1 Пётр 5 - Мукъаддес Китап

Алланынъ сюрюси

¹ Сизинъ ортанъыздаки акъсакъалларгъа мен ялварам, – мен де акъсакъалым ве Месих чеккен азапларнынъ шаатым; мен де тезден пейда оладжакъ шуретке къошуладжагъым, –

² сизлерге берильген Алланынъ сюрюсини яхшы бакъынъыз. Бу ишни меджбурий дегиль, Алла бегенген киби, озь истегинъизнен япынъыз. Озь файдасы ичюн дегиль, акъикъий истекнен япынъыз.

³ Сизге ишанып берильген сюрюни хорламанъыз, лякин оларгъа яхшы орьнек косьтеринъиз.

⁴ О вакъытта, Баш Чобан коктен пейда олгъанда, сизлер эбедий шурет таджыны аладжакъсынъыз.

⁵ Яшлар, акъсакъалларны динъленъиз. Эпинъиз бири-биринъизге алчакъгонъюллик косьтеринъиз. Алла къопайларгъа къаршы чыкъа, алчакъгонъюллилерге исе эйилик япа.

⁶ Бойлеликнен, Алланынъ къудретли къолу астында алчакъгонъюлли олунъыз, ве озь вакътында О, сизлерни юксельтеджек.

⁷ Аллагъа бутюн къасеветлеринъизни беринъиз; Онынъ Озю сизлерни къайгъыра.

⁸ Айыныкъ ве козь-къулакъ олунъыз. Душманынъыз Шейтан, окюрген арслан киби, юре ве биревни ютмакъ ичюн къыдыра.

⁹ Къатты иманнен онъа къаршы чыкъынъыз, дюньянынъ эр ериндеки агъа-къардашларынъыз бойле азаплар да чеккенини унутманъыз.

¹⁰ Эр бир эйиликнинъ саиби олгъан Алла бизни Иса Месихте Озь эбедий шуретине чагъырды. Сиз къыскъа бир вакъыт ичинде азап чеккенинъизден сонъ, Алла Озю сизлерни котереджек, къуветлендиреджек, къавийлештиреджек ве темеллештиреджек.

¹¹ Акимиет эбедиен Онынъкидир! Амин.

Селямлар

¹² Буны мен Силуаннынъ ярдымынен (меним фикримдже, о, сизинъ ишанчлы къардашынъыз) сизлерге къыскъадан язып алдым, сизлернинъ гонълюнъизни алмагъа ве сизге бойле шаатлыкъ бермеге истедим: шу – Алланынъ акъикъий эйилигидир. Ондан узакълашманъыз!

¹³ Сизнен берабер сайлангъан Вавилондаки иманлылар джемиети ве огълум Марк сизлерге селям ёллайлар.

¹⁴ Бири-биринъизни севгинен опип селямлашынъыз. Сизге, Иса Месихке инангъанларгъа, тынчлыкъ-аманлыкъ олсун!