SANTIAGO 4 - Chatino Tataltepec

Ná cua'ni tya'a na lo'o ñati̱ cuxi nu ntsu'u chalyuu

¹ ¿Ni cha' laca lye tsa nxu̱u̱ tya'a ma̱? ¿Ni cha' laca lya' tsa ti' ma̱ ji'i̱ tya'a ñati̱ ma̱? ¿Ha si'i na ndacui tsa ti' ma̱ ji'i̱ scaa na nu ntsu'u ji'i̱ tya'a ñati̱ ma̱? Ná nchca ji'i̱ ma̱ cha' ti̱ ti tyi'i̱ tyiquee ma̱ lo'o tya'a ma̱ xqui'ya lcaa lo cha' cuxi nu ndiya tsa ti' ma̱ ji'i̱.

² Si ntsu'u sca cha' nu tiji̱' tsa ti' ma̱ ji'i̱, lo'o ná ntsu'u chacuayá' cha' caja cha' bi' ji'i̱ ma̱, li' nti' ma̱ cujuii ma̱ ji'i̱ ñati̱, cha' jua'a̱ taca caja cha' bi' ji'i̱ ma̱, nti' ma̱. La cui' jua'a̱ si ndacui tsa ti' ma̱ ji'i̱ sca na nu ná nchca caja ji'i̱ ma̱, li' nchcui' ma̱ cha' ti'í ji'i̱ nu ca ji'i̱ na bi', nxu̱u̱ tya'a ma̱ lo'o ngu' bi' li'. Pana ná ndyiji na nu nti' ma̱ caja ji'i̱ ma̱, xqui'ya cha' ná ndijña ma̱ cha' bi' ji'i̱ ycui' Ndyosi su clyo;

³ masi ndijña ma̱ sca cha' ji'i̱ ycui' Ndyosi, pana cuxi tsa tyiquee ma̱, bi' cha' ná ndyiji cha' bi' ji'i̱ ma̱ li'. Tsa nde ti cha' ntsu'u tyiquee ma̱: cua nti' ma̱ cha' caja ji'i̱ ma̱ cua ña'a̱ ca cha' nu tyaala' tyiquee ycui' ca ma̱, pana ná tso'o cha' ndyu'ni ma̱ jua'a̱;

⁴ cua nguxtyanu ma̱ ji'i̱ ycui' Ndyosi, cua ntsu'u cha' ji'i̱ ma̱ lo'o sca cha' nu cuxi tsa, si jua'a̱ ndyu'ni ma̱. ¿Ha ná nchca cuayá' ti' ma̱ cha' tya'a cusu̱u̱ ycui' Ndyosi laca na, si xcui' cha' ji'i̱ ycui' ca ti na ntsu'u tyiquee na? Na nxu̱u̱ tya'a na lo'o ycui' Ndyosi, si cua'ni tya'a na lo'o nu cuxi nu ntsu'u nde chalyuu.

⁵ Ndi'ya̱ nscua cha' lo quityi ji'i̱ ycui' Ndyosi, lo'o jua'a̱ si'i cha' laja ti nda Ni: “Nu Xtyi'i ycui' Ndyosi nu nda Ni cha' tyanu ne' cresiya ji'na, ntsu'u tsa tyiquee Ni ña'a̱ Ni ji'na; pana yala tsa caca chi̱i̱ ti' Ni ji'na, si lo'o ntsu'u sca cha' cuxi loo”. Jua'a̱ nacui̱ quityi.

⁶ Tlyu la tsiya' ti cha' tso'o nu ndu'ni ycui' Ndyosi lo'o na, cha' xtyucua Ni ji'na. Ndi'ya̱ nscua chaca cha' lo quityi ji'i̱ ycui' Ndyosi: “Ná sca na ta ycui' Ni ji'i̱ ñati̱ nu xcui' tyiji̱loo ji'i̱ tya'a ñati̱ ngu', nti' ngu'; pana quiña'a̱ tsa cha' tso'o ndu'ni Ni lo'o ñati̱ nu tso'o ti ndi'i̱ chalyuu, nu ná ndyu'ni tyucuaa ti' lo'o xa' ñati̱”, nacui̱ quityi bi'.

⁷ Taquiya' ma̱ cha' ji'i̱ ycui' Ndyosi lacua. Xu̱u̱ tya'a ma̱ lo'o nu xña'a̱, lo'o li' xna nu cuxi bi', tyu'u clya bi' su ndi'i̱ ma̱ li'.

⁸ Tso'o tsa xñi ma̱ cha' ji'i̱ ycui' Ndyosi, lo'o li' tucuá Ni cha' ji'i̱ ma̱. Si ntsu'u tsa qui'ya ji'i̱ ma̱, nga'a̱ cha' xtyanu ma̱ lcaa cha' cuxi nu ntsu'u cha' ji'i̱ ma̱ lo'o; jua'a̱ cua'ni tye ma̱ ji'i̱ lcaa cha' cuiñi nu ntsu'u ne' cresiya ji'i̱ ma̱.

⁹ Ntsu'u cha' ca xñi'i̱ ti' ma̱ xqui'ya nu quiña'a̱ tsa cha' cuxi nu ntsu'u ne' cresiya ji'i̱ ma̱, bi' cha' ndu'ni cha' xi'ya ma̱, ndu'ni cha' cunaa ma̱ xqui'ya cha' cuxi bi'. Xi'ya ca ma̱ juani, masi nxtyí tsa ma̱ nquicha'; ca xñi'i̱ tsa ti' ma̱ juani, masi chaa tsa ti' ma̱ nquicha'.

¹⁰ Cua'ni ma̱ cha' ca tyuju'u ti' ma̱ nde loo ycui' Ndyosi ji'i̱ qui'ya nu ntsu'u ji'i̱ ma̱, lo'o li' ta Ni sca se'i̱ tso'o la su tyi'i̱ ma̱ ca su ntucua ycui' Ni.

Ná chcui' na cha' ti'í ji'i̱ ngu' tya'a na

¹¹ Cu'ma̱ tya'a ngusñi ma̱ cha' ji'i̱ Cristo, ná chcui' ma̱ ji'i̱ ngu' tya'a ma̱. Si chcui' cuxi na ji'i̱ ngu' tya'a na ni, si sta na qui'ya ji'i̱ ngu' bi', laca cha' nchcui' cuxi na ji'i̱ lcaa cha' nu nda ycui' Ndyosi Sti na lo'o ñati̱ tya clyo la; na ndacu̱' na ji'i̱ cha' bi'. Jua'a̱ ndyu'u cha' si chcui' na cha' ti'í ji'i̱ ngu' tya'a na. Si ná ndaquiya' na ji'i̱ lcaa cha' nu cua nda ycui' Ndyosi lo'o na, si chcui' cuxi na ji'i̱ cha' bi', na ndacu̱' na ji'i̱ cha' nu cua nda Ni lo'o na; jua'a̱ ndyu'u cha' li'.

¹² Lo'o ycui' Ndyosi ni, sca ti ycui' Ni laca nu cua nda cha' bi' lo'o ñati̱ tya clyo; sca ti ycui' Ni cua'ni cuayá' Ni ji'i̱ lcaa ñati̱ cuentya ji'i̱ cha' bi' nde loo la; sca ti ycui' Ni taca ji'i̱ Ni cua'ni lyaá Ni ji'i̱ ñati̱, nu lo'o cuityi̱ Ni qui'ya nu ntsu'u ji'i̱ ngu'; jua'a̱ ycui' Ndyosi laca nu taca cua'ni tye Ni ji'i̱ ñati̱ tsiya' ti, nu lo'o nti' ti Ni. Ná stu'ba laca ma̱ lo'o ycui' Ndyosi, bi' cha' ná ntsu'u chacuayá' ji'i̱ ma̱ cha' cua'ni cuayá' ma̱ ji'i̱ tya'a ñati̱ ma̱.

Ná chcui' na quiña'a̱ tsa cha' tonu lo'o tya'a ñati̱ na

¹³ Nga'a̱ cha' chcui' na' sca cha' lo'o cu'ma̱, cha' ntsu'u cu'ma̱ nu nchcui' ma̱ ndi'ya̱: “La quee, ca bcha la tsaa ya ca quichi̱ tyijyu' bi'”, nacui̱ ma̱. “Ca bi' tyanu ya tyucui sca yija̱, cha' quiña'a̱ tsa ngana cua'ni ya ca bi'”, nacui̱ ma̱.

¹⁴ Pana ná sca cha' jlo ti' ma̱ tsiya' ti ñi'ya̱ ña'a̱ chalyuu nu caja ji'i̱ ma̱ quee bcha la. Chalyuu su ndi'i̱ na juani, ñi'ya̱ laca sca cuichi coo, jua'a̱ laca bi'; tsiya' ca ndyu'u tucua cuichi coo, lo'o jua'a̱ yala ti ncliji yu'u bi'.

¹⁵ Tso'o la si ndi'ya̱ ti cha' ta ma̱ lo'o ñati̱: “Nde ti tyi'i̱ ya”, ñacui̱ ma̱, “nde cña cua'ni ya; masi cña bi' cua'ni ya, sca ti si ta ycui' Ndyosi chacuayá' cua'ni ya jua'a̱”, ñacui̱ ma̱.

¹⁶ Pana si'i jua'a̱ nchcui' ma̱ juani, cha' tyixi tsa ndyu'ni ma̱ lo'o tya'a ñati̱ ma̱; lye tsa nchcui' tyucuaa ti' ma̱ lo'o ngu' tya'a ma̱. Lcaa quiya' lo'o nchcui' ma̱ jua'a̱, cha' cuxi laca bi'.

¹⁷ Lo'o li' ntsu'u qui'ya ji'i̱ ma̱, cha' ná ntaja'a̱ ma̱ cua'ni ma̱ sca cña tso'o nu ngulo ycui' Ni ji'i̱ ma̱ cha' cua'ni ma̱.