ROMANOS 11 - Chatino Tataltepec

Si'i lcaa ngu' judío nu nguxtyanu ngu' ji'i̱ ycui' Ni

¹ Ná nti' ycui' Ndyosi tsiya' ti culaya' Ni ji'i̱ ngu' judío, cha' laca ngu' ñati̱ ji'i̱ ycui' Ni. Lo'o jua'a̱ ycui' na' laca na' ngu' judío, cha' sca ti lo tañi na' lo'o jyo'o Abraham; laca na' tya'a jyo'o cusu' Benjamín.

² Nu ngua sa'ni ngusubi ycui' Ndyosi ji'i̱ ngu' Israel, cha' caca ngu' ñati̱ ji'i̱ Ni; juani nga'aa culaya' Ni ji'i̱ ngu' bi'. ¿Ha ná ntsu'u ti' ma̱ cha' nu nscua lo quityi cuentya ji'i̱ nu Elías bi'? Sca jyo'o cusu' nu nda cha' ji'i̱ ycui' Ndyosi lo'o ñati̱ sa'ni ngua jyo'o Elías bi'; pana nu lo'o nchcui' Elías lo'o ycui' Ndyosi, ngusta yu qui'ya ji'i̱ ngu' Israel ndi'ya̱:

³ “Ndyosi Xu'na na', cua ndyujuii ngu' bi' ji'i̱ lcaa ñati̱ nu laca tu'ba jinu'u̱”, nacui̱ nu Elías bi'. “Cua ngüityi̱ ngu' ji'i̱ lcaa su tlyu su ndu'ni tlyu ya jinu'u̱ nquicha'. Chaca tya na' ndyanu na' juani; lo'o jua'a̱ na', cujuii ngu' jna' cua nti' ngu'”, nacui̱ yu ji'i̱ ycui' Ndyosi.

⁴ Li' nguxacui̱ Ni cha' ji'i̱ yu bi': “Ná cube ti' nu'u̱. Tya ndu̱ tya chcati mil tya'a ngu' qui'yu nu caca cña 'na, ñati̱ nu bilya tyu̱ sti̱' slo lcui̱ jo'ó Baal”, nacui̱ Ni ji'i̱ Elías.

⁵ La cui' jua'a̱ laca tyempo juani, si'i lcaa ngu' judío nu nguxtyanu ngu' ji'i̱ ycui' Ndyosi; tya ndi'i̱ xi ñati̱ nu cua ngusubi Ni ji'i̱, xqui'ya cha' tso'o tsa ntsu'u tyiquee Ni ña'a̱ Ni ji'i̱ ñati̱ bi'.

⁶ La cui' jua'a̱ tya'na tsa ti' Ni ña'a̱ Ni ji'na, bi' cha' tso'o tsa ndu'ni Ni lo'o na. Si'i na clyaá na ji'i̱ nu cuxi xqui'ya sca cña nu ngua'ni ycui' ca ti na, cha' ná ntsu'u cha' ñacui̱ na cha' ycui' Ndyosi ngua'ni lyaá ji'na si cua ngua'ni lyaá na ji'i̱ ycui' ca na, nti' na.

⁷ Ndi'ya̱ ngua li': Ná lcaa ngu' Israel ngua ji'i̱ ngu' cua'ni ngu' cha' ca tso'o cresiya ji'i̱ ngu' cuentya ji'i̱ ycui' Ndyosi, ñi'ya̱ ngua ti' ngu' cha' cua'ni ngu'. Ñati̱ nu ngusubi ycui' Ndyosi ji'i̱ ni, ngujui ñi'ya̱ caca cha' bi' ji'i̱ ngu'; pana nu xa' la tya'a ngu' Israel bi', tsa tyempo ti ndyacu̱' jyaca̱ ngu'.

⁸ Ndi'ya̱ nchcui' quityi cusu' cha' ji'i̱ ngu' bi': “Nga'aa nda ycui' Ndyosi chacuayá' cha' ca cuayá' ti' ngu' bi'. Laca ngu' bi' ñi'ya̱ si ntsu'u cloo ngu', pana ná sca na ña'a̱ ngu' tsiya' ti; laca ngu' ñi'ya̱ si ntucuá jyaca̱ ngu', pana ná nduna ngu' tsiya' ti. Lo'o jua'a̱ ña'a̱ ti ndu'ni ngu' bi' juani.”

⁹ La cui' tya'a cha' nda jyo'o rey David, lo'o nacui̱ yu ndi'ya̱: Quiña'a̱ tsa cha' tso'o ngusta ycui' Ndyosi lo mesa ji'i̱ ngu' Israel, pana cua ngunu'u̱ cresiya ji'i̱ ngu' xqui'ya cha' tso'o bi'; bi' cha' nchcube' Ni ji'i̱ ngu', ñi'ya̱ laca si na cua ndyú ngu' ne' sca lco'o, ñi'ya̱ laca si na cua nclyú ngu' cha' ntyucua quee quiya' ngu'.

¹⁰ Tso'o si caca cuityi̱' ti ngu', cha' nga'aa caca ña'a̱ ngu'; tso'o si caja cña ti'i̱ ji'i̱ ngu', cha' catsa hichu̱' ngu' tsiya' ti. Jua'a̱ nscua lo quityi bi'.

Ñi'ya̱ cua'ni lyaá Ni ji'i̱ ngu' xa' tsu'

¹¹ Chaca cha' ñacui̱ na' juani: Nu lo'o nclyú ngu' judío bi', si'i na ngua cuxi ji'i̱ ngu' tsiya' ti; xqui'ya cha' ná ndaquiya' ngu' bi' tsiya' ti ji'i̱ ycui' Ndyosi, bi' cha' ngujui la xi tyempo ji'i̱ ngu' xa' tsu' cha' clyana ngu' ji'i̱ ycui' Ndyosi, cha' cua'ni lyaá Ni ji'i̱ ngu'. Cua nti' ycui' Ndyosi cha' ña'a̱ ngu' judío ñi'ya̱ ngusñi ngu' xa' tsu' cha' ji'i̱ ycui' Ni, lo'o li' jña ngu' judío cha' clyu ti' ji'i̱ ycui' Ni cha' cua'ni lyaá Ni ji'i̱ ycui' ca ngu'.

¹² Jua'a̱ ngua cha' tso'o la ndyuna ngu' tyucui ña'a̱ chalyuu cha' ji'i̱ ycui' Ndyosi, masi cha' cuxi ngua'ni ngu' judío bi'. La cui' jua'a̱ ngua tso'o la cha' ji'i̱ ngu' xa' tsu' cuentya ji'i̱ ycui' Ndyosi, masi ngua cuxi la chalyuu ji'i̱ ycui' ngu' judío. Bi' cha' tlyu tsa cha' tso'o caca, nu lo'o xcutsa'a̱ Ni tyiquee cua ña'a̱ ca ngu' judío lo'o xñi ngu' cha' tso'o nu ji'i̱ Jesús.

¹³ Lo'o cu'ma̱ ngu' xa' tsu' ni, nti' na' ta na' xi cha' lo'o ma̱. Ycui' Ndyosi laca nu ngusubi 'na, cha' tsa'a na' ta na' cha' ji'i̱ Jesús lo'o cu'ma̱ nu ndi'i̱ ma̱ xa' tsu'. Nchcui' na' lo'o cu'ma̱ jua'a̱, xqui'ya cha' ndulo tsa cña nu nda Ni 'na.

¹⁴ Nti' tsa na' cha' lo'o xi ngu' judío tya'a na' jña ngu' ji'i̱ ycui' Ndyosi, cha' ta Ni la cui' ti cha' tso'o nu ntsu'u ji'i̱ ma̱ ji'i̱ ngu' judío bi', cha' caca cua'ni lyaá Ni ji'i̱ ngu' bi'.

¹⁵ Nu lo'o ngulaya' Ni ji'i̱ ngu' judío, li' ngua'ni Ni cha' caca stu'ba cha' ji'i̱ ycui' Ni lo'o ngu' xa' tsu'. Tso'o la tsiya' ti caca cha' lo'o quiñi cha' ji'i̱ Ni lo'o ngu' judío chaca quiya', cha' li' caca ji'i̱ lcaa ñati̱ ñi'ya̱ laca si xa' ta Ni chalyuu ji'i̱ ñati̱ nu cua ngujuii.

¹⁶ Cuentya ji'i̱ ngu' judío ni, na ji'i̱ ycui' Ndyosi laca sca xlyá nu ndya' tya clyo, lo'o li' si cua nda ngu' tsa lo cua ji'i̱ Ni, na ji'i̱ ycui' Ni laca ña'a̱ tsaca ngulu' scua̱ xlyá bi'. La cui' jua'a̱ laca lo'o sca yaca nu ndyataa ngu' cha' caca cuentya ji'i̱ ycui' Ndyosi; lo'o caluu yaca bi', lo'o cuentya ji'i̱ ycui' Ni caca lcaa sta̱' yaca bi'. Ndi'ya̱ ndyu'u tyucuaa cha' bi', cha' ñi'ya̱ ngua jyo'o Abraham ñati̱ ji'i̱ ycui' Ndyosi cha' ngusñi yu cha' ji'i̱ Ni, jua'a̱ laca lcaa ñati̱ chalyuu ñati̱ ji'i̱ ycui' Ndyosi, nu lo'o xñi ngu' cha' ji'i̱ Ni.

¹⁷ Laca ngu' judío ñi'ya̱ si laca ngu' sca yaca cuiñii, sca yaca olivo ni. Na cua ngusi'yu ycui' Ndyosi ji'i̱ tyu̱u̱ tya'a sta̱' yaca bi', ngulotsu' Ni ji'i̱ sta̱' yaca bi' li'; pana juani la cui' ca su ngutucua sta̱' yaca bi' nquicha', ndacua ngusca̱' Ni tyu̱u̱ tya'a sta̱' yaca quixi̱', cha' xñi ca'a̱ sta̱ yaca quixi̱' bi' ji'i̱ yaca cuiñii bi'. Ñi'ya̱ laca sta̱' yaca quixi̱', jua'a̱ laca cu'ma̱ ngu' xa' tsu', cha' cua ngujui la cui' cha' tso'o ji'i̱ ma̱, ña'a̱ cha' tso'o nu ntsu'u ji'i̱ ngu' judío. Laca ma̱ ñi'ya̱ laca si sca ti su̱u̱ yaca laca ma̱ lo'o ngu' judío, si sca ti si'ye laca ma̱ lo'o ngu' bi'.

¹⁸ Bi' cha' ná tso'o laca si culacua ti' ma̱ cha' tso'o la cu'ma̱, cuxi la ngu' judío, nu ngu' nu laca ñi'ya̱ laca sta̱' ycui' yaca. Si jua'a̱ nti' ma̱, tso'o la si tyi'u ti' ma̱ cha' si'i cu'ma̱ nu ndyu'ni cu'ú ma̱ ji'i̱ su̱u̱ yaca bi', la cui' su̱u̱ bi' laca nu nda cha' tso'o ji'i̱ cu'ma̱.

¹⁹ Ná tyiquee' ñacui̱ ma̱ 'na: “Ca su ngusi'yu Ni ji'i̱ sta̱' yaca bi', ca bi' ngujui su xñi ca'a̱ ya ji'i̱ yaca olivo bi'”, ñacui̱ ma̱.

²⁰ Chañi cha' ji'i̱ ma̱. Pana ndi'ya̱ laca cha': cua ngulotsu' ycui' Ndyosi ji'i̱ ngu' judío ji'i̱ yaca bi', xqui'ya cha' ná ngusñi ngu' cha' ji'i̱ Ni; pana cu'ma̱ ni, xqui'ya cha' ngusñi ma̱ cha' ji'i̱ ycui' Ni, bi' ti cha' cua ngujui chacuayá' ji'i̱ ma̱ cha' xñi ca'a̱ ma̱ ji'i̱ yaca bi' ca su ntucua ma̱ juani. Bi' cha' ná ntsu'u cha' cua'ni tyucuaa ti' ma̱ lo'o ngu' judío bi'. Culacua tso'o ti' ma̱ xi.

²¹ Ná ngua'ni ycui' Ndyosi cha' clyu ti' ji'i̱ ngu' judío, ngu' nu laca sta̱' ycui' yaca bi'; ngusi'yu cu' Ni ji'i̱ sta̱' bi'. Lo'o jua'a̱ ná cui'ya Ni cha' clyu ti' ji'i̱ cu'ma̱, si jua'a̱ xtyanu ma̱ ji'i̱ ycui' Ni.

²² Cui'ya ma̱ cuentya lacua, cha' taca ji'i̱ Ni cua'ni tso'o Ni lo'o ñati̱, lo'o jua'a̱ xa' tyempo taca ji'i̱ Ni cua'ni tyaala Ni ji'i̱ ñati̱, si jua'a̱ nti' Ni. Tyaala tsa ngua'ni Ni lo'o ngu' bi', xqui'ya cha' ná ndaquiya' ngu' ji'i̱ ycui' Ni; lo'o jua'a̱ tso'o ti cua'ni Ni lo'o cu'ma̱, si ña'a̱ ti taquiya' ma̱ ji'i̱ Ni nu ndyu'ni tsa cha' tso'o lo'o ma̱. Si nga'aa taquiya' ma̱ ji'i̱ cha' nu nchcui' Ni, la cui' jua'a̱ culaya' Ni ji'i̱ ma̱ li'.

²³ Pana xa' quiñi cha' ji'i̱ ycui' Ndyosi lo'o ngu' judío, si xcutsa'a̱ ngu' bi' cha' nu ntsu'u ne' cresiya ji'i̱ ngu', si taquiya' ngu' ji'i̱ ycui' Ni chaca quiya'. Li' xñi ca'a̱ ngu' ji'i̱ su̱u̱ yaca bi' chaca quiya', la cui' se'i̱ bi' su ngutucua ngu'; taca ji'i̱ ycui' Ndyosi sta tso'o Ni ji'i̱ ngu' judío chaca quiya' ca la cui' su tso'o su ngutucua ngu' clyo.

²⁴ Ná stu'ba cha' ji'i̱ ma̱ lo'o ngu' judío cua sa'ni la. Na cua ngulotsu' ti Ni ji'i̱ ma̱ ca su ngutucua ma̱ lo sca su̱u̱ yaca quixi̱'; li' cua ngusca̱' Ni ji'i̱ ma̱, cha' xñi ca'a̱ ma̱ ji'i̱ su̱u̱ yaca cuiñii bi'. Pana si'i jua'a̱ ndyaluu yaca bi' clyo. Lo'o nu ngu' judío ni, ná tlyu cña masi xa' sca̱' Ni ji'i̱ ngu' lo la cui' su̱u̱ yaca su ngutucua ngu' tya clyo; yala ti xñi ca'a̱ ngu' ji'i̱ su̱u̱ yaca bi' chaca quiya', cha' sta̱' ycui' yaca bi' laca ngu'.

Lo'o cua'ni lyaá Ni ji'i̱ lcaa ngu' judío

²⁵ Cu'ma̱ ngu' tya'a ntsu'u cha' ji'na lo'o Cristo, nti' na' cha' caca cuayá' ti' ma̱ cha' tucui re, sca cha' ji'i̱ ycui' Ndyosi nu ntsu'u cuatsi' ti nquicha'; lo'o caca cuayá' ti' ma̱ cha' re, nga'aa chcui' ma̱ cha' tyixi lo'o ngu' judío li'. Ndi'ya̱ laca cha': Quiña'a̱ tsa tya'a ngu' judío ntsu'u nu ndyacu̱' hique ngu' tsiya' ti, cha' ná caca cuna ngu' cha' ji'i̱ Jesús; ña'a̱ cuayá' nu tye cuna lcaa ngu' xa' tsu' nu nga'a̱ cha' xñi cha' ji'i̱ Jesús,

²⁶ li' cua'ni lyaá ycui' Ndyosi ji'i̱ lcaa ngu' nu chañi ca tya'a ñati̱ ji'i̱ Israel. Ndi'ya̱ nscua cha' lo quityi cusu': Tya̱a̱ nu cua'ni lyaá ji'i̱ ma̱, nde quichi̱ Sión bi' tyu'u yu ca̱a̱ yu. Culotsu' yu bi' lcaa cha' cuxi nu ntsu'u ji'i̱ ngu' Israel tya'a yu,

²⁷ lo'o li' cuityi̱ na' lcaa qui'ya nu ntsu'u ji'i̱ ngu' bi', nacui̱ ycui' Ndyosi. Li' tyu'u tucua cha' nu nguxquiñi na' lo'o ngu' bi' nu ngua sa'ni. Jua'a̱ nchcui' quityi.

²⁸ Tya'a cusu̱u̱ ycui' Ndyosi laca ngu' judío juani, xqui'ya cha' ná jlya ti' ngu' cha' chañi cha' cua ngua'ni lyaá Ni ji'i̱ ngu'; bi' cha' cua ngujui la xi tyempo ji'i̱ cu'ma̱ ngu' xa' tsu', cha' xñi ma̱ cha' ji'i̱ Jesucristo xqui'ya ngu' judío. Pana ña'a̱ ti tya ntsu'u tsa tyiquee ycui' Ndyosi ña'a̱ Ni ji'i̱ ngu' bi', xqui'ya cha' cua ngusubi Ni ji'i̱ jyo'o cusu' ji'i̱ ngu' bi' tya clyo cha' caca ngu' ñati̱ ji'i̱ Ni.

²⁹ Ná tya'a̱chu̱' ycui' Ni ji'i̱ sca cha' nu cua nda Ni lo'o na, ná culaya' Ni ji'i̱ sca ñati̱ nu ntsu'u cha' ji'i̱ lo'o ycui' Ni.

³⁰ Lo'o jua'a̱ cu'ma̱, ná ndaquiya' ma̱ cha' ji'i̱ ycui' Ndyosi cua sa'ni la; pana tya'na ti' Ni ña'a̱ Ni ji'i̱ ma̱ nu lo'o nga'aa jlya ti' ngu' judío ji'i̱ Ni.

³¹ Masi ná ndaquiya' ngu' judío bi' ji'i̱ ycui' Ndyosi juani, pana la cui' jua'a̱ cua'ni tya'na ti' ycui' Ndyosi ji'i̱ ngu' bi' ca nde loo la, ñi'ya̱ nu ndu'ni tya'na ti' Ni ji'i̱ ma̱.

³² Sca ti cuayá' nguxtyanu Ni ji'i̱ lcaa ñati̱ chalyuu cha' ná taquiya' ngu' ji'i̱ ycui' Ni, si jua'a̱ nti' ngu', cha' jua'a̱ ná ntaja'a̱ ngu' taquiya' ngu' ji'i̱ Ni tsiya' ti. Pana tiya' la li' caca ji'i̱ ycui' Ni cua'ni tya'na ti' Ni ji'i̱ ngu' lo'o clyana ngu' ji'i̱ Ni chaca quiya'.

³³ Tlyu tsa cha' tso'o ndyu'u ca slo ycui' Ndyosi; lcaa cha' nchca cuayá' ti' Ni, lcaa cha' jlo ti' ycui' Ni. Sca ti ycui' Ndyosi jlo ti' na ca laca nu lijya̱ nde loo la, sca ti ycui' Ndyosi jlo ti' na laca nu ndu'ni ycui' Ni. Ndi'ya̱ cha' nscua lo quityi cusu' cuentya ji'i̱ cha' bi':

³⁴ “¿Tilaca caca cuayá' ti' ñi'ya̱ laca cha' nu ca'ya hique ycui' Ni? ¿Ha ntsu'u ñati̱ nu nchca ji'i̱ ta sca cui̱i̱ lo'o ycui' Ndyosi?

³⁵ Ná caja ñi'ya̱ nu ta na sca na nu jña ycui' Ni, cha' tiya' la tya Ni caya' ji'i̱ ji'na.”

³⁶ Lcaa na nu ntsu'u chalyuu, na ji'i̱ ycui' Ndyosi laca bi', cha' cua ngüiñá ycui' Ni lcaa na, cha' caca bi' cña ji'i̱ Ni. Nga'aa caca tye cha' cua'ni tlyu na ji'i̱ ycui' Ndyosi. Lo'o jua'a̱ chañi tsa cha' bi'.