушелах деген огълу олды.

²² Метушелах догъгъан сонъ, Ханокъ Алланынъ юзю огюнде 300 йыл яшады, ве онынъ даа огъуллары ве къызлары бар эди.

²³ Ханокъ эписи олып 365 йыл яшады.

²⁴ Ханокъ Алланынъ юзю огюнде яшай эди, сонъ о, ёкъ олды, чюнки Алла оны Озюне алды.

²⁵ Метушелах 187 яшында олгъанда, онынъ Ламех деген огълу олды.

²⁶ Ламех догъгъан сонъ, Метушелах 782 йыл яшады, ве онынъ даа огъуллары ве къызлары бар эди.

²⁷ Метушелах эписи олып 969 йыл яшады, сонъ о кечинди.

²⁸ Ламех 182 яшында олгъанда, онынъ огълу олды.

²⁹ Ламех: «О, бизге ишимизден, РАББИ къаргъагъан топракъта агъыр хызметимизден раатлыкъ берер», – деди ве онъа Нух деген ад къойды.

³⁰ Нух догъгъан сонъ, Ламех 595 йыл яшады, ве онынъ даа огъуллары ве къызлары бар эди.

³¹ Ламех эписи олып 777 йыл яшады, сонъ о кечинди.

³² Нух 500 яшында олгъанда, онынъ учь огълу олды: Шем, Хам ве Яфет.