LOS HECHOS 6 - Chatino Tataltepec

Nda ngu' cña ji'i̱ nu cati tya'a ñati̱

¹ Tyempo bi' ngua quiña'a̱ la ngu' tya'a ngu' judío nu cua ngusñi cha' ji'i̱ Jesucristo, pana ná stu'ba ntsu'u tyiquee ngu' nu nchcui' cha' griego lo'o ngu' nu nchcui' cha'cña ji'i̱ ngu' judío: ―Ná stu'ba ndacha ngu' na cacu nu cuna'a̱ ti'i ―nacui̱ ngu' nu nchcui' cha' griego―. Ná tso'o ndu'ni ngu', cha' nda ngu' ji'i̱ nu cuna'a̱ ti'i nu nchcui' cha'cña ji'i̱ ngu' judío, lo'o jua'a̱ ná nda ngu' ji'i̱ nu cuna'a̱ ti'i tya'a ya nu nchcui' cha' griego ―nacui̱ ngu'.

² Bi' cha' nguane nu tii tyucuaa tya'a ngu' bi' ji'i̱ ngu' cha' tyu'u ti'i̱ lcaa ngu' nu laca ñati̱ ji'i̱ Jesucristo, cha' chcui' ngu' lo'o ñati̱ bi': ―Ntsu'u cña ji'i̱ ya cha' culu'u ya cha' ji'i̱ ycui' Ndyosi ji'i̱ lcaa ñati̱ ―nacui̱ ngu' nu ngua tsa'a̱ ji'i̱ Jesús bi'―, bi' cha' ná tso'o si xcui' ndya'a̱ tyiquee ya ji'i̱ na cacu ngu' re ―nacui̱ ngu' bi'―.

³ Cu'ma̱ ngu' tya'a na, tso'o la si subi ma̱ tya chcati tya'a ngu' tya'a ma̱ nu caca cña bi', cha' stu'ba ti xtyucua ngu' ji'i̱ lcaa ngu' ti'i tya'a na. Nga'a̱ cha' caca ngu' bi' ñati̱ nu tso'o tsaa nchcui' ngu' ji'i̱, ñati̱ nu nclyacua tso'o ti', ñati̱ nu ntsu'u Xtyi'i ycui' Ndyosi ne' cresiya ji'i̱ cha' ta la juersa ji'i̱, cha' taca cña'a̱si̱i̱ tso'o ngu' lcaa na nu ntsu'u ji'na. Tso'o si jua'a̱ laca ñati̱ nu cua'a̱ lo ma̱ cña ji'i̱ cha' caca ngu' cña bi'.

⁴ Li' caja la xi tyempo cha' chcui' ya lo'o ycui' Ndyosi, cha' culu'u ya cha' ji'i̱ Jesucristo ji'i̱ xa' ñati̱.

⁵ ―Tso'o lacua ―nacui̱ lcaa ngu'―, jua'a̱ cua'ni ya. Li' ngusubi ngu' ji'i̱ Esteban, sca yu nu jlya tsa ti' ji'i̱ Jesucristo; chañi cha' ntsu'u Xtyi'i ycui' Ndyosi ne' cresiya ji'i̱ yu bi'. Lo'o jua'a̱ ngusubi ngu' ji'i̱ Felipe, lo'o ji'i̱ Prócoro, lo'o ji'i̱ Nicanor, lo'o ji'i̱ Timón, lo'o ji'i̱ Parmenas, lo'o ji'i̱ Nicolás nu ngu' quichi̱ Antioquía. Ñi'ya̱ nu jlya ti' ngu' judío, jua'a̱ jlya ti' Nicolás nu ngua tya clyo la.

⁶ Li' ndyaa lo'o lcaa ñati̱ nu ndi'i̱ bi' ji'i̱ nu cati tya'a ngu' bi' slo nu tii tyucuaa tya'a ngu' nu ngua tsa'a̱ ji'i̱ Jesucristo tya clyo. Lo'o nu tii tyucuaa tya'a ngu' bi' ni, nchcui' ngu' lo'o ycui' Ndyosi cha' ji'i̱ nu cati tya'a ngu' bi'. Cuati ngusta ya' ngu' hique nu cati tya'a ngu' bi' chacuayá' ji'i̱ ycui' Ndyosi, cha' tyanu ngu' lo cña bi'.

⁷ Lcaa tsa̱ nda ngu' cha' ji'i̱ ycui' Ndyosi lo'o quiña'a̱ la ñati̱ nu ntaja'a̱ cua'a̱ jyaca̱ ji'i̱ cha' bi'. Jua'a̱ ngua quiña'a̱ la ngu' nu ndyaca tsa'a̱ cha' ji'i̱ Jesucristo nde quichi̱ Jerusalén, lo'o jua'a̱ ngua tyu̱u̱ tya'a sti jo'ó ji'i̱ ngu' judío nu ngusñi cha' ji'i̱ Jesucristo li'.

Ngusñi ngu' ji'i̱ Esteban

⁸ Tso'o tsa ntsu'u tyiquee nu Esteban bi' xqui'ya Xtyi'i ycui' Ndyosi. Cua nda ycui' Ndyosi chacuayá' cha' ngua'ni yu tyu̱u̱ tya'a cña tonu cha' cube tsa ti' xa' ñati̱.

⁹ Pana ntsu'u ñati̱ nu lijya̱ ngutu'u nde xa' loyuu nu naa Cirene, lo'o ngu' quichi̱ Alejandría, lo'o ngu' Cilicia, lo'o ngu' Asia; ca ta'a ngu' ndya'a̱ ngu' ne' laa ji'i̱ ngu' libertades, su ndyu'u ti'i̱ ngu' nu ngua preso ji'i̱ ngu' tsubi' la. Li' nguxana ngu' bi' nxu̱u̱ tya'a tsa ngu' lo'o Esteban.

¹⁰ Ná ngua ji'i̱ ngu' cua'ni ngu' ngana ji'i̱ Esteban, cha' cua nda Xtyi'i ycui' Ndyosi juersa ji'i̱ yu cha' caja ñi'ya̱ xtyacui yu cha' lo'o ngu' bi'.

¹¹ Li' nguane ngu' bi' ji'i̱ xa' ñati̱ cha' ta ngu' xi cha' cuiñi lo'o ngu' quichi̱. Nacui̱ ngu' cuiñi bi' cha' cua ndyuna ngu' cha' suba' nu nchcui' Esteban ji'i̱ ycui' Ndyosi; lo'o jua'a̱ ji'i̱ jyo'o Moisés nchcui' yu cha' cuxi, nacui̱ ngu' cuiñi bi'.

¹² Nda ngu' cuiñi bi' cha' bi' lo'o lcaa ngu' quichi̱, masi lo'o ngu' cusu', masi lo'o ngu' nu nclyu'u cha' jo'ó ne' laa. Ndyuna ngu' cha' nu nchcui' nu ngu' cuiñi bi' lo'o ngu', ngunasi̱' tsa ngu' ji'i̱ Esteban li'. Ngusñi ngu' ji'i̱ yu, ndyaa lo'o ngu' ji'i̱ yu slo ngu' nu laca loo cha' caca cuayá' ji'i̱ yu lo'o ngu'.

¹³ Lo'o jua'a̱ ndacua nga'a̱ ngu' nu nchcui' cha' cuiñi bi': ―Lcaa tsa̱ chiya'a̱ nchcui' nu qui'yu re ―nacui̱ ngu' cuiñi bi'―. Nchcui' ca'a̱ yu ji'i̱ laa tonu re, lo'o jua'a̱ nchcui' ca'a̱ yu ji'i̱ quityi nu nscua cña lo, la cui' cña nu ngulo ycui' Ndyosi ji'na ―nacui̱.

¹⁴ Cua ndyuna ya lo'o nchcui' yu re cha' cua'ni ñu'u̱ Jesús ji'i̱ laa tonu re, la cui' Jesús Nazaret ni. Lo'o jua'a̱ xa' la cha' ngulu'u yu ji'i̱ ñati̱, nu ná stu'ba lo'o cha' nu nguscua jyo'o Moisés cua sa'ni la; pana cua nguscua liñi jyo'o Moisés lcaa ña'a̱ cña ji'i̱ ycui' Ndyosi nu nga'a̱ cha' cua'ni na ―nacui̱ nu ngu' cuiñi bi' ji'i̱ ngu'.

¹⁵ Ña'a̱ tsa ngu' cusu' nu laca loo bi' ji'i̱ Esteban li', cha' ñi'ya̱ ña'a̱ loo xca̱ ji'i̱ ycui' Ndyosi, jua'a̱ ña'a̱ loo Esteban, cha' laca yu sca ñati̱ nu lubii tsa cresiya ji'i̱.