FILEMÓN 1 - Chatino Tataltepec

¹ Pablo laca na', lo'o juani ntsu'u na' ne' chcua̱ cuentya ji'i̱ Jesucristo. Nscua na' quityi re lo'o Timoteo tya'a na, cha' ta ya cha' lo'o nu'u̱, Filemón, cha' tso'o tsa tya'a tso'o na laca nu'u̱, cha' la cui' tya'a cña ndyu'ni na.

² Lo'o jua'a̱ nscua ya quityi re cha' taca cuna lcaa ngu' nu ndyu'u ti'i̱ ca slo nu'u̱ cha' nu nchcui' ya re, lo'o ma' Apia tya'a na, lo'o Arquipo nu stu'ba ti lo'o cuare nxu̱u̱ tya'a lo'o nu cuxi cuentya ji'i̱ ycui' Ndyosi.

³ Ndi'ya̱ nti' na' cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na.

Ña'a̱ ti ntsu'u tsa cha' ji'i̱ Filemón lo'o Jesucristo, cha' ngusñi tso'o yu cha' ji'i̱ ycui' Ndyosi

⁴ Ndya na' xlya'be ji'i̱ ycui' Ndyosi cuentya jinu'u̱, Filemón, lcaa quiya' lo'o nchcui' na' lo'o ycui' Ndyosi.

⁵ Hasta ca su ndi'i̱ na' re, cua ndañi cha' tso'o tsa ngusñi nu'u̱ cha' ji'i̱ Jesús nu Xu'na na, jua'a̱ ntsu'u tsa tyiquee nu'u̱ ña'a̱ nu'u̱ ji'i̱ Jesús lo'o ji'i̱ lcaa ñati̱ ji'i̱ Cristo cajua. Lcaa cha' bi' cua ndyuna na' ji'i̱;

⁶ bi' cha' ndijña na' cha' clyu ti' ji'i̱ ycui' Ndyosi, cha' ca cuayá' tso'o ti' lcaa ngu' nu ndyuna cha' nu nchcui' nu'u̱ lo'o ngu' cuentya ji'i̱ Jesucristo, cha' lo'o ña'a̱ ngu' jinu'u̱, li' ca cuayá' tso'o ti' ngu' cha' xcui' tso'o tsa ndyu'ni Cristo lo'o na.

⁷ Tso'o tsa tyiquee na' juani, tlyu tyiquee na' xqui'ya nu'u̱, lo'o ngujui cha' 'na cha' ntsu'u tsa tyiquee nu'u̱ ña'a̱ nu'u̱ ji'i̱ ngu' tya'a na, cha' nxtyucua tsa nu'u̱ ji'i̱ ngu' tya'a na cha' talo tyiquee ngu'. Chañi cha' tya'a na cuentya ji'i̱ Jesucristo laca nu'u̱.

Ndijña Pablo sca cha' tso'o cuentya ji'i̱ Onésimo

^8-9 Lo'o juani ndijña na' sca cha' clyu ti' jinu'u̱. Jlo ti' na' ñi'ya̱ ntsu'u tsa tyiquee nu'u̱ ña'a̱ nu'u̱ ji'i̱ ñati̱, bi' cha' si'i sca cña nu culo na' jinu'u̱ laca re, masi ntsu'u chacuayá' jna' cha' chcui' na' jua'a̱. Pablo laca na', cua ngusu' na' juani, lo'o jua'a̱ ntsu'u na' ne' chcua̱ juani xqui'ya cha' nchcui' na' cha' ji'i̱ Jesucristo lo'o ñati̱.

¹⁰ Pana chcui' na' sca cha' lo'o nu'u̱ cuentya ji'i̱ yu Onésimo, cha' ñi'ya̱ nti' na' ña'a̱ na' ji'i̱ sca sñi' na', jua'a̱ nti' na' ña'a̱ na' ji'i̱ yu bi' juani, cha' ne' chcua̱ re ngusñi yu cha' ji'i̱ ycui' Ndyosi xqui'ya na'.

¹¹ Nu Onésimo bi' ni, ná tso'o ca ngua'nijo'o yu jinu'u̱ nu ngua tya sa'ni la. Pana juani xa' ña'a̱ cua'ni yu; masi cuentya jinu'u̱, masi cuentya jna', tso'o tsa ndu'ni yu cña juani.

¹² Cua ngulo na' cña ji'i̱ yu cha' xtyu̱u̱ yu tya̱a̱ yu ca slo nu'u̱ chaca quiya', masi ñi'ya̱ laca si la cui' cresiya 'na cua nda na' ndyaa ca slo nu'u̱.

¹³ Jlo ti' nu'u̱ cha' ntsu'u na' ne' chcua̱ nde xqui'ya cha' cua nchcui' na' cha' tso'o ji'i̱ Jesucristo lo'o ñati̱, lo'o jua'a̱ tso'o tsa ntsu'u tyiquee na' si ndyanu yu ca nde lo'o na', cha' xtyucua yu jna' ñi'ya̱ laca si na cua ndi'i̱ ycui' nu'u̱ ca nde.

¹⁴ Pana nti' na' quiñi cha' 'na lo'o nu'u̱ clyo, Filemón. Tso'o tsa tyiquee nu'u̱, lo'o nti' na' cha' cua'ni nu'u̱ lo'o yu ñi'ya̱ nu nti' ycui' nu'u̱; ná nti' na' culo na' cña jinu'u̱ cha' tyanu yu lo'o na'.

¹⁵ Ná tyiquee' ngusna yu xi jinu'u̱ cha' tya ta la ycui' Ndyosi ji'i̱ yu cha' tyalaa yu ca slo nu'u̱ chaca quiya', cha' juani tyanu yu slo nu'u̱ tyucui tyempo nu tyi'i̱ yu chalyuu.

¹⁶ Nga'aa si'i msu jua'a̱ ti caca yu juani, tya'a na laca yu; tya'a na' laca yu nu tso'o tsa ntsu'u tyiquee na' ña'a̱ na' ji'i̱. Lo'o jua'a̱ tya'a nu'u̱ nu tso'o la laca yu juani; msu tso'o jinu'u̱ caca yu juani, cha' la cui' tya'a ñati̱ ji'i̱ Jesucristo laca ma̱.

¹⁷ Bi' cha' chcui' tso'o nu'u̱ lo'o yu lo'o tyalaa yu ca slo nu'u̱, ñi'ya̱ nchcui' tso'o nu'u̱ lo'o na' lo'o ndyalaa na' ca slo nu'u̱, xqui'ya cha' stu'ba ti ngusñi na cha' ji'i̱ ycui' Ndyosi.

¹⁸ Si ntsu'u cuentya nu ndacui yu jinu'u̱ xqui'ya cha' cuxi nu ngua'ni yu cua sa'ni la, sta nu'u̱ tane' bi' cuentya 'na;

¹⁹ tya na' cñi bi' jinu'u̱, bi' cha' nscua na' xtañi na' ca nde ndi'ya̱: Pablo. Ná chcui' na ji'i̱ cha' nu ndacui nu'u̱ jna', masi sca tane' tlyu laca bi', cha' ngujui chalyuu nu ná nga'a̱ cha' tye jinu'u̱ xqui'ya na'.

²⁰ Tya'a na laca yu chacuayá' ji'i̱ Jesucristo, bi' cha' ñi'ya̱ nu ngüijña na' jinu'u̱ tsa̱ cha' tso'o ti chcui' nu'u̱ lo'o yu, jua'a̱ cua'ni nu'u̱ lo'o yu, cha' jua'a̱ taca xtyucua nu'u̱ 'na cha' talo na' ca nde.

²¹ Jlo ti' na' cha' taquiya' nu'u̱ ji'i̱ cha' nu nchcui' na' lo'o nu'u̱, bi' cha' nscua na' quityi re cha' ca̱a̱ slo nu'u̱; jlo ti' na' cha' tya quiña'a̱ la cha' tso'o tya cua'ni la nu'u̱.

²² Lo'o chaca cha' ni, nduna ycui' Ndyosi cha' lu'ba ti ndijña ma̱ sca cha' cuentya jna', bi' cha' tso'o si cua'ni cho'o ma̱ sca se'i̱ su tyi'i̱ na'; ndu̱ ti' na' cha' laja ti tyu'u na' ne' chcua̱ nde, ca̱a̱ na' ca slo cu'ma̱ li'.

Nchcui' salya' lo'o ngu'

²³ Lo'o yu Epafras tya'a ntsu'u na' ne' chcua̱ re xqui'ya Jesucristo, lo'o yu bi' nda yu xlyo ni'i̱ ji'i̱ ma̱.

²⁴ Lo'o jua'a̱ Marcos, lo'o Aristarco, lo'o Demas, lo'o Lucas, ca ta'a ngu' ndyi'u ti' ngu' jinu'u̱. Nxtyucua tsa ngu' bi' 'na lo'o cña ji'i̱ ycui' Ndyosi ca nde.

²⁵ Ña'a̱ ti cua'ni Jesucristo nu Xu'na na cha' tso'o lo'o lcaa cu'ma̱ lacua. Jua'a̱ caca cha' lacua.