HEBREOS 6 - Chatino Tataltepec

¹ Cua'ni yala na lacua, cha' cuna tso'o na lcaa cha' nu ntsu'u ji'i̱ Cristo; cua'ni na cha' caca na ñati̱ nu nclyacua tso'o ti ti', cha' ná tso'o si xcui' na nchcui' na ji'i̱ cha' nu ngua tsa'a̱ na tya clyo ti. Juani cua jlo tso'o ti' na macala ntucua quiya' cha' ji'i̱ Cristo: cua nchcui' na ñi'ya̱ caca tyu'utsu' na ji'i̱ cha' cuxi nu ngua'ni na tya sa'ni la, ñi'ya̱ caca xñi na cha' ji'i̱ Cristo;

² jua'a̱ cua nchcui' na ñi'ya̱ caca tyucuatya na chacuayá' ji'i̱ Cristo, ñi'ya̱ caca sta ya' ngu' hique na chacuayá' ji'i̱ Cristo; cua nchcui' na cha' tya tyu'ú na chaca quiya' nde loo la, masi cua ngujuii na, cha' li' ntsu'u cha' cua'ni cuayá' Ni ji'i̱ lcaa na lo'o tya'a na.

³ Lo'o nu juani ni, nga'a̱ cha' cua'ni yala ti na cha' taquiya' na lcaa cha' ji'i̱ Jesús nu tya lyiji xñi tso'o na; jua'a̱ cua'ni na lacua, si tya ta la ycui' Ndyosi xi chalyuu ji'na.

⁴ Ná caja ñi'ya̱ cua'ni na lo'o ñati̱ nu nguxtyanu tsiya' ti ji'i̱ cha' bi'. Cua jlo ti' ngu' ñi'ya̱ laca lo'o cua ndyaala hique ngu' cha' ngulacua tso'o ti' ngu', jua'a̱ cua jlo ti' ngu' cha' tso'o tsa cua ña'a̱ ca cha' nu nda ycui' Ndyosi ya̱a̱ slo ngu'. Lo'o ngu' bi', cua ngua'ni Xtyi'i ycui' Ndyosi cña ne' cresiya ji'i̱ ngu' xqui'ya Jesús nquicha'.

⁵ Cua jlo ti' ngu' bi', cha' cua na'a̱ ngu' cha' tso'o tsa lcaa cha' nu nacui̱ Ni ji'na cha' cua'ni Ni lo'o na; cua na'a̱ ngu' bi', cha' tlyu tsa cha' nu ndyaca lo'o cua nguxana tyalaa chalyuu cucui ji'i̱ ycui' Ndyosi ca su ndi'i̱ ngu'.

⁶ Lo'o li' cua ndya'a̱chu̱' ngu' bi' ji'i̱ Jesús. Nga'aa caca cua'ni na cha' chaca quiya' xñi tso'o ngu' bi' cha' ji'i̱ Jesús; xcui' na nda ngu' bi' cha' ti'í ji'i̱ Jesús nu sca ti Sñi' ycui' Ndyosi, cha' ndyu'ni ngu' ñi'ya̱ laca si ntyiji'i̱ ca'a̱ ngu' ji'i̱ Jesús lo crusi chaca quiya', cha' xa' xtyí lo'o ti ñati̱ chalyuu ji'i̱ yu.

⁷ Ñi'ya̱ nti' sca yuu tso'o su ndyu'ni ngu' cña ni, lu'ba ti nda'ya tyo ndyalú lo yuu bi'; ndyi'yu yuu hitya tyo bi' li', cha' jua'a̱ nxtyucua ycui' Ndyosi ji'i̱ yuu cha' tyucua na cuiñii nu cua ndyataa lo yuu, cha' cua'nijo'o ji'i̱ ngu' nu ndyu'ni cña bi'.

⁸ Pana ná tso'o yuu tsiya' ti si tyucua xcui' quixi̱', xcui' yaca quiche'; xtyanu ngu' ji'i̱ yuu nu ndu'ni jua'a̱, cha' ñi'ya̱ laca si cua ngusta ycui' Ndyosi yabe' ji'i̱ yuu bi', jua'a̱ ndyu'u cha'. Nga'a̱ cha' cua'a̱ ngu' quii' lo yuu bi', cha' tye tyaqui̱ lcaa na cuxi nu ntsu'u ca ndacua. Ñi'ya̱ nu caca ji'i̱ yuu nu ná tso'o tsiya' ti bi', jua'a̱ caca cuxi ji'na si xtyanu na cha' ji'i̱ Jesús.

Ña'a̱ ti tya xñi tso'o na cha' ji'i̱ ycui' Ndyosi, cha' ná xtyanu chca Ni ji'na

⁹ Cu'ma̱ tya'a tso'o na, nu ntsu'u tsa tyiquee ya ña'a̱ ya ji'i̱ ma̱, nga'aa ntsu'u cha' culacua ti' ya cha' ji'i̱ ma̱ jua'a̱, masi nchcui' ya ñi'ya̱ nu cua nchcui' ca ti ya. Cua jlo ti' ya cha' tso'o ti ndyaca ji'i̱ ma̱ juani, tya lo'o ngua'ni lyaá Jesús ji'i̱ ma̱ ji'i̱ nu cuxi.

¹⁰ Lo'o jua'a̱ liñi tsa ndu'ni ycui' Ndyosi lo'o na. Ná cjlyaa ti' Ni lcaa cha' tso'o nu cua ndyu'ni ma̱, nu lo'o nxtyucua ma̱ ji'i̱ ngu' tya'a ngusñi na cha' ji'i̱ Jesús, cha' cua quiña'a̱ xi cña ndyu'ni ma̱ cuentya ji'i̱ ngu' bi'. Xqui'ya cha' ndyu'ni ma̱ jua'a̱, bi' cha' jlo ti' xa' ñati̱ cha' ntsu'u tsa tyiquee ma̱ ji'i̱ Jesús, cha' ña'a̱ ti tya ndyu'ni ma̱ cha' tso'o lo'o ngu' juani.

¹¹ Tso'o si ña'a̱ ti tya cua'ni ma̱ tyucui tyempo nde loo la nti' ya, cha' ndu̱ ti' ma̱ ji'i̱ ycui' Ndyosi ña'a̱ cuayá' tyu'u tucua lcaa cha' nu cua nchcui' Ni lo'o ma̱.

¹² Ná nti' ya cha' caca taja ma̱; na cua nti' ya cha' cua'ni ma̱ ñi'ya̱ nu ngua'ni xa' la tya'a ngusñi na cha' ji'i̱ Jesús tya clyo la, nu cua ndalo tsa tyiquee cha' ndu̱ ti' ngu' ji'i̱ ycui' Ndyosi. Bi' cha' cua ngujui lcaa cha' ji'i̱ ngu', ñi'ya̱ nu nacui̱ Ni cha' tyacua ji'i̱ ngu'.

¹³ Nu ngua sa'ni la lo'o ngüiñi cha' ji'i̱ ycui' Ndyosi lo'o jyo'o Abraham, li' ngulotu̱ Ni xtañi ycui' Ni lo'o nacui̱ Ni ndi'ya̱ ji'i̱ nu cusu' bi': “Chacuayá' ji'i̱ ycui' ca ti na' cua'ni na' cña bi' cuentya jinu'u̱”, nacui̱ Ni. Nga'aa ntsu'u la xa' ñati̱ nu tlyu la cha' ji'i̱ que ycui' Ndyosi, bi' cha' ngulotu̱ Ni xtañi ycui' Ni, cha' quiñi cha' ji'i̱ Ni lo'o Abraham bi'.

¹⁴ Xa' nchcui' Ni lo'o jyo'o bi' li': “Chañi cha' nu chcui' na' lo'o nu'u̱, cha' tso'o tsa cua'ni na' lo'o nu'u̱, cha' quiña'a̱ tsa ñati̱ jinu'u̱ tyatu̱ nde lo yuu tyempo ca nde loo la”. Jua'a̱ nacui̱ Ni nu ngua li'.

¹⁵ Ndalo tsa tyiquee Abraham bi' li', cha' ndu̱ ti' yu ji'i̱ cha' nu nda ycui' Ndyosi lo'o yu; bi' cha' ngutu'u tucua lcaa cha' ji'i̱ yu, ñi'ya̱ nu cua nacui̱ Ni ji'i̱ yu cha' caca ji'i̱.

¹⁶ Ndi'ya̱ ndu'ni ñati̱ chalyuu: Si nti' ngu' cha' tyanu tachaa sca cha' nu cua quiñi ti ji'i̱ ngu' lo'o tya'a ngu', li' nclyotu̱ ngu' tañi sca jo'ó, masi xtañi sca ñati̱ tlyu laja lo'o nda ngu' cha'; ná caja ñi'ya̱ xu̱u̱ tya'a ngu' cuentya ji'i̱ cha' bi' li'.

¹⁷ La cui' jua'a̱ ngua'ni ycui' Ndyosi. Ngua ti' Ni cacha' liñi Ni ji'i̱ ngu' ñi'ya̱ nu caca cha' bi' ji'i̱ ngu' bi' ca nde loo la, cha' ca cuayá' ti' ngu' cha' nga'aa tya'a̱chu̱' Ni tsiya' ti ji'i̱ sca cha' nu cua nacui̱ Ni tsaca quiya'; bi' cha' xtañi ycui' Ni ngulotu̱ Ni clyo, cha' jua'a̱ ngüiñi cha' ji'i̱ Ni lo'o jyo'o bi'.

¹⁸ Xqui'ya lcaa cha' bi' cua jlo ti' na cha' ná nga'a̱ cha' cha'a̱ tsiya' ti sca cha' nu cua nacui̱ ycui' Ndyosi cha' caca, cha' ná nti' Ni cñilo'o Ni ji'na tsiya' ti. Tso'o ti ndi'i̱ tyiquee na juani, cha' ni sca cha' cuxi ná taca xcutsi̱i̱ ji'na, xqui'ya cha' jlya ti' na cha' nu nda ycui' Ndyosi lo'o na; cua ngua'ni Ni cha' ndyaca tlyu la tyiquee na, cha' xñi tso'o na lcaa cha' nu cua nchcui' Ni lo'o na ña'a̱ cuayá' nu tyu'u tucua cha' bi'.

¹⁹ Ñi'ya̱ nti' chcua̱ ngratu nu nsalú ngu' nde siyu' yaca ni'i̱, cha' tachaa ti xñi ca'a̱ chcua̱ bi' ji'i̱ quee nde siyu' hitya, cha' tyacui se'i̱ ti yaca ni'i̱ bi' lo hitya, cha' ná caca tyu'utsu' yaca ni'i̱ bi' tsiya' ti li'; la cui' jua'a̱ ndu'ni Jesús lo'o na, cha' ndu'ni yu cha' tyanu tachaa cha' ji'i̱ ycui' Ni ne' cresiya ji'na, cha' ná tya'a̱chu̱' na ji'i̱ Ni tsiya' ti. Cua ndyalaa Jesús nde cua̱, ñi'ya̱ laca si cua nteje tacui yu tasá tlyu nu ndacui cla'be ne' laa tonu; juani cua ndyaa tucua yu la cui' ca su ntucua ycui' Ndyosi.

²⁰ Cuentya ji'na, cua ndyaa Jesús ca bi' nde loo la, cha' taca xtyucua yu ji'na. Ná nga'a̱ cha' tye cha' laca Jesús sti jo'ó nu laca loo la cuentya ji'na; la cui' ñi'ya̱ nu ngua'ni jyo'o Melquisedec nu ngua sa'ni, jua'a̱ cua'ni Jesús cuentya ji'na juani.