Амос 6 - Мукъаддес Китап

Исраильнинъ ёкъ этилюви

¹ Сионда гъамсыз яшагъанларгъа беля! Самарие дагъында къоркъусыз отургъанларгъа беля! Сиз – миллетнинъ энъ намлы адамларысыз, Исраиль эви сизге ишанып келе.

² Къалне шеэрине кечинъ ве бакъынъ, андан буюк Хаматкъа кетинъ, фелестинлилернинъ Гъат шеэрине тюшюнъ. Бу шеэрлер сизинъ эки падишалыкъларынъыздан яхшымы? Топракълары сизинъ топракъларынъыздан буюкми?

³ Сизлер беля кунюнинъ келювини узакъ саясыз, амансызлыкъ акимиетини якъынлаштырасыз.

⁴ Сизлер фильтишнен япылгъан ятакълар устюнде ятасыз, диванларынъызда кейф чатасыз, энъ яхшы къозуларны ве бакъылгъан бузавларны ашайсынъыз.

⁵ Арфада чалып йырлайсыз, Давут киби, чалгъы алетлеринде чалгъанынъызны тюшюнесиз.

⁶ Чанакъларнен шарап ичесиз, энъ яхшы ягъларнен сюртюлесиз, лякин Юсуф эвлятларынынъ келеджек белясыны къасевет этмейсиз!

⁷ Шунынъ ичюн шимди олар сюргюнликке кеткенлернинъ башында кетеджеклер, ве кейфленгенлернинъ зияфети сонъуна етеджек.

⁸ РАББИ-ТААЛЯ Озю-Озюнен ант этти. РАББИ, Ордуларнынъ Алласы, бойле дей: – Якъупнынъ къопайлыгъындан джиренем, къавийлештирильген сарайларындан юрегим къайта. Шеэрни ве ичиндеки эр шейини душман къолуна береджегим.

⁹ Бир эвде он адам къалса, оларнынъ эписи оледжек.

¹⁰ Олюлернинъ эмджеси я да дженазе ичюн джевапкяр адам кемиклерни эвден алып чыкъмагъа кельгенде, эвнинъ янындаки адамдан: «Эвде даа бирев сагъ къалдымы?» – деп сорайджакъ, о да: «Ёкъ», – деп джевап къайтараджакъ. Кельген исе: «Тынч ол! Шимди РАББИнинъ Адыны анъмагъа олмаз», – дейджек.

¹¹ Мына, РАББИ буюраджакъ, ве буюк эвлер харабеге чевириледжек, кичик эвлер парча-парча оладжакъ.

¹² Атлар къая устюне чапармы? Къаяларны бугъаларнен сюрмеге олурмы? Сизлер исе адалетни зеэрге чевирдинъиз, акъикъат мейвасыны аджджыгъа айландырдынъыз.

¹³ Сизлер Ло-Девар шеэрини енъгенинъизге къуванасыз ве: «Къарнаим шеэрини озь кучюмизнен запт эттик», – дейсиз.

¹⁴ РАББИ, Ордуларнынъ Алласы, бойле дей: – Бакъынъыз, эй, Исраиль эви! Мен сизге къаршы бир душман халкъны чыкъараджагъым, олар сизни Лево-Хаматтан Арава озенине къадар чекиштиреджек.