Амос 8 - Мукъаддес Китап

Мейвагъа толу сепет акъкъында руя

¹ РАББИ-ТААЛЯ манъа буны косьтерди: Мына, бир сепет пишкен мейва.

² О, менден: – Амос, сен не коресинъ? – деп сорады. – Бир сепет пишкен мейваны, – деп джевап къайтардым мен. О заман РАББИ манъа: – Исраиль халкъымнынъ сонъу кельди. Бир даа оларны багъышламайджагъым, – деди.

³ – О кунь Алланынъ сарайындаки йырлар агълавларгъа айланаджакъ, – дей РАББИ-ТААЛЯ. – О вакъыт чокъ адам ольдюриледжек. Эр бир ерде олюлерни сес-солукъсыз котерип атаджакълар.

Исраильнинъ джезасы акъкъында укюм

⁴ Эй, фукъарелерни таптагъанлар, заваллыларны чекиштиргенлер, буны динъленъиз!

⁵ Сизлер айтасыз: – Янъы ай тездже кечсин! Биз ашлыгъымызны сатмагъа истеймиз! Раатлыкъ куню тездже кечсин! Богъдайымызны сатувгъа чыкъараджакъмыз, ольчюни уфакълаштыраджакъмыз, фиятыны арттыраджакъмыз, ялан ташларны къулланып алдатаджакъмыз.

⁶ Ёкъсулларны кумюшке сатын аладжакъмыз, фукъарелер ичюн бир чифт сандалет береджекмиз, богъдай ерине кепек сатаджакъмыз.

⁷ РАББИ Якъупнынъ шуретинен ант этти: – Керчектен де, онынъ япкъан ишлеринден ич бирини бир вакъыт унутмайджагъым.

⁸ Шунынъ ичюн ер юзю сарсылмайджакъмы? Устюнде яшагъан эр кес агъламазмы? Бутюн ер, Нил дерьясы киби, котериледжек, Мысыр дерьясы киби къабарып, ашагъы тюшюджек.

⁹ – О куню, – дей РАББИ-ТААЛЯ, – уйледе кунешни батыраджагъым, купе-куньдюз ер юзюни къарартаджагъым.

¹⁰ Байрамларынъызны агълавгъа айландыраджагъым, эписи тюркюлеринъизни дженазе иляхийлерине чевиреджегим. Эр кесни чувал урбасы киймеге меджбур этеджегим, эр кеснинъ баш сачлары тыраш оладжакъ. О куню бирден-бир огълунынъ артындан агълагъанлар киби оладжакъсынъыз. Бу кунни сонъуна къадар аджджы япаджагъым.

¹¹ – Мына, бойле куньлер келе ки, – дей РАББИ-ТААЛЯ, – ер юзюне ачлыкъ ёллайджагъым. Лякин адамлар отьмекни ашамагъа ве сувны ичмеге дегиль, РАББИнинъ сёзлерини динълемеге истейджек.

¹² РАББИнинъ сёзюни тапмакъ ичюн, адамлар денъизден денъизгедже, шимальден гъарпкъадже долашаджакъ да, эписи бир тапамайджакъ.

¹³ О куню гузель къызлар ве йигитлер сувсузлыкътан эслерини джояджакъ.

¹⁴ Самариенинъ пис путларынен ант эткенлер, Даннынъ ве Беэр-Шеванынъ аллаларына ишангъанлар йыкъыладжакъ ве бир даа турып оламайджакъ.