2 TESALONICENSES 1 - Chatino Tataltepec

¹ Pablo, Silvano, Timoteo naa ya. Nscua ya quityi re cha' tsaa ca slo ña'a̱ taju cu'ma̱ ngu' quichi̱ Tesalónica nu ngusñi cha' ji'i̱ ycui' Ndyosi Sti na, cu'ma̱ nu cua ngusñi cha' ji'i̱ Jesucristo nu Xu'na na.

² Ndi'ya̱ nti' ya, cha' ña'a̱ ti cua'ni ycui' Ndyosi Sti na cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱ xqui'ya Jesucristo nu Xu'na na laja lo'o ndi'i̱ ma̱ chalyuu.

Xcube' ycui' Ndyosi ji'i̱ ñati̱ nu ná nti' taquiya' ji'i̱ cha' nu nchcui' Ni

³ Cu'ma̱ tya'a ngusñi na cha' ji'i̱ Jesús, ntsu'u cha' tya ya xlya'be ji'i̱ ycui' Ndyosi lcaa quiya' lo'o chcui' ya lo'o Ni cuentya ji'i̱ cu'ma̱; ndu'ni tsa cha' cua'ni ya jua'a̱, xqui'ya cha' lcaa tsa̱ tachaa la ndyanu cha' ji'i̱ Jesús ne' cresiya ji'i̱ ma̱, lcaa tsa̱ ntsu'u la tyiquee ma̱ ña'a̱ ma̱ ji'i̱ tya'a ñati̱ ma̱.

⁴ Tso'o tsa li'. Tso'o tsa ntsu'u tyiquee ya xqui'ya cu'ma̱, bi' cha' nda ya cha' ji'i̱ ma̱ lo'o lcaa taju ngu' tya'a ntsu'u cha' ji'na lo'o ycui' Ndyosi. Nacui̱ ya ji'i̱ ngu' cha' tso'o tsa ndyu'ni ma̱, cha' tlyu tsa tyiquee ma̱ xqui'ya ycui' Ndyosi, masi ndyiji tsa cha' ti'í ji'i̱ ma̱, masi lye tsa ndyu'ni lya' ti' ngu' ji'i̱ ma̱. Tso'o tsa cha' ndalo tyiquee ma̱ ji'i̱ ngu', masi cuxi tsa ndyu'ni ngu' bi' lo'o ma̱ jua'a̱.

⁵ Liñi tsa ndu'ni cuayá' ycui' Ndyosi ji'i̱ ñati̱; bi' cha' caja su tyi'i̱ ma̱ ca su laca ycui' Ndyosi loo ca nde loo la, masi xña'a̱ tsa ngu' lo'o ma̱ juani xqui'ya cha' ji'i̱ ycui' Ndyosi nu cua ngusñi ma̱.

⁶ Liñi tsa ndu'ni ycui' Ndyosi, lo'o jua'a̱ chañi cha' ca tiya' la xcube' Ni ji'i̱ lcaa ñati̱ nu nchcube' ji'i̱ cu'ma̱ juani.

⁷ Nga'aa cua'ni lya' ti' ngu' ji'na tsiya' ti lo'o tyu'u tucua ycui' Jesús nu Xu'na na nde cua̱. Laja xee tlyu tya̱a̱ Jesús li'; stu'ba ti ca̱a̱ Ni lo'o quiña'a̱ tsa ngu' xca̱ ji'i̱ Ni, cha' tlyu tsa cña nchca ji'i̱ xca̱ bi' nu ndu'ni ngu' cuentya ji'i̱ ycui' Ndyosi.

⁸ Li' xcube' ycui' Ndyosi ji'i̱ cua ña'a̱ ca ñati̱ nu ná ntaja'a̱ taquiya' ji'i̱ Ni, lo'o jua'a̱ xcube' Ni ji'i̱ ñati̱ nu ná ntaja'a̱ xñi cha' tso'o ji'i̱ ycui' Jesús nu Xu'na na.

⁹ Chañi cha' xcube' Ni ji'i̱ ngu' bi'; nga'aa ña'a̱ ngu' bi' ji'i̱ ycui' nu Xu'na na tsiya' ti, nga'a̱ cha' tsaa ngu' ca su ná nga'a̱ cha' tye cha' chcube' ngu'. Nga'aa ña'a̱ ngu' bi' xee ndubi ji'i̱ ycui' Ni li', nga'aa ña'a̱ ngu' ji'i̱ ycui' Ndyosi nu nchca ji'i̱ ndu'ni lcaa cña tsiya' ti.

¹⁰ Jua'a̱ xcube' Ni ji'i̱ ngu' bi' tsa̱ lo'o tya̱a̱ Jesús chaca quiya'. Pana si ntsu'u cha' ji'na lo'o Ni, li' cua'ni tlyu na ji'i̱ Ni tsa̱ bi'; la cui' jua'a̱ cua'ni chi̱ na loo ycui' Ndyosi lo'o tya'a na lo'o tyalaa tsa̱ bi', si cua ngusñi na cha' ji'i̱ Ni. Lo'o cu'ma̱, stu'ba ti tyu'u ti'i̱ ma̱ lo'o ya slo Jesús tsa̱ bi', cha' ngusñi ma̱ cha' ji'i̱ Jesús lo'o ngulu'u ya cha' bi' ji'i̱ ma̱ nu ngua tya clyo la.

¹¹ Bi' cha' lcaa tsa̱ nchcui' ya lo'o ycui' Ndyosi Sti na cha' cua'ni Ni cña ne' cresiya ji'i̱ ma̱, cha' tso'o ti cua'ni ma̱ cña nu nda Ni ji'i̱ ma̱ tya lo'o ngusubi Ni ji'i̱ ma̱. Nchcui' ya lo'o Ni cha' xtyucua Ni ji'i̱ ma̱, cha' jua'a̱ cua'ni lyiji ma̱ lcaa cha' tso'o nu nclyacua ti' ma̱ cha' cua'ni ma̱ cuentya ji'i̱ ycui' Ni, lcaa lo cha' tso'o nu ndyu'ni ma̱ xqui'ya cha' ngusñi ma̱ cha' ji'i̱ ycui' Ndyosi.

¹² Jua'a̱ ndu'ni tlyu ma̱ ji'i̱ Jesucristo nu Xu'na na, nu lo'o ndu'ni ma̱ cña ji'i̱ Ni; jua'a̱ ca cuayá' ti' ngu' li' cha' ndyanu Xtyi'i ycui' Ni ne' cresiya ji'i̱ ma̱. Lo'o li' caca cuayá' ti' ngu' cha' tso'o tsa ndu'ni ycui' Ndyosi lo'o ma̱, cha' stu'ba ti ndu'ni ycui' Ndyosi Sti na cña lo'o Jesucristo nu Xu'na na.