2 TESALONICENSES 3 - Chatino Tataltepec

Chcui' ma̱ lo'o ycui' Ndyosi cuentya ji'i̱ ya

¹ Cu'ma̱ tya'a ngusñi na cha' ji'i̱ Jesús, chcui' ma̱ lo'o ycui' Ndyosi cuentya ji'i̱ ya, cha' xtyucua Ni ji'i̱ ya laja lo'o nclyu'u ya cha' ji'i̱ ycui' nu Xu'na na ji'i̱ ngu', cha' ná tacu̱' ngu' lo cua ña'a̱ ca cha' nu nclyu'u ya ji'i̱ ngu'. Ñi'ya̱ lo'o ngusñi ma̱ cha' bi' juani, jua'a̱ nti' ya cha' yala ti xñi tya quiña'a̱ la ñati̱ cha' bi', nde lcaa quichi̱ su nchcui' ya cha' bi'.

² Chcui' ma̱ lo'o ycui' Ndyosi cha' cua'a Ni ji'i̱ ya cha' ná tyiji̱loo ngu' cuxi ji'i̱ ya, masi ngu' nu cuxi tsa tyiquee ngu'; ntsu'u tsa ñati̱ chalyuu nu ná jlya tso'o ti' ji'i̱ ycui' Ndyosi.

³ Chañi cha' ndu'ni nu Xu'na na lcaa cha' nu ñacui̱ Ni ji'na, cua'ni Ni cha' caca tlyu tyiquee ma̱, cua'a Ni ji'i̱ ma̱ cha' ná cala' nu xña'a̱ ji'i̱ ma̱.

⁴ Jlo ti' ycui' nu Xu'na na cha' ndyu'ni ma̱ cña nu ngulo ya ji'i̱ ma̱, cha' tya cua'ni la ma̱ cña bi'.

⁵ Lo'o jua'a̱ cua'ni ycui' nu Xu'na na cña ne' cresiya ji'i̱ ma̱, cha' tyi'u ti' ma̱ cha' ntsu'u tsa tyiquee ycui' Ndyosi ña'a̱ Ni ji'i̱ ma̱; li' talo tyiquee ma̱ ñi'ya̱ lo'o ndalo tyiquee ycui' Cristo lo'o nguta'a̱ yu lo'o ñati̱ tya clyo.

Nga'a̱ cha' cua'ni na cña

⁶ Cu'ma̱ tya'a ngusñi na cha' ji'i̱ Jesús, chaca quiya' culo ya cña ji'i̱ ma̱ chacuayá' ji'i̱ Jesucristo nu Xu'na na: ná tya'a̱ ma̱ stu'ba ti lo'o xa' la ngu' tya'a ngusñi ma̱ cha' bi' nu ná ntaja'a̱ cua'ni cña, la cui' ngu' tya'a ma̱ nu ná ntaja'a̱ taquiya' ji'i̱ cha' nu cua nda ya lo'o ma̱.

⁷ Si'i na taja ya lo'o nguti'i̱ ya lo'o cu'ma̱ nu ngua li', bi' cha' tso'o si tyaja'a̱ ma̱ cua'ni ma̱ cña ñi'ya̱ ngua'ni ya lo'o ya' ti ya.

⁸ Ná ndyacu laja ti ya slo cu'ma̱ nu ngua li'; nda ya caya' cha' nguxacu ma̱ ji'i̱ ya, cha' ngua'ni ya cña cha' cajá ñi'ya̱ nu tyiji̱ yu'u ji'i̱ ya. Tsa̱ lo'o talya ngua'ni ya cña lo'o ya' ti ya, cha' si'i cu'ma̱ nu ngüi'ya ma̱ na nu ndyacu ya li'.

⁹ Pana tso'o si ta ma̱ xi caya' ji'i̱ ngu' nu culu'u ji'i̱ ma̱; masi cuare ni, taca xtyucua ma̱ xi ji'i̱ ya si nti' ma̱. Pana ná ngusñi ya caya' nu ngua li', xqui'ya cha' ngua ti' ya culu'u ya ji'i̱ ma̱ cha' ná ca taja ma̱, cha' cua'ni ma̱ cña cha' caja na nu lyiji cha' tyiji̱ yu'u ji'i̱ ma̱ chalyuu.

¹⁰ Lo'o tya ndi'i̱ ya slo cu'ma̱, tya li' ngulo ya cña ji'i̱ ma̱ ndi'ya̱: ná ta ma̱ na cacu ñati̱ nu ná nti' cua'ni cña.

¹¹ Pana juani cua ngujui cha' ji'i̱ ya cha' ntsu'u xi ngu' tya'a ma̱ nu ná tso'o ndu'ni; nga'aa ndyu'ni ngu' bi' cña, ndya'a̱ ngu' nchcui' ngu' cha' cuiñi ti lo'o tya'a ngu', xqui'ya cha' taja ngu'.

¹² Bi' cha' juani nclyo ya cña ji'i̱ ngu' bi' chacuayá' ji'i̱ Jesucristo nu Xu'na na, cha' ntsu'u cha' cua'ni ngu' bi' cña; jua'a̱ caja ñi'ya cacu ngu' cuentya ji'i̱ scaa ngu'.

¹³ Cu'ma̱ ngu' tya'a na, ná ca taja ti' ma̱ cha' cua'ni ma̱ cha' tso'o lo'o ñati̱.

¹⁴ Ñati̱ nu ná ntaja'a̱ taquiya' ji'i̱ lcaa cha' nu nscua ya lo quityi re ni, cui'ya ma̱ cuentya tilaca laca ngu' bi'; li' nga'aa tya'a̱ ma̱ stu'ba ti lo'o ngu' bi', cha' jua'a̱ caca tyuju'u ti' ngu'.

¹⁵ Pana si'i tya'a cusu̱u̱ ma̱ laca ngu' bi', tya'a ma̱ laca ngu'; bi' cha' ntsu'u cha' ta ma̱ sca cui̱i̱ lo'o ngu', ñi'ya̱ laca lo'o nchcui' ma̱ lo'o sca ngu' tya'a ma̱.

Ngusalya' Pablo lo'o ngu'

¹⁶ Cua'ni ycui' nu Xu'na na lo'o ma̱ cha' ti̱ ti tyi'i̱ tyiquee ma̱ lcaa tsa̱, masi tsa̱ tso'o ji'i̱ ma̱, masi tsa̱ cuxi ji'i̱ ma̱, xqui'ya cha' lcaa hora ti̱ ti ndi'i̱ tyiquee ycui' Ni. Lo'o jua'a̱ tyanu ycui' nu Xu'na na lo'o ma̱ li'.

¹⁷ Xlyo ni'i̱ ji'i̱ ma̱. Pablo laca na' lo'o ycui' na' nscua na' letra juani, cha' caca cuayá' ti' ma̱ cha' chañi cha' quityi nu nguscua na' lijya̱ slo ma̱ laca quityi re.

¹⁸ Nti' ya cha' ña'a̱ ti cua'ni Jesucristo nu Xu'na na cha' tso'o lo'o lcaa cu'ma̱. Jua'a̱ caca cha' lacua.