2 CORINTIOS 3 - Chatino Tataltepec

Nde laca sca cha' nu cua nguxana ca ti

¹ Ná nchcui' tyucuaa ti' ya lo'o cu'ma̱. Ná nti' ya cha' chcui' ma̱ cha' tlyu tsa ñati̱ laca ya. Lo'o ndya'a̱ ya slo ma̱, ná ntsu'u cha' qui'ya ya sca quityi nu ñacui̱ cha' tso'o ti ndyu'ni ya cña; jua'a̱ lo'o ndyaa ya chaca se'i̱, ná ntsu'u cha' jña ya sca quityi jua'a̱ ji'i̱ ma̱.

² Ná ntsu'u cha' tyu'ú quityi ji'i̱ ya jua'a̱, cha' taca ña'a̱ ngu' ji'i̱ cu'ma̱. Cua jlo ti' ngu' cha' xqui'ya cuare tso'o tsa ndyuna ma̱ cha' ji'i̱ Jesús, jlo ti' ngu' cha' ntsu'u tsa tyiquee ya ña'a̱ ya ji'i̱ cu'ma̱.

³ Cristo ngua'ni cña bi' ne' cresiya ji'i̱ cu'ma̱, nu lo'o nda Ni ji'i̱ cua cha' ndyaa ya ca su ndi'i̱ ma̱; bi' laca sca cña ji'i̱ Xtyi'i ycui' Ndyosi nu lu'ú ca, nu ngua'ni Ni ne' cresiya ji'i̱ cu'ma̱ ñati̱ chalyuu, ni si'i cha' nscua sca cha' chu̱' quee cuaja' ti.

⁴ Taca chcui' na jua'a̱, cha' tlyu tsa ndyaca tyiquee na xqui'ya cha' jlya ti' na ji'i̱ ycui' Ndyosi, cha' cua ngusñi na cha' ji'i̱ Jesús.

⁵ Cuentya ji'na, ná nchca ji'na cua'ni na cña ji'i̱ ycui' Ndyosi tsiya' ti; pana ycui' Ni ndu'ni Ni lo'o na cha' taca ji'na cua'ni na lcaa lo cña ji'i̱ Ni nu ndyu'ni na.

⁶ Laca bi' sca cha' nu cua nguxana ca ti, sca cña nu ndyu'ni Xtyi'i ycui' Ndyosi laca. Ná laca bi' ñi'ya̱ laca sca cña nu ndacane ti quityi cusu' ji'na cha' cua'ni na. Ndyijii na xqui'ya yabe' nu ntsu'u ji'na xqui'ya cña nu nclyo quityi cusu' bi' ji'na, pana juani ndyiji chalyuu cucui ji'na xqui'ya Xtyi'i ycui' Ndyosi.

⁷ Cña nu ngulo Moisés ji'i̱ ngu' bi' cuentya ji'i̱ ycui' Ndyosi ni, chu̱' quee cuaja' nscua cha' bi'; nguscua Ni letra hichu̱' quee cuaja' bi', cha' chcui' ngu' lo. Ndubi tsa ña'a̱ xee ji'i̱ ycui' Ndyosi ngua, nu lo'o nda ca ti Ni cha' cusu' bi'; hasta tyucui ña'a̱ loo nu cusu' Moisés ndubi tsa ña'a̱ ngua, ni nga'aa ngua ña'a̱ tya'a ngu' Israel ji'i̱ loo nu cusu' bi'. Pana yala ti nteje tacui cha' bi', xtyi'i ti nguliji xee bi' loo yu li'. Lo'o xee ndubi ndyalaa cha' cusu' bi' lacua, masi xcui' jua'a̱ ndyijii ñati̱ lo'o yabe' nu ntsu'u ji'i̱ ngu' xqui'ya cña nu nclyo cha' cusu' bi';

⁸ pana juani tlyu la cha' ndyaca nu lo'o nda na cha' ji'i̱ Jesús lo'o ñati̱, lo'o li' ndu'ni Xtyi'i ycui' Ni cña ne' cresiya ji'i̱ ngu' bi'.

⁹ Cña nu nclyo cha' cusu' ni, bi' ndu'ni cha' quijeloo qui'ya nu ntsu'u ji'i̱ ñati̱; ntsu'u cha' chcube' ngu' li', masi ndubi tsa ña'a̱ xee nu ngua ca su ntucua quiya' cha' cusu' bi'. Bi' cha' juani tlyu la cha' laca cha' ji'i̱ ycui' Jesús bi', cha' jua'a̱ ndyaca lubii cresiya ji'na cuentya ji'i̱ ycui' Ndyosi xqui'ya Jesús bi'.

¹⁰ Juani tlyu la cha' tso'o ndyaca ca su ndi'i̱ na, bi' cha' nga'aa ña'a̱ na ji'i̱ cha' tso'o nu ngua ji'i̱ cha' cusu' bi', masi tso'o tsa ña'a̱ ngua cha' bi' tya clyo la.

¹¹ Xti ti tyempo ndalo nu cha' cusu' bi', masi tlyu xi xee ngua lo'o tya lyiji calo cha' bi'. Pana tyucui tyempo nu lijya̱ nde loo la, ná nga'a̱ cha' tye cha' nu nguxana ca ti bi' juani; tlyu la cha' laca bi' tsiya' ti.

¹² Lo'o juani nga'aa ntsi̱i̱ na chcui' na lo'o ñati̱, cha' jlo ti' na cha' tso'o tsa laca cha' ji'i̱ Jesús nu nchcui' na re.

¹³ Nga'aa nti' cha' tyacu̱' sca late' loo na ñi'ya̱ nu ngua'ni jyo'o Moisés nu ngua sa'ni bi', cha' ná ña'a̱ ngu' Israel loo yu lo'o nguliji xee bi' jua'a̱ ti.

^14-15 Ndyacu̱' tsa cha' hique ngu' Israel nu ngua li', cha' ná ngua cuayá' ti' ngu' cha' ji'i̱ ycui' Ndyosi tsiya' ti. Masi chalyuu juani, jua'a̱ laca lo'o quityi cha' jo'ó nu nguscua jyo'o Moisés, la cui' cña nu ngulo ycui' Ndyosi ji'i̱ ñati̱ nu ngua sa'ni bi'; nu lo'o chcui' ti ngu' judío lo quityi cha' jo'ó bi', ña'a̱ ti ná nchca ca'ya cha' bi' hique ngu' bi'. Tsiya' ti taca ca'ya cha' bi' hique ngu' lo'o xñi ngu' bi' cha' ji'i̱ Jesús; li' saala Ni hique ngu' cha' cuna tso'o ngu' cha' ji'i̱ Ni.

¹⁶ Pana lo'o xñi na cha' ji'i̱ ycui' nu Xu'na na, li' tye cha' nu ndyacu̱' hique na.

¹⁷ Lo'o nchcui' ca ti quityi re cha' ji'i̱ nu “Xu'na na”, bi' nti' ñacui̱ cha' Xtyi'i ycui' Ndyosi laca nu bi'. Lo'o jua'a̱ nu lo'o laca Xtyi'i ycui' Ndyosi nu Xu'na na loo ji'na, nga'aa tucui caca ji'i̱ tatsaa ji'na cha' cua'ni na cua ña'a̱ ca cña cuxi li'.

¹⁸ Jua'a̱ laca cha' ji'na, lcaa na lo'o tya'a na nu ntsu'u cha' ji'na lo'o Jesús, tyaca̱' tyijyu' cha' cua nda nu Xu'na na xee nu tyu'u loo na. Pana ná nga'a̱ cha' tyacu̱' sca late' loo na, cha' la cui' cha' tlyu bi' laca nu ña'a̱ ti tya lye la ndyu'ni cña lo'o na cha' cha'a̱ tyucui ña'a̱ na, cha' caca na ñi'ya̱ laca ycui' Ndyosi nu Xu'na na tsiya' ti. Ca slo ycui' nu Xu'na na nu laca Xtyi'i bi', ca bi' ndyu'u nu cha' tlyu bi'.