TITO 2 - Chatino Tataltepec

Cha' liñi culu'u Tito ji'i̱ ñati̱ cha' caca tso'o tyiquee ngu' lo'o tya'a ngu'

¹ Lo'o nu'u̱ ni, Tito, xcui' cha' liñi culu'u nu'u̱ ji'i̱ ñati̱.

² Culu'u nu'u̱ ji'i̱ ngu' nu cusu' la cha' ná caca cu'bi ngu', cha' xcui' cha' liñi jlya ti' ngu', cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu' li'; culu'u nu'u̱ ji'i̱ ngu' bi' cha' jlya tso'o ti' ngu' lcaa cha' liñi, cha' tyu'u tyiquee ngu' ña'a̱ ngu' ji'i̱ tya'a ñati̱ ngu', cha' talo tyiquee ngu' lo'o ndyu'ni lya' ti' ñati̱ ji'i̱ ngu'.

³ Lo'o jua'a̱ culu'u nu'u̱ ji'i̱ ma' cusu' ñi'ya̱ nu nga'a̱ cha' tyi'i̱ ma' cha' cua'ni chi̱ ma' loo ycui' Ndyosi, cha' ná chcui' ma' cuentyu ji'i̱ ñati̱, cha' ná ca cu'bi ma', cha' culu'u ma' xcui' cha' tso'o ji'i̱ tya'a ñati̱ ma'.

⁴ Li' lo'o ña'a̱ nu cuna'a̱ cuañi' la ji'i̱ ma' cusu', jua'a̱ ca tsa'a̱ ngu' cha' tso'o tsa tyu'u tyiquee ngu' ña'a̱ ngu' ji'i̱ clyo'o ngu', ña'a̱ ngu' ji'i̱ sñi' ngu';

⁵ ca tsa'a̱ nu cuna'a̱ cuañi' la cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu', ñi'ya̱ nu nga'a̱ cha' cua'ni ngu' nu cua ngua lubii cresiya ji'i̱ cuentya ji'i̱ ycui' Ndyosi; ca tsa'a̱ ngu' ñi'ya nu tso'o ti cua'ni ngu' cña to' tyi ngu', ñi'ya̱ caca tya'na ti' ngu' ji'i̱ tya'a ñati̱ ngu', ñi'ya̱ nu taquiya' ngu' ji'i̱ clyo'o ngu'. Si xcui' tso'o ti ndu'ni nu cuna'a̱ cuañi' ni, li' ná ntsu'u cha' chcui' cuxi xa' ñati̱ ji'i̱ ycui' Ndyosi xqui'ya ngu' bi' li'.

⁶ La cui' jua'a̱, ta nu'u̱ cui̱i̱ lo'o nu ngu' qui'yu cuañi' cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu'.

⁷ Xcui' tso'o ti cua'ni nu'u̱, cha' jua'a̱ ca tsa'a̱ nu ngu' cuañi' bi' lcaa cha' tso'o lo'o ña'a̱ ngu' cua ña'a̱ ca cha' nu ndyu'ni nu'u̱; lcaa cha' liñi culu'u tso'o nu'u̱ ji'i̱ ngu' bi', si'i cha' laja ti chcui' nu'u̱ lo'o ngu'.

⁸ Xcui' cha' liñi culu'u nu'u̱ ji'i̱ ngu', cha' ná tucui taca ñacui̱ cha' cuiñi nu'u̱. Ca tyuju'u ti' ngu' nu cuxi tyiquee li', cha' ná caja ñi'ya̱ chcui' ngu' cha' cuxi ji'na li'.

⁹ Chcui' nu'u̱ lo'o ngu' nu laca msu nu ngüi'ya ñati̱ cha' taquiya' ngu' ji'i̱ lcaa cha' nu nchcui' xu'na ngu', cha' tso'o ti cua'ni ngu' lcaa cña ji'i̱ ngu', cha' ná xlyú ngu' cha' hichu̱' nu laca xu'na ngu'.

¹⁰ Ná tso'o si cuaana ngu' msu na nu ntsu'u ji'i̱ xu'na ngu', masi xtyi ti cha'; xcui' cha' liñi cua'ni ngu' msu lacua. Cua'ni chi̱ ngu' loo xu'na ngu', cha' ca cuayá' ti' xa' ñati̱ cha' tso'o tsa laca cha' ji'i̱ ycui' Ndyosi nu ndyu'ni lyaá ji'na.

¹¹ Tso'o tsa ndu'ni ycui' Ndyosi lo'o ñati̱ chalyuu cha' cua nti' Ni cha' clyaá ngu' ji'i̱ nu cuxi;

¹² jua'a̱ cua ngulu'u Ni ji'na ñi'ya̱ taca tyi'i̱ tso'o ti na nde chalyuu. Nti' Ni cha' cua'a na ji'i̱ ycui' ca na, cha' tso'o ti cua'ni na lo'o tya'a ñati̱ na. Taca cua'ni tlyu na ji'i̱ ycui' Ndyosi nu lo'o cua ngulochu̱' na ji'i̱ lcaa cha' cuxi nu ná ndiya ti' Ni ji'i̱, nu lo'o nga'aa ndu'ni na lcaa cha' suba' nu ndiya ti' ñati̱ chalyuu ti.

¹³ Jua'a̱ ti ngulu'u Ni ji'na, cha' taca ca tso'o tyiquee na laja lo'o ntajatya na ji'i̱ ycui' Ndyosi nu tlyu tsa cha' nu ntsu'u ji'i̱ Ni, ni jacua' ca̱a̱ Ni chaca quiya'. Ndubi tsa xee ntsu'u ji'i̱ Ni li', nu lo'o tyu'u tucua Jesucristo nu ngua'ni lyaá ji'na.

¹⁴ Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.

¹⁵ Jua'a̱ laca cha' nu nga'a̱ cha' ta nu'u̱ lo'o ngu', pana lye chcui' nu'u̱ lcaa cha' bi' lo'o ngu'. Culo nu'u̱ cña ji'i̱ ngu', lcaa lo cha' tso'o nu cua'ni ngu', lcaa lo cha' nu ná tso'o cha' cua'ni ngu', cha' nu'u̱ laca loo; ná ta nu'u̱ chacuayá' ji'i̱ ngu' cha' chcui' ngu' cha' cuxi jinu'u̱.