3 JUAN 1 - Chatino Tataltepec

Tso'o tsa nchcui' Juan ji'i̱ Gayo

¹ La cui' nu cusu' Juan laca na'. Nscua na' quityi re cha' ca̱a̱ ca slo nu'u̱, Gayo; jlya ti' nu'u̱ lcaa cha' nu laca ji'i̱ Jesucristo, bi' cha' tso'o tsa ntsu'u tyiquee na' cha' chcui' na' lo'o nu'u̱.

² Tso'o tsa ñati̱ laca nu'u̱, cusu'. Nchcui' na' lo'o ycui' Ndyosi cuentya jinu'u̱ cha' tso'o ti taca tyi'i̱ tyiquee nu'u̱, cha' taca ca lye ti' nu'u̱. Cua jlo ti' na' cha' tso'o tsa ngusñi nu'u̱ cha' ji'i̱ ycui' Ndyosi.

³ Lo'o juani tso'o tsa ntsu'u tyiquee na' cha' cua ndyalaa xi ngu' tya'a ntsu'u cha' ji'na lo'o Cristo nu ngutu'u ca su ndi'i̱ ma̱ ya̱a̱ ngu' ca nde. Nacui̱ ngu' cha' ña'a̱ ti ndaquiya' tso'o ma̱ ji'i̱ cha' liñi nu cua nda Jesús lo'o na, cha' jua'a̱ ndu'ni ma̱ lcaa tsa̱.

⁴ Sca ti cha' nclyacua ti' na' cuentya ji'i̱ cu'ma̱, si chañi cha' ndaquiya' ma̱ ji'i̱ cha' liñi nu cua nda Jesús lo'o na, cha' cuañi' la cu'ma̱ cuentya jna'; tso'o tsa ntsu'u tyiquee na' lo'o ndyuna na' cha' jua'a̱ ndu'ni ma̱.

⁵ Cusu', ndube tsa ti' na' cha' lcaa tyempo tso'o tsa nxtyucua nu'u̱ ji'i̱ ngu' tya'a na, masi ná nslo nu'u̱ ji'i̱ ngu', cha' ngu' xa' quichi̱ laca ngu' ntsu'u quiya'.

⁶ Cua nchcui' ngu' bi' lo'o lcaa ngu' tya'a ntsu'u cha' ji'na lo'o Jesús nde quichi̱ re, ndacha' ngu' ji'i̱ ya ñi'ya̱ nu tso'o ntsu'u tyiquee ma̱ ña'a̱ ma̱ ji'i̱ ycui' ca ngu'. Lo'o jua'a̱ cua'ni ma̱ cha' tso'o tya xtyucua la ma̱ ji'i̱ ngu' bi' tyucui̱i̱ su tsaa ngu', cua'ni ma̱ ñi'ya̱ laca si na nxtyucua ma̱ ji'i̱ ycui' Ndyosi laca;

⁷ cña ji'i̱ Cristo ndya'a̱ ngu', bi' cha' ngutu'u ngu' bi' ndyaa ngu' tyijyu'. Ná ntaja'a̱ ngu' xñi ngu' ni sca centavo ji'i̱ xa' ñati̱ nu ná ndaquiya' ji'i̱ Cristo tsiya' ti, cha' xtyucua ji'i̱ ngu' tyucui̱i̱;

⁸ bi' cha' nu na ni, tya'a ngusñi na cha' ji'i̱ Cristo, nga'a̱ cha' xtyucua na ji'i̱ ngu' bi'. Lo'o jua'a̱ taca ca stu'ba cha' ji'na lo'o ngu' bi' lo'o sañi na cha' liñi nu cua nda Cristo lo'o na ca tyijyu' la.

Cuxi tsa cña nu ndyu'ni Diótrefes

⁹ Cua nscua na' sca quityi tya tsubi' la nu ndyaa ca su ndi'i̱ ña'a̱ taju ti ma̱ ñati̱ ji'i̱ Jesucristo, cu'ma̱ nu ndyu'u ti'i̱ ma̱ tsa tlyu ti ca bi'; pana ná ntaja'a̱ Diótrefes taquiya' ji'i̱ cha' nu nacui̱ na' ji'i̱ ma̱, cha' nti' yu bi' cha' xu'na ma̱ laca yu.

¹⁰ Nu lo'o tyalaa na' ca slo ma̱, li' chcui' na' lo'o ma̱ cuentya ji'i̱ lcaa cña nu ndyu'ni yu bi', cha' chiya'a̱ tsa nchcui' yu ji'i̱ cuare; nchcui' yu bi' cua ña'a̱ ca lo cha' cuiñi lo'o ñati̱. Masi ndyu'ni yu jua'a̱, ná cuayá' ji'i̱ yu nti' yu, cha' juani ná ntaja'a̱ yu ta yu su tyi'i̱ ngu' tya'a ndya'a̱ ya cña lo'o ndyaa ngu' quichi̱ tyi ma̱; ña'a̱ cuayá' ndaca'a yu chacuayá' ji'i̱ tya'a ma̱ cha' lo'o cu'ma̱ ná ta ma̱ su tyi'i̱ ngu', masi ngua ti' ma̱ ta ma̱ su tyi'i̱ ngu' nquicha'. Lo'o jua'a̱ ngua ti' yu culo'o yu ji'i̱ tya'a ndya'a̱ ya cña bi', cha' ná tyu'u ti'i̱ ngu' lo'o ma̱.

¹¹ Cusu', ná tyatí̱ yu'u ma̱ lo'o cha' cuxi nu ntsu'u chalyuu, tso'o la si tyi'u ti' ma̱ ji'i̱ lcaa cha' nu tso'o ti. Lcaa ñati̱ nu xcui' clyana cha' tso'o nu cua'ni ngu' cha' xtyucua ngu' ji'i̱ xa' la tya'a ñati̱ ngu', cua ntsu'u cha' ji'i̱ ngu' bi' lo'o ycui' Ndyosi; lcaa ñati̱ nu xcui' clyana cha' cuxi cha' cua'ni ngu', bilya tyu'u cha' ji'i̱ ngu' bi' tsiya' ti lo'o ycui' Ndyosi.

Tso'o la ndyu'ni Demetrio

¹² Tso'o tsa nchcui' lcaa ñati̱ ji'i̱ Demetrio; masi ycui' ca na, lo'o ña'a̱ na ji'i̱ yu nchca cuayá' ti' na cha' tso'o tsa ndyu'ni yu lo'o lcaa ñati̱. Jua'a̱ cuare, nchcui' ya lo'o ma̱ juani cha' chañi tsa cha' nu nchcui' ngu' ji'i̱ yu cha' tso'o tsa tyiquee yu. Cua jlo tso'o ti' ma̱ cha' nchcui' ya cha' liñi lo'o ma̱.

Cha' nu nguscua Juan lo'o cua tye ti quityi

¹³ Tya ntsu'u tsa cha' nu nti' na' chcui̱' lo'o nu'u̱, pana tso'o la masi ná scua na' cha' bi' lo quityi re juani;

¹⁴ tso'o la yala ti ca̱a̱ na' ca su ndi'i̱ nu'u̱ cha' ycui' ca na' ta na' xi cha' lo'o nu'u̱.

¹⁵ Ti̱ ti tyi'i̱ tyiquee ma̱ lacua, cha' ycui' Ndyosi xtyucua ji'i̱ ma̱. Lcaa ngu' tya'a tso'o ma̱ nu ndi'i̱ ca su ndi'i̱ cuare, cua nti' ngu' chcuicha' ngu' ji'i̱ ma̱, xqui'ya cha' nu scua na' lo quityi re; jua'a̱ cu'ma̱, chcuicha' ma̱ ji'i̱ lcaa ngu' tya'a tso'o ya nu ndi'i̱ ca ndacua.