HEBREOS 10 - Chatino Tataltepec

¹ Nu lo'o nduna na xcui' cha' cusu' nu nda jyo'o Moisés lo'o jyo'o cusu' ji'na, ná nchca ca cuayá' ti' na ñi'ya̱ tyacua cha' tso'o ji'na nde loo la xqui'ya Jesús, cha' ná nchcui' cha' cusu' bi' ji'na ñi'ya̱ caca lcaa cha' bi'; xti tsa cha' ndacha' cha' cusu' bi' ji'na, ñi'ya̱ nti' sca cuityi nu sta cuayá' ti ñi'ya̱ caca sca cña lo yuu. Nu ngu' judío tya'a na, lcaa yija̱ ndu'ni ngu' la cui' ca ti cha'; lcaa yija̱ ndya'a̱ lo'o ngu' ji'i̱ la cui' ca msta̱ cha' cati̱ qui'ya nu ntsu'u ji'i̱ ngu' lo'o ycui' Ndyosi chaca quiya', xqui'ya cha' ná ntsu'u su tye cña tacati nu ndyu'ni ngu', cha' ná nchca cua'ni lubii msta̱ nu ndya'a̱ lo'o ngu' ne' laa ji'i̱ cresiya ji'i̱ ñati̱ bi' cuentya ji'i̱ ycui' Ndyosi.

² Ná ndyiji ñi'ya̱ nu cua'ni lubii cha' cusu' bi' ji'i̱ cresiya ji'i̱ ngu' bi', nu lo'o ndya'a̱ ngu' ndu'ni tlyu ngu' ji'i̱ Ni. Si ngua lubii cresiya ji'i̱ ngu', nga'aa ngua tii ngu' yabe' nu ntsu'u ji'i̱ ngu' li'; nga'aa nti' cha' tya̱lo'o ngu' ji'i̱ msta̱ ji'i̱ ngu' chaca quiya' li'.

³ Pana tsa bi' ti cña ndu'ni msta̱ bi' cuentya ji'i̱ ngu': lcaa yija̱ tsiya' ti ndu'ni cha' ndyi'u ti' ngu' cha' tya ntsu'u qui'ya ji'i̱ ngu' lo'o ycui' Ndyosi;

⁴ ná nchca cati̱ qui'ya nu ntsu'u ji'i̱ ñati̱, masi nscui̱ sti jo'ó tañi toro, masi nscui̱ tañi chivo lo ngu'.

^5-6 Nu lo'o tya lyiji ca̱a̱ Cristo lo yuu chalyuu, li' nchcui' Ni lo'o ycui' Ndyosi Sti Ni. Ndi'ya̱ nacui̱ Ni: Nga'aa nti' nu'u̱ cha' ca̱lo'o ngu' ji'i̱ na'ni nu tyaqui̱ cha' caca msta̱, nacui̱ Cristo ji'i̱ ycui' Ndyosi. Ná tso'o nti' nu'u̱ ña'a̱ nu'u̱ ji'i̱ ngu' su ndaqui̱ ngu' na'ni lo mesa quii', cha' caca bi' msta̱; masi xa' ña'a̱ msta̱ sta ngu' cha' cuityi̱ qui'ya nu ntsu'u ji'i̱ ngu', nga'aa ndiya ti' nu'u̱ cha' bi'. Pana cua ta ti nu'u̱ cuaña' 'na, cha' caja ñi'ya̱ ca̱a̱ na' nde lo yuu chalyuu, nacui̱ Cristo.

⁷ Bi' cha' cua lijya̱ na' ca nde juani, Ndyosi Sti na', cha' cua'ni na' cua ña'a̱ ca cña nu nti' nu'u̱ cha' cua'ni na', ñi'ya̱ nchcui' cha' nu nscua lo quityi cusu' cuentya jna'. Jua'a̱ ngua cha' nu nda Cristo nu ngua li'.

⁸ Lo quityi bi' ni, clyo nacui̱ Cristo cha' ná nti' ycui' Ndyosi msta̱; la cui' jua'a̱ nacui̱ Ni cha' ná ndiya ti' ycui' Ndyosi cha' xcui' ndya'a̱ lo'o ngu' ji'i̱ msta̱, masi msta̱ jua'a̱ ti, masi na'ni lu'ú nu caca msta̱ nu tyaqui̱ lo mesa quii' cha' cati̱ qui'ya nu ntsu'u ji'i̱ ngu' lo'o ycui' Ndyosi. Jua'a̱ nacui̱ Ni, pana cuentya ji'i̱ cha' cusu' ji'i̱ ngu' nga'a̱ cha' cua'ni ngu' bi' jua'a̱.

⁹ Lo'o li' nacui̱ Ni: “Cua lijya̱ na' ca nde, Ndyosi Sti na', cha' cua'ni na' cua ña'a̱ ca cña nu nti' nu'u̱ cha' cua'ni na'”. Jua'a̱ ngua cha' nguxtyanu ycui' Ndyosi cha' cusu' bi', cha' nu nscua ñi'ya̱ caca msta̱ nu tsalo'o ngu' scaa quiya'; li' chaca cha' cucui ngua'ni ycui' Ndyosi, nu lo'o nda Ni ji'i̱ Cristo lijya̱ nde chalyuu cuentya ji'na.

¹⁰ Ngua'ni Jesucristo lcaa cña nu ngua ti' ycui' Ndyosi Sti yu cha' cua'ni yu, cha' nda yu ji'i̱ tyucui ña'a̱ yu cha' ngujui'i̱ ca'a̱ ngu' ji'i̱ lo crusi; sca ti quiya' tsiya' ti ngua ycui' ca yu msta̱, la cui' msta̱ nu ngua ti' ycui' Ndyosi Sti yu ngua bi'. Bi' cha' cua ngua lubii cresiya ji'na cuentya ji'i̱ ycui' Ndyosi juani, cua ndye yabe' nu ntsu'u ji'na.

¹¹ Nu ngu' sti jo'ó ji'i̱ ngu' judío ni, lcaa tsa̱ ndu̱ ngu' bi' ndu'ni ngu' cña cha' sta ngu' la cui' tya'a msta̱ slo ycui' Ndyosi, masi tyu̱u̱ quiya' sca yija̱; ná ntsu'u su tye cha' sta ngu' msta̱ bi', jua'a̱ ni sca quiya' ná ngua cati̱ qui'ya nu ntsu'u ji'i̱ ñati̱ lo'o msta̱ bi'.

¹² Pana nu Jesucristo bi' ni, sca ti quiya' ngujuii yu lo crusi cha' cati̱ qui'ya nu ntsu'u ji'i̱ ñati̱, lo'o ña'a̱ ti tya ndyu'u scua cña nu ngua'ni yu masi chalyuu juani. Li' ngutu'u Jesús ndyaa Ni, ndyaa tucua Ni nde la'a tsu' cui̱ su tlyu ca su ntucua ycui' Ndyosi.

¹³ Ca bi' ntucua Ni juani, ntajatya Ni ña'a̱ cuayá' nu tyiji̱loo lyiji ycui' Ndyosi ji'i̱ lcaa tya'a cusu̱u̱ Ni.

¹⁴ Sca ti quiya' cua ndyaa Jesús lo crusi lacua, ngua'ni lubii yu ji'i̱ cresiya ji'i̱ ñati̱ cuentya ji'i̱ ycui' Ndyosi; jua'a̱ ngua tyucui ti' tyiquee ñati̱ chaca quiya'.

¹⁵ Sca ti xqui'ya Xtyi'i ycui' Ndyosi nchca cuayá' ti' na ni cña laca nu ngua'ni Cristo nu ngua li', bi' cha' ngua'ni Xtyi'i ycui' Ni cha' nscua cha' lo quityi nu nchcui' ndi'ya̱:

¹⁶ Nde laca cha' cucui nu cua quiñi ti 'na lo'o ngu' chaca quiya', nacui̱ nu Xu'na na: Lo'o tyalaa tyempo bi', li' cua'ni na' cha' tyanu tso'o cha' ne' cresiya ji'i̱ ñati̱ 'na, lcaa cha' ñi'ya̱ nu chcui' na' lo'o ngu' li'; tyucui tyiquee ngu' cua'ni ngu' cña 'na li'.

¹⁷ Chaca cha' nacui̱ Ni li': Li' nga'aa tyi'u ti' na' cha' cuxi nu cua ngua'ni ngu', nga'aa culotu̱ na' qui'ya nu ntsu'u ji'i̱ ngu' lo'o na'. Jua'a̱ nchcui' ycui' Ndyosi.

¹⁸ Bi' cha' juani, nga'aa ntsu'u cha' tsalo'o ngu' ji'i̱ msta̱ cha' cati̱ qui'ya nu ntsu'u ji'i̱ ngu', cha' cua laca ngua'ni clyu ti' ycui' Ndyosi ji'na ji'i̱ qui'ya nu ntsu'u ji'na.

Cua'ni na cha' caca stu'ba cha' ji'na lo'o ycui' Ndyosi

¹⁹ Cu'ma̱ ngu' tya'a ngusñi na cha' ji'i̱ Cristo, tyucui chacuayá' ji'i̱ Ni cua ntsu'u ji'na juani, cha' ca̱a̱ na slo ycui' Ndyosi nu lubii tsiya' ti cha' ji'i̱ Ni. Jesús laca nu nda chacuayá' bi' ji'na, xqui'ya cha' ndyalú tañi ycui' yu lo'o ngujuii yu lo crusi, cha' cuityi̱ Ni qui'ya nu ntsu'u ji'na.

²⁰ Nu lo'o nda yu tyucui ña'a̱ yu cha' ngujuii yu xqui'ya na, cua ngusaala yu chaca tyucui̱i̱ cucui cuentya ji'na li', cha' caja ñi'ya̱ ca̱a̱ na cacua ti slo ycui' Ndyosi; xqui'ya ycui' Jesús, bi' cha' taca xñi na tyucui̱i̱ nu lijya̱ ca slo ycui' Ndyosi juani.

²¹ Cua ntsu'u cha' ji'na lo'o nu Jesús bi', nu sti jo'ó nu laca loo la, cha' ycui' laca nu ndi'ya cña loo ji'i̱ lcaa na cuentya ji'i̱ ycui' Ndyosi Sti yu.

²² Tya̱a̱ na ca slo ycui' Ndyosi lacua; tyucui tyiquee na cua'ni na cha' caca stu'ba cha' ji'na lo'o ycui' Ndyosi Sti na, cha' taca xñi tso'o na cha' ji'i̱ Ni li'. Cua ngüityi̱ Ni lcaa cha' cuxi nu ngua'ni cha' ngua tyuju'u ti' na tya tsubi' la; cua ngua lubii cresiya ji'na juani, ñi'ya̱ laca lo'o cua ndyaata na chcu lo'o hitya lubii ti.

²³ Cua'ni na cha' jlya tso'o ti' na cha' nu cua ngusñi na tya clyo lacua, ná tya'a̱chu̱' na ji'i̱ cha' bi' tsiya' ti. Taca jlya ti' na ji'i̱ ycui' Ndyosi, cha' chañi cha' cua'ni Ni lcaa cha' nu cua nacui̱ Ni ji'na.

²⁴ Culacua tso'o ti' na, cha' caja ñi'ya̱ xtyucua na ji'i̱ xa' la ngu' tya'a ngusñi na cha' ji'i̱ Jesús; xtyucua na ji'i̱ ngu' bi', cha' xcui' cha' tso'o ti cua'ni ngu' lo'o tya'a ngu', cha' jua'a̱ caca tso'o tyiquee ngu' ña'a̱ ngu' ji'i̱ tya'a ngu'.

²⁵ Ntsu'u ngu' tya'a na nu nga'aa ndya'a̱ slo ngu' tya'a ngusñi na cha' ji'i̱ Jesús, nu nga'aa ndyu'u ti'i̱ lo'o tya'a na. Pana ná tso'o cua'ni na jua'a̱; tso'o la ña'a̱ ti tsaa na tyu'u ti'i̱ na lo'o tya'a na, cha' tyanu tachaa la cha' ji'i̱ ycui' Ndyosi ne' cresiya ji'na, lcaa na lo'o tya'a ngusñi na cha' ji'i̱ Ni. Nti' na cha' cua tya̱a̱ ti nu Xu'na na chaca quiya', bi' cha' lu'ba ti tyu'u ti'i̱ na juani lo'o ngu' tya'a na.

²⁶ Nga'aa ntsu'u xa' la msta̱ nu ta na, nga'aa ntsu'u xa' la cha' nu cua'ni na, cha' cati̱ qui'ya nu ntsu'u ji'na, si ña'a̱ ti tya cua'ni na cha' cuxi li'; cua ngua cuayá' ti' na cha' chañi tsa cha' ji'i̱ Jesús bi', lo'o jua'a̱ nga'aa cui'ya ycui' Ndyosi cha' clyu ti' ji'na si xtyanu na ji'i̱ cha' bi'.

²⁷ Jua'a̱ ti caca na li', cutsi̱i̱ tsa na ji'i̱ ycui' Ndyosi lo'o tyalaa hora nu cua'ni cuayá' Ni ji'i̱ lcaa ñati̱ tya'a ngusu̱u̱ lo'o Ni. Lo'o li' cua'ni tye Ni ji'i̱ lcaa ngu' bi', tsaa ngu' nde lo quii' tlyu nu ná nga'a̱ cha' tye tyaqui̱.

²⁸ Nu ngua sa'ni ni, lo'o ntsu'u ñati̱ nu ná ndaquiya' tsiya' ti ji'i̱ cña nu ngulo ycui' Ndyosi, ndyujuii ngu' ji'i̱ ñati̱ bi' li'. Ngua'ni cuayá' ngu' ji'i̱ ñati̱ bi' clyo cuentya ji'i̱ jyo'o Moisés lo'o tucua sna tya'a xa' ñati̱ nu ndacha' liñi ñi'ya̱ ngua cha' bi'; li' ngusta ngu' yabe' hichu̱' ñati̱ bi', ndyujuii ngu' ji'i̱ li', cha' nga'aa ngujui ñi'ya̱ jña ngu' cha' clyu ti' ji'i̱ ycui' Ndyosi cuentya ji'i̱ nu cuxi bi' li'. Jua'a̱ ngua tya sa'ni la.

²⁹ Lo'o juani ni, tlyu la cha' ti'í tyacua ji'i̱ tya'a ñati̱ na nu chi̱i̱ tsa nti' ña'a̱ ngu' ji'i̱ Jesús, nu sca ti Sñi' ycui' Ndyosi bi', ngu' nu lye tsa chcui' lo ji'i̱ cña nu ngua'ni nu Jesús bi'; sca ti xqui'ya cha' ngujuii yu lo crusi, bi' cha' cua ndyaca lubii cresiya ji'na. Lo'o jua'a̱ si chcui' suba' na ji'i̱ Xtyi'i ycui' Ndyosi, li' lye la cha' nchcube' tyacua ji'na, cha' xcui' tso'o tsa ndu'ni Ni lo'o na xqui'ya Xtyi'i ycui' Ni.

³⁰ Cua jlo ti' na cha' ndi'ya̱ nchcui' ycui' Ndyosi tya sa'ni la: “Na' laca̱ nu xcubi̱' ji'i̱ ñati̱ chalyuu”, nacui̱ Ni. “Ta na' cha' ti'í ji'i̱ ñati̱, nu lo'o ntsu'u cha' chcube' ngu'.” Lo'o jua'a̱ cua nchcui' Ni chaca cha' lo'o ngu' li': “Cua'ni cuayá' na' ji'i̱ ñati̱ 'na, cha' na' laca̱ Xu'na ngu'”, nacui̱ Ni.

³¹ Tlyu tsa cha' laca, si taya' ycui' Ndyosi nu lu'ú ca ji'na cha' xcube' Ni ji'na.

³² Tyi'u ti' ma̱ lacua, ñi'ya̱ nu ndyaca ji'i̱ cu'ma̱ nu ngua tya tsubi' la, cua ndyaala hique ma̱ cha' ndyuna tso'o ma̱ cha' ji'i̱ ycui' Ndyosi, lo'o li' cua quiña'a̱ tsa cha' nchcube' cua ndyacua ji'i̱ ma̱ nde chalyuu. Pana ndalo tsa tyiquee ma̱ li'; ná ngua ji'i̱ nu ngu' xña'a̱ bi' tyiji̱loo ji'i̱ ma̱,

³³ masi tyu̱u̱ quiya' nchcui' tsa ngu' cha' ti'í ji'i̱ ma̱, masi ngua'ni lya' ti' ngu' ji'i̱ ma̱ su ndu̱ ma̱ laja ñati̱ nu ngua li'. Lo'o jua'a̱ cua ntaja'a̱ ma̱ tyanu ma̱ slo ngu' tya'a ma̱ laja lo'o ngua'ni ti'í ti' ngu' ji'i̱ ngu' bi', masi si'i ji'i̱ ycui' ca ma̱ ndyu'ni lya' ti' ngu' tyempo bi'.

³⁴ Lo'o jua'a̱ ndyaa na'a̱ ma̱ ji'i̱ ngu' tya'a ma̱ nu lo'o ntsu'u ngu' bi' ne' chcua̱, nguxtyucua ma̱ ji'i̱ ngu' bi' li'; masi nguaana xa' ñati̱ lcaa cha' tso'o nu ntsu'u ji'i̱ ma̱, ndalo tsa tyiquee ma̱ li'. Tso'o ntsu'u tyiquee ma̱, cha' cua jlo ti' ma̱ cha' tso'o la tsiya' ti laca nu cha' ji'i̱ Jesús nu cua ngusñi ma̱ bi'; jlo ti' ma̱ cha' ná tye chca cha' bi', cha' nu cua ndyuna ma̱ cuentya ji'i̱ Jesús.

³⁵ Ná tya'a̱chu̱' ma̱ ji'i̱ cha' ji'i̱ Jesús lacua. Ña'a̱ ti tya cua'ni tlyu tyiquee ma̱, cha' tso'o tsa cha' nu tyacua ji'i̱ ma̱ ca tiya' la cuentya ji'i̱ ycui' Ndyosi, si ña'a̱ ti xñi tso'o ma̱ cha' bi'.

³⁶ Nga'a̱ cha' talo tyiquee ma̱ masi tyiquee', si tya nti' ma̱ cua'ni ma̱ lcaa ña'a̱ cña nu nti' ycui' Ndyosi, si tya nti' ma̱ ña'a̱ ma̱ cha' nu cua nacui̱ Ni cha' caca nde loo la.

³⁷ Cua nscua lo quityi cusu' cha' ndi'ya̱ nchcui' ycui' Ndyosi: Tya xi tya tyempo tya lyiji cha' tyalaa ycui' yu nu nga'a̱ cha' tya̱a̱ chaca quiya'; nga'aa tiya' lye cha' ca̱a̱ yu bi', nacui̱ Ni.

³⁸ Lo'o ñati̱ nu caca lubii cresiya ji'i̱ xqui'ya na' ni, nu lo'o xñi ngu' bi' cha' 'na, li' caja chalyuu nu ná nga'a̱ cha' tye ji'i̱ ngu' bi', nacui̱ Ni. Pana ná tso'o nti' na' ña'a̱ na' ji'i̱ ñati̱ nu tya'a̱chu̱' ji'i̱ cha' 'na.

³⁹ Nu na ni, ná taca tya'a̱chu̱' na ji'i̱ cha' ji'i̱ Jesús; si tya'a̱chu̱' na ji'i̱ yu, chcuna' na tyucui ña'a̱ na, ña'a̱ lo'o cresiya ji'na li'. Pana laca na ñati̱ nu tsa cu' ti xñi na cha' ji'i̱ Ni, bi' cha' ndu'ni lyaá Ni ji'na ji'i̱ nu cuxi.