2 CORINTIOS 4 - Chatino Tataltepec

¹ Bi' cha' ná nchca taja ti' ya ji'i̱ cña nu ndyu'ni ya. La cui' ycui' Ndyosi laca nu cua nda cña bi' ji'i̱ ya, xqui'ya cha' tya'na ti' Ni ña'a̱ Ni ji'i̱ ya.

² Cua nguxtyanu ya ji'i̱ lcaa cha' cuxi nu ndyu'ni ngu' cuaana ti, lcaa cha' nu ntyuju'u tsa ti' ngu' cua'ni ngu' ji'i̱. Si'i na nñilo'o ya ji'i̱ ngu', la cui' jua'a̱ ná nchcutsa'a̱ ya cha' ji'i̱ ycui' Ndyosi lo'o xi xa' la cha', nu lo'o nchcui' ya cha' bi' lo'o ngu'; tso'o ti nclyu'u ya tyucui cha' ji'i̱ Jesús ji'i̱ ngu'. Lo'o jua'a̱ chañi tsa laca cha' bi', cha' jua'a̱ caca cuayá' ti' lcaa ñati̱ cha' tyucui tyiquee ya ndu'ni ya cña ji'i̱ ycui' Ndyosi; jua'a̱ nti' ycui' Ni ña'a̱ Ni ji'i̱ ya.

³ Lo'o li' si ntsu'u ñati̱ nu ñacui̱ cha' tucui tsa ndyu'u cha' tso'o ji'i̱ Jesús nu nchcui' ya lo'o ngu', liñi la ñacui̱ na li' cha' ñati̱ bi' laca nu nguna' ndu'ni, bi' cha' ná nchca cua'a̱ jyaca̱ ñati̱ bi' ji'i̱ cha' bi'.

⁴ Ná ntaja'a̱ ngu' bi' xñi ngu' cha' bi' xqui'ya nu xña'a̱ nu ñilo'o ji'i̱ ñati̱ chalyuu. Ndacu̱' nu cuxi bi' cha' ji'i̱ ngu' cha' ná cuna ngu' cha' tso'o nu cuentya ji'i̱ Cristo, bi' cha' ná nchca tyanu xee lubii ji'i̱ Cristo ne' cresiya ji'i̱ ngu' bi'. Tlyu tsa cha' laca ji'i̱ Cristo; lcaa cha' nu ntsu'u ji'i̱ Ni, stu'ba ntsu'u cha' ji'i̱ Ni lo'o ycui' Ndyosi Sti Ni ca su ntucua Ni juani.

⁵ Nu cha' nu nda ya lo'o ngu' ni, si'i cha' ji'i̱ ycui' ca ya nchcui' ya. Ndi'ya̱ laca cha' nu nchcui' ya lo'o ngu': Jesucristo laca Xu'na tyucui ña'a̱ nde cua̱, lo'o la cui' Ni laca Ni loo ji'i̱ tyucui ña'a̱ nde chalyuu. Bi' cha' ñacui̱ ya cha' xqui'ya Jesús nu Xu'na na ndyu'ni ya cña cuentya ji'i̱ ma̱.

⁶ La cui' ycui' Ndyosi laca nu nda xee lubii ji'i̱ Ni cha' tyanu ne' cresiya ji'na; bi' cha' caca cuayá' ti' na lcaa cha' tlyu nu tso'o tsa nu ntsu'u ji'i̱ ycui' Ndyosi, la cui' ti cha' nu nchca tii na cha' ndyu'ni Ni cña ne' cresiya ji'na nu lo'o xñi na cha' ji'i̱ Cristo. Ycui' Ni ngulo Ni cña cha' tyucua xee ca su ngua chalyuu talya nu ngua tya sa'ni la.

Ndi'ya̱ tyi'i̱ na nde chalyuu lo'o ngusñi na cha' ji'i̱ ycui' Ndyosi

⁷ Masi tlyu tsa cha' tso'o nu ntsu'u ne' cresiya ji'na xqui'ya Cristo, pana ñati̱ chalyuu ti laca na, si'i na nguula tsa ti' na ycui' ca na. Ñi'ya̱ laca sca quityu̱' nu ndya' lo'o yuu ti nu xtyi'i ti ncla'a, jua'a̱ ti laca na. Tso'o la jua'a̱, cha' li' taca ca cuayá' ti' na cha' sca ti ycui' Ndyosi laca nu lcaa cña nchca ji'i̱ Ni; nga'aa si'i ycui' ca na nu nchca ji'na.

⁸ Lcua ti se'i̱ su ndya'a̱ ya, tlyu tsa cña ndyacua ji'i̱ ya, pana ná nchca tyiji̱loo nu cuxi ji'i̱ ya. Lu'ba ti nclyacua tsa ti' ya, pana ná nchca taja ti' ya lo'o xñi'i̱ ti' ya.

⁹ Ntsu'u tsa tya'a cusu̱u̱ ya, pana la cui' ti cha' ná lyiji tya'a tso'o ya. Masi ntsu'u ngu' nu ndyu'ni cha' quicha ya, pana ná nchca cua'ni tye ngu' ji'i̱ ya.

¹⁰ Macala su ndya'a̱ ya nde chalyuu, lu'ba ti nchca quicha ya, ntsu'u tsa cha' ti'í nu ndyu'ni ngu' lo'o ya, tsa ña'a̱ nu ngua ji'i̱ Cristo lo'o ya̱a̱ yu nde chalyuu, nu lo'o ndyujuii ngu' ji'i̱ yu. Pana li' ca jlo ti' xa' ñati̱ cha' ña'a̱ ti tya lu'ú ycui' Cristo, nu lo'o ña'a̱ ngu' bi' cha' ña'a̱ ti tya lu'ú ya.

¹¹ Cua ña'a̱ ca hora lo'o ndi'i̱ ya chalyuu ntsu'u tsa cha' cuxi nu taca cujuii ji'i̱ ya, cha' quiña'a̱ tsa cha' cuxi ndyacua ji'i̱ ya lcaa se'i̱ su ndya'a̱ ya xqui'ya Jesús. Pana jua'a̱ taca ña'a̱ ngu' cha' tya ndi'i̱ Jesús lo'o ya; bi' cha' laca tya ntsu'u chalyuu ji'i̱ ya, masi quicha ti ti' ya ndya'a̱ ya.

¹² Jua'a̱ laca cha' ji'i̱ cuare, na ncliji tyucui ña'a̱ ya xqui'ya cha' ti'í nu ndyacua ji'i̱ ya nde chalyuu; pana cu'ma̱ ni, cua ngujui chalyuu nu ná nga'a̱ cha' tye ji'i̱ ma̱ xqui'ya cña nu ngua'ni ya.

¹³ Ntsu'u sca cha' nu nscua lo quityi cusu' su nchcui' ngu' ndi'ya̱: “Jlya ti' na' cha' chañi laca cha' bi', bi' cha' nchcui' na' cha' liñi bi' lo'o xa' ñati̱”, nacui̱ jyo'o cusu' bi'. Lo'o jua'a̱ cuare, nchcui' ya cha' ji'i̱ Jesús cha' cua ndyatí̱ tyiquee ya ji'i̱ yu, xqui'ya cha' ngusñi ya cha' ji'i̱ yu.

¹⁴ Chañi jlya ti' ya cha' ngulo ycui' Ndyosi ji'i̱ Jesús nu Xu'na na ca su ntsiya yu nguatsi' yu, lo'o la cui' jua'a̱ ca̱qui'ya Ni ji'na, cha' stu'ba ti tyalaa na ca su ntucua ycui' Ni.

¹⁵ Ndalo ya ji'i̱ lcaa cha' ti'í nu ndyacua ji'i̱ ya xqui'ya cu'ma̱; tiya' la li' tyatu̱ quiña'a̱ la tya'a ñati̱ ma̱ nu taca tya xlya'be ji'i̱ ycui' Ndyosi cuentya ji'i̱ ya, cha' jua'a̱ quiña'a̱ tsa tya'a ñati̱ ma̱ ntsu'u nu cua ngujui xlya'be nu ta ycui' Ndyosi ji'i̱ ma̱. Lo'o li' stu'ba ti taca cua'ni chi̱ na loo ycui' Ndyosi.

¹⁶ Bi' cha' ná nchca taja ti' na ji'i̱ cña nu ndyu'ni na cuentya ji'i̱ ycui' Ndyosi, masi ncliji tyucui ña'a̱ cuaña' na jua'a̱ ti; pana ña'a̱ ti lu'ba ti ndu'ni ycui' Ndyosi cha' ca tso'o la cresiya ji'na.

¹⁷ Si'i na tlyu tsa cha' ti'í nu ndyacua ji'na chalyuu re juani, xti ti tyempo talo cha' ti'í bi'; pana tiya' la ni, tlyu tsa cha' tso'o nga'a̱ cha' tyacua ji'na ca slo ycui' Ndyosi, lo'o ná nga'a̱ cha' tye bi' tsiya' ti. Ná stu'ba cha' ti'í re lo'o cha' tso'o nu nga'a̱ cha' tyacua ji'na nde loo la.

¹⁸ Ná ntsu'u tyiquee na ji'i̱ sca na nu tso'o ña'a̱ ti, cha' ná talo lcaa na nu tso'o ña'a̱ bi' tsiya' ti; na nclyana na ji'i̱ sca cha' nu ná nchca ña'a̱ na ji'i̱ juani ti, pana nde loo la tyu'u tucua cha' bi', ña'a̱ na ji'i̱ li'. Bi' laca nu ná nga'a̱ cha' tye cha' ji'i̱.