2 Тессалоникелилерге 3 - Мукъаддес Китап

Дува окъумагъа чагъырув

¹ Ахыр-сонъу, агъа-къардашлар, бизим ичюн дува окъунъыз: Раббининъ Сёзю, сизлерде даркъалгъаны киби, тез даркъалсын ве шуретленсин,

² биз ярамай ве яман адамлардан къуртулайыкъ. Иманы олмагъан адамлар бар да.

³ Рабби ишанчлыдыр. О, сизлерни къуветлештиреджек ве ямандан сакълайджакъ.

⁴ Биз, Раббинен бирликте олып, эминмиз: буюргъанларымызны беджересинъиз ве илериде беджереджексинъиз.

⁵ Рабби юреклеринъизни Алланынъ севгисине ве Месихнинъ сабырына догърултсын.

Иш акъкъында

⁶ Агъа-къардашлар, Раббимиз Иса Месихнинъ Адынен сизлерге буюрамыз: бизден къабул эткен огретювни беджермеген, тенбель яшагъан эр бир агъа-къардаштан узакълашынъыз.

⁷ Озьлеринъиз билесиз: сизге бизден орьнек алмакъ керек. Биз сизинъ аранъызда олгъанымызда, тенбель олмай эдик,

⁸ ич кимсенинъ отьмегини бедава ашамай, лякин, сизинъ ич биринъизге агъыр кельмесин деп, биз гедже-куньдюз токътамайып чалыша эдик.

⁹ Бунъа акъкъымыз олмагъанындан дегиль, сизлерге мисаль косьтермек ичюн ве сиз бизден орьнек аладжагъынъыз ичюн, шуны япа эдик.

¹⁰ Биз сизде олгъанда, сизге буны буюрдыкъ: ким чалышмагъа истемесе, аш ашамасын.

¹¹ Лякин энди базыларынъыз тенбель олгъаныны эшитемиз. Олар ич бир иш япмайлар, амма башкъаларынынъ ишине къарышалар.

¹² Бойле адамларгъа Рабби Иса Месихнинъ Адындан ялварамыз ве буюрамыз: тынч олып, чалышсынлар ве озь къазангъан отьмеклерини ашасынлар.

¹³ Сиз исе, агъа-къардашлар, яхшылыкъ япынъыз ве рухтан тюшменъиз.

¹⁴ Эгер бир адам бу мектюпте язгъан сёзлеримизни динълемесе, оны козьде тутунъыз ве, о, утансын деп, ондан узакълашынъыз.

¹⁵ Бойле адамны душман сайманъыз, амма оны, къардашынъызны киби, тенбиеленъиз.

Сонъки сёзлер

¹⁶ Аманлыкъ Раббиси Озю сизлерге эр вакъыт ве эр шейде тынчлыкъ-аманлыкъ берсин. Рабби сизинъ эпинъизнен олсун!

¹⁷ Мен, Павел, озь къолумнен бу селямны язам. Эр бир мектюбимде бу меним бельгимдир. Мен бойле язам.

¹⁸ Раббимиз Иса Месихнинъ эйилиги сизинъ эпинъизнен олсун!