2 JUAN 1 - Chatino Tataltepec

Nu lo'o chañi cha' ntsu'u tsa tyiquee na ña'a̱ na ji'i̱ tya'a ñati̱ na

¹ La cui' nu cusu' Juan laca na'. Nscua na' sca quityi re, ma' cusu', jua'a̱ sñi' nu'u̱, cha' ca̱a̱ quityi re ca slo cu'ma̱ ngu' tya'a ngusñi na cha' ji'i̱ Jesús, cha' cua ngusubi ycui' Ni ji'i̱ ma̱ cha' caca ma̱ ñati̱ ji'i̱ Ni. Chañi cha' ntsu'u tsa tyiquee na' ña'a̱ na' ji'i̱ ma̱; ni si'i sca ti na', lo'o lcua ti ña'a̱ ñati̱ lcaa quichi̱ nu nduna cha' liñi ji'i̱ Jesús, lo'o lcaa ñati̱ bi', ntsu'u tsa tyiquee ngu' ña'a̱ ngu' ji'i̱ ma̱.

² Cua ndyanu tso'o cha' liñi bi' ne' cresiya ji'na, jua'a̱ ná nga'a̱ cha' tye cha' nu cua ndyuna na bi'; bi' cha' tso'o tsa ntsu'u tyiquee na' ña'a̱ na' ji'i̱ ma̱.

³ Ycui' Ndyosi nu laca Sti na, lo'o jua'a̱ Jesucristo nu sca ti Sñi' ycui' Ni, xtyucua Ni ji'i̱ ma̱. Lo'o jua'a̱ cua nti' na' cha' ña'a̱ ti tya cua'ni Ni quiña'a̱ tsa cha' tso'o lo'o ma̱, cha' ña'a̱ ti tya cua'ni tya'na ti' Ni ji'i̱ ma̱, cha' ña'a̱ ti cua'ni Ni cha' ti̱ ti tyi'i̱ tyiquee ma̱; jua'a̱ nti' na' cha' cua'ni Ni lo'o ma̱, xqui'ya cha' ntsu'u tsa tyiquee Ni ña'a̱ Ni ji'na, cha' chañi tsa cha' nu ngulu'u Ni ji'na.

⁴ Tso'o tsa ngua ti' na' lo'o ngujui cha' 'na cha' ña'a̱ ti tya ndaquiya' tso'o xi ngu' tya'a ma̱ lcaa cha' liñi nu cua nda ycui' Ndyosi Sti na lo'o na;

⁵ bi' cha' chcui' na' lo'o nu'u̱, ma' cusu', jua'a̱ lo'o lcaa ngu' tya'a ma̱, cha' tso'o ti tyu'u tyiquee na ña'a̱ na ji'i̱ tya'a ñati̱ na. Si'i sca cha' nu bilya ta Ni lo'o na laca cha' bi', sca cha' nu ndyuna na lo'o ngusñi na cha' ji'i̱ Jesucristo tya clyo laca cha' bi'.

⁶ Lo'o nu ni na' ji'i̱ ma̱ cha' tso'o ti tyu'u tyiquee na ña'a̱ na ji'i̱ tya'a ñati̱ na, la cui' jua'a̱ ntsu'u cha' taquiya' na lcaa cña nu nclyo ycui' Ndyosi ji'na. Nu lo'o ngusñi ma̱ cha' bi' tya clyo, cua ndyuna ma̱ lcaa cña nu ntsu'u cha' cua'ni ma̱ cha' tso'o ti tyu'u tyiquee lcaa ma̱ ña'a̱ ma̱ ji'i̱ tya'a ñati̱ ma̱.

Nu ngu' cuiñi nu tya'a cusu̱u̱ ji'i̱ Cristo

⁷ Ntsu'u tsa ñati̱ cuiñi nu nchcui' cha' ná chañi cha' ngua Jesús ñati̱ lo'o ya̱a̱ yu chalyuu. Tyucui ña'a̱ lo yuu chalyuu ndya'a̱ ñati̱ nu nchcui' cha' cuiñi bi'; na nñilo'o ngu' bi' ji'i̱ tya'a ñati̱ na, jua'a̱ tya'a cusu̱u̱ ji'i̱ Cristo laca ngu' bi'.

⁸ Bi' cha' tii ti ti' ma̱ tyi'i̱ ma̱ chalyuu, cha' ná culiji yu'u jua'a̱ ti lcaa cha' nu cua ndyuna ma̱ lo'o nguti'i̱ ya ca slo ma̱. Li' caja lcaa cha' tso'o nu cua nti' ycui' Ndyosi ta Ni ji'i̱ ma̱ lo'o tye chalyuu.

⁹ Lcaa ñati̱ nu tyatí̱ yu'u lo'o xa' la cha', ná ntsu'u cha' ji'i̱ ngu' bi' lo'o ycui' Ndyosi tsiya' ti, cha' ná cuayá' cha' ji'na lo'o jlya ti' na ji'i̱ Cristo, nti' ngu' bi'; pana lo'o cua ngusñi na cha' ji'i̱ Cristo ca ne' cresiya ji'na, li' stu'ba ntsu'u cha' ji'na lo'o ycui' Ndyosi, jua'a̱ lo'o ycui' nu sca ti Sñi' ycui' Ni.

¹⁰ Bi' cha' juani si tyalaa ñati̱ slo ma̱ nu ná nda la cui' cha' ji'i̱ Jesús bi' lo'o ma̱, nga'aa ta ma̱ su tyi'i̱ ngu' bi', ni ná ta ma̱ xlyo ni'i̱ ji'i̱ ngu' bi'.

¹¹ Nu lo'o chcui' na lo'o ñati̱ bi', ñi'ya̱ laca si ndyu'ni tya'a na lo'o ngu' bi', lo'o cña cuxi nu ndyu'ni ngu', jua'a̱ ndyu'u cha' bi'.

Cha' nu nguscua Juan lo'o cua tye ti quityi

¹² Tya ntsu'u tsa cha' nu nti' na' chcui̱' lo'o ma̱, pana tso'o la masi ná lo'o cha' bi' scua na' lo quityi re. Tiya' la nti' na' ca̱a̱ na' ca su ndi'i̱ cu'ma̱, lo'o li' ycui' ca na' taca ta na' cha' bi' lo'o ma̱; li' chañi cha' tso'o ti taca tyu'u tyiquee na ña'a̱ na ji'i̱ tya'a na.

¹³ Lo'o jua'a̱ nu ñati̱ tya'a ntsu'u cha' ji'i̱ ma̱ lo'o Cristo ca nde, nu ngu' nu cua ngusubi ycui' Ndyosi ji'i̱, lo'o ngu' bi' cua nti' ngu' chcuicha' ngu' ji'i̱ ma̱. Jua'a̱ caca cha' lacua.