2 Тимотейге 4 - Мукъаддес Китап

¹ Сени Алланынъ огюнде ве падишалыкъ этмек ичюн келеджек, эм тирилерни, эм олюлерни суд этеджек Иса Месихнинъ огюнде тенбиелейим:

² Алланынъ Сёзюни огрет, келишкен ве келишмеген вакъытта азыр ол, буюк сабырнен ве насиатнен гуналарны ярыкъкъа чыкъар, тенбиеле ве юреклендир.

³ Ойле бир вакъыт келеджек ки, адамлар догъру огретювден юзь чевиреджеклер, оджаларыны озь истеклерине коре сайлайджакълар ве озь бегенген шейлерни динълейджеклер,

⁴ къулакъларыны акъикъат сёзюнден чевирип, масаллар тарафына айланаджакълар.

⁵ Амма сен эр шейге айыныкъ ол, агъырлыкъкъа даян, Къуванчлы Хаберни даркъат, хызметинъни яхшы беджер.

⁶ Мен, Аллагъа кетирильген ичерлик бахшышы киби тёкюлем, бу дюньядан кетеджек вакътым якъынлашты.

⁷ Мен яхшы курештим, чапувымны битирдим, иманымны сакълап къалдым.

⁸ Энди мени инсафлыкъ таджы беклей. Оны манъа адалетли къады олгъан Рабби о куню береджек, ве тек манъа дегиль, Онынъ келювини севгинен беклегенлернинъ эписине де береджек.

Шахсий тилеклер

⁹ Манъа якъын арада кельмеге тырыш.

¹⁰ Демас шимдики дюньяны севип, мени къалдырды ве Тессалонике шеэрине кетти. Креск – Галатиягъа, Тит – Далматиягъа кеттилер.

¹¹ Янымда тек Лука къалды. Маркны озюнънен берабер алып кель, о манъа хызмет ичюн файдалыдыр.

¹² Тихикни мен Эфес шеэрине ёлладым.

¹³ Сен мында кельгенде, Троас шеэринде Къарпнынъ янында мен къалдыргъан урбаны ве китапларны, айрыджа пергамент устюнде язылгъан эльязмаларны алып кель.

¹⁴ Бакъырджы Эскендер манъа чокъ яманлыкъ этти. Рабби онъа япкъанларына ляйыкъ олгъан джезасыны берсин.

¹⁵ Сен ондан сакът ол, чюнки о бизим сёзлеримизге къатты къаршылыкъ косьтерди.

¹⁶ Озюмни биринджи кере къорчалагъанымда, ич кимсе меним тарафымны алмады, аксине, эписи мени ташлап кеттилер. Олар бунынъ ичюн джевап бермесин.

¹⁷ Янымда Рабби турды ве манъа кучь берди, ве шу себептен мен Къуванчлы Хаберни бутюнлей бильдирдим, ве оны бутюн халкълар эшитти. Мен арсланнынъ агъзындан къуртулдым.

¹⁸ Рабби мени адамларнынъ эр бир яман япкъанларындан къорчалайджакъ ве Озюнинъ коктеки Падишалыгъына сагъ-селямет кирсетеджек. Онъа асырлардан асырларгъа шуретлер олсун! Амин.

Селямлар

¹⁹ Прискагъа, Акилагъа ве Онисифорнынъ эвдекилерине селям эт.

²⁰ Эраст Коринт шеэринде къалды. Трофимни хаста алында мен Милет шеэринде къалдырдым.

²¹ Къыш башланмаздан эвель кельмеге тырыш. Эвбул, Пуд, Лин, Клавдия ве бутюн дин къардашлары санъа селям этелер.

²² Рабби сенинъ рухунънен бирликте олсун! Эйилик сизнен олсун!