ROMANOS 12 - Chatino Tataltepec

Ta na tyucui ña'a̱ na ji'i̱ ycui' Ndyosi cha' xcui' na tyi'i̱ na chalyuu cuentya ji'i̱ Ni

¹ Cu'ma̱ ngu' tya'a ntsu'u cha' ji'na lo'o Cristo, xqui'ya cha' lye tsa ndu'ni tya'na ti' Ni ji'na, bi' cha' nchcui' na' lo'o ma̱ juani. Ta ma̱ tyucui ña'a̱ ma̱ ji'i̱ ycui' Ndyosi, cha' cua'ni ma̱ cua ña'a̱ ca cña nu nti' Ni cha' cua'ni ma̱ nde chalyuu; ta ma̱ tyucui ña'a̱ ma̱ ji'i̱ Ni cha' xcui' na tyi'i̱ ma̱ chalyuu cuentya ji'i̱ ycui' Ni, cha' laca ma̱ ñi'ya̱ nti' sca msta̱ lu'ú ti. La cui' jua'a̱ nti' ycui' Ndyosi, cha' laca ma̱ ñati̱ ji'i̱ Ni. Na cua laca ntsu'u cha' cua'ni ma̱ jua'a̱.

² Nga'aa ta ma̱ tyempo cha' tatsaa ngu' ji'i̱ ma̱ cha' cua'ni ma̱ cha' cuxi; xa' ña'a̱ tyi'i̱ ma̱ chalyuu juani, cha' cua nchcutsa'a̱ Ni lcaa cha' nu ntsu'u ne' cresiya ji'i̱ ma̱. Bi' cha' caca cuayá' ti' ma̱ cua ña'a̱ ca cña nu nti' ycui' Ndyosi cha' cua'ni ma̱: ña'a̱ cña laca nu tso'o la cha' cua'ni ma̱, ña'a̱ cña nu ndiya la ti' ycui' Ndyosi ji'i̱, ña'a̱ cña nu tyu'u tso'o la ji'i̱ ma̱ su cua ndye cha' bi'; lcaa cha' bi' caca cuayá' ti' ma̱ li'.

³ Tlyu tsa cha' tso'o nu ngua'ni ycui' Ndyosi lo'o na', nu lo'o nda Ni cña jna'; bi' cha' nchcui' tsa na' lo'o ma̱ juani, cha' nga'aa cua'ni tyucuaa ti' ma̱ lo'o xa' ñati̱. Nga'a̱ cha' culacua ti' ma̱ cha' lcaa cña nu cua nchca ji'i̱ ma̱ juani, Cristo ngua'ni cha' caca ji'i̱ ma̱, nu lo'o ngusñi ma̱ cha' ji'i̱ Ni.

⁴ Tyu̱u̱ tsa tya'a tyijya̱ ntsu'u laja cuaña' scaa na, pana scaa cña ntsu'u ji'i̱ scaa tyijya̱ bi'.

⁵ Lo'o jua'a̱ laca na, lcaa tya'a na nu ntsu'u cha' ji'na lo'o Cristo, cha' masi tyu̱u̱ tsa ngu' tya'a na, pana sca ti taju ñati̱ laca na lo'o tya'a na; sca ti ñati̱ laca tsaca na, pana lcaa na stu'ba ti ntsu'u cha' ji'na lo'o tya'a na.

⁶ Xi xa' la cña nchca cua'ni sa scaa na, ña'a̱ cña nu nda Ni chacuayá' cha' cua'ni scaa na, cha' tso'o tsa ntsu'u tyiquee Ni ña'a̱ Ni ji'na. Nu lo'o ntsu'u ngu' tya'a ma̱ nu nchca ji'i̱ ngu' chcui' ngu' sca cha' nu nti' ycui' Ndyosi ta Ni lo'o ma̱, bi' cña cua'ni ngu' lacua. La cui' ñi'ya̱ nduna ngu' bi' cha' nu nda ycui' Ndyosi, ñi'ya̱ ngusñi ngu' cha' bi', la cui' jua'a̱ ta ngu' cha' bi' lo'o ma̱.

⁷ Lo'o nchca ji'i̱ tsaca ma̱ xtyucua ma̱ ji'i̱ tya'a ma̱, tyucui tyiquee ma̱ xtyucua ma̱ ji'i̱ ngu' bi' lacua. Lo'o nchca ji'i̱ tsaca ma̱ culu'u ma̱ cha' liñi ji'i̱ tya'a ma̱, tyucui tyiquee ma̱ culu'u ma̱ cha' bi' ji'i̱ ngu' lacua.

⁸ Nu lo'o ta ma̱ sca cui̱i̱ cuentya ji'i̱ ycui' Ndyosi lo'o ngu', tyucui tyiquee ma̱ ta ma̱ cha' bi' lacua. Nu lo'o ta ma̱ cha' xlya'be ji'i̱ ngu', tyucui tyiquee ma̱ ta ma̱ cha' tso'o ji'i̱ ngu' lacua. Si laca ma̱ loo ji'i̱ ngu' tya'a ma̱, cui'ya ma̱ cuentya cha' tso'o ti cua'ni ma̱ lacua. Nu lo'o cua'ni tya'na ti' ma̱ ji'i̱ ngu', tso'o ti caca tyiquee ma̱ laja lo'o cua'ni ma̱ cña bi' cuentya ji'i̱ ngu' li'.

Ñi'ya̱ nu tso'o la tyi'i̱ na chalyuu si ñati̱ ji'i̱ ycui' Ndyosi laca na

⁹ Cua'ni ma̱ cha' tso'o tsa caca tyiquee ma̱ ña'a̱ ma̱ ji'i̱ xa' la ñati̱, cha' si'i sca cha' nu nda ti ma̱ laca bi', nu lo'o chcui' tso'o ma̱ lo'o ngu', masi lo'o cua'ni ma̱ cha' tso'o lo'o ngu'. Nga'aa taquiya' ma̱ ji'i̱ cha' cuxi, tyucui tyiquee ma̱ clyana ma̱ ji'i̱ cha' tso'o.

¹⁰ Ndi'ya̱ caca tyiquee ma̱ ña'a̱ ma̱ ji'i̱ ngu' tya'a ntsu'u cha' ji'i̱ ma̱ lo'o Cristo: caca ñi'ya̱ si laca ngu' bi' tya'a ngula ma̱ tsiya' ti; bi' cha' cua'ni chi̱ ma̱ loo tya'a ma̱, xti ti cha' tyu'u tyiquee ycui' ca ma̱ li'.

¹¹ Ná cua'ni taja ma̱ lo'o cua'ni ma̱ cña ji'i̱ ycui' Ndyosi; na cua ndyanu Xtyi'i ycui' Ndyosi ca ne' cresiya ji'i̱ ma̱, bi' cha' caca tlyu tyiquee ma̱ cha' cua'ni la ma̱ cña bi'.

¹² Ndu'ni cha' tso'o tsa caca tyiquee ma̱ lo'o jatya ma̱ ji'i̱ ycui' Ndyosi cha' ca̱a̱ Ni cua'ni lyaá Ni ji'i̱ ma̱. Ná xtyanu ma̱ ji'i̱ cha' bi', masi ti'í tsa xcube' ngu' ji'i̱ ma̱ su ndi'i̱ ma̱ chalyuu. Lcaa tsa̱ chcui' ma̱ lo'o ycui' Ndyosi Sti na.

¹³ Nu lo'o lyiji sca na ji'i̱ sca ngu' tya'a ngusñi ma̱ cha' ji'i̱ Cristo, nga'a̱ cha' tya'be cha' tso'o nu ntsu'u ji'i̱ ycui' ca ma̱, cha' ta ma̱ na ji'i̱ ngu' bi', na laca nu lyiji ji'i̱ ngu'. Lcaa tyempo ta ma̱ to' tyi ma̱ cha' tyi'i̱ ñati̱ nu lijya̱ ti.

¹⁴ Chcui' ma̱ lo'o ycui' Ndyosi cuentya ji'i̱ ñati̱ nu ndyu'ni lya' ti' ji'i̱ ma̱; pana ná jña ma̱ cha' tyanu yabe' ji'i̱ ngu' bi', masi xcui' cha' tso'o ti jña ma̱ cuentya ji'i̱ ngu' bi'.

¹⁵ Cua'ni chaa ti' ma̱ lo'o xa' ñati̱, nu lo'o ña'a̱ ma̱ ji'i̱ ngu' cha' chaa ti' ngu' ndi'i̱ ngu'; lo'o jua'a̱ tso'o si caca xñi'i̱ ti' ma̱ lo'o ngu', nu lo'o ña'a̱ ma̱ cha' xñi'i̱ ti ti' ngu' ndi'i̱ ngu'. Cua'ni ma̱ cha' caca stu'ba tyiquee ma̱ lo'o xa' ñati̱.

¹⁶ Sca ti cha' chcui' ma̱ lo'o lcaa ngu' tya'a ntsu'u cha' ji'i̱ ma̱ lo'o Jesucristo; ná cua'ni tyucuaa ti' ma̱ lo'o ngu' ti'i tya'a ma̱, tso'o ti chcui' ma̱ lo'o ngu' bi'. Stu'ba ti tya'a̱ ma̱ lo'o ngu' bi', ná culacua ti' ma̱ cha' nchca la ji'i̱ ycui' ca ma̱.

¹⁷ Nu lo'o cuxi ti cua'ni ngu' lo'o ma̱, ná tya ma̱ cha' cuxi ji'i̱ ngu' chaca quiya'; clyana ma̱ sca cña tso'o nu caca cua'ni ma̱ cuentya ji'i̱ ngu', cha' jua'a̱ ña'a̱ tsa ñati̱ ji'na.

¹⁸ Cua'ni ma̱ cha' cajá ñi'ya̱ tyi'i̱ tso'o ti ma̱ lo'o lcaa ñati̱, cha' ná caja tya'a cusu̱u̱ ma̱.

¹⁹ Cu'ma̱ tya'a tso'o na', ni sca quiya' ná xtyacui ma̱ cha' cuxi ji'i̱ ngu' nu cua'ni lya' ti' ji'i̱ ma̱, masi ta ma̱ tyempo ji'i̱ ycui' Ndyosi cha' xcube' Ni ji'i̱ ngu' bi'. Tso'o la jua'a̱. La cui' jua'a̱ ndyu'u cha' nu nscua lo quityi cusu' ndi'ya̱: “Cña 'na laca cha' caca ñasi̱' na' ji'i̱ ngu', cha' ta na' nu ti'í ji'i̱ ngu', nacui̱ Ni”. Bi' laca cha' liñi nu nda ycui' nu Xu'na na lo'o na.

²⁰ Lo'o jua'a̱ tya nda Ni xi xa' la cha': “Nu lo'o ngujui jbi'ña ji'i̱ tya'a cusu̱u̱ ma̱”, nacui̱ Ni, “tso'o la si ta ma̱ na cacu ngu' bi'; nu lo'o nguityi tsa tya'a cusu̱u̱ ma̱ hitya, ta ma̱ na co'o ngu' li'. Jua'a̱ ta ma̱ sca cha' tyuju'u ti' ji'i̱ ngu'.” Jua'a̱ cha' nscua lo quityi.

²¹ Bi' cha' nga'aa ta ma̱ tyempo ji'i̱ nu cuxi cha' cua'ni bi' ngana ji'i̱ ma̱. Juani taca tyiji̱loo ma̱ ji'i̱ nu cuxi, xqui'ya cha' xcui' cha' tso'o ndyu'ni ma̱.